Il bogn i’l Trü gnarà plü frais-ch

Lündeschdi saira ha la suprastanza da Scuol orientà in üna radunanza d’infuormaziun a la populaziun davart sia decisiun da serrar las scoulas a Tarasp e Ftan (guarda eir quia) – e davart la situaziun in l’implant da sport Trü a Scuol.

Cha l’infrastructura da quel es per part in ün pac bun stadi, es cuntschaint fingià plü lönch. In lündeschdi ha la suprastanza cumünala perquai stuvü comunichar, cha l’indriz cun lingias d’ammoniac stopcha gnir tut our d’funcziun. Co chi va inavant, nun es intant amo decis. «Nus stain reagir plü svelt co spettà», ha dit Curdin Thomas, il suprastant respunsabel pels implants da sport in cumün.

Lingias d’ammoniac periclitadas

Il problem es la platta da beton, sülla quala i vain giovà la stà a minigolf e l’inviern a curling sün ün glatsch artificial. Quella platta da beton es in ün fich nosch stadi, perquai nu’s poja plü ir lasura cun maschinas pesantas. «Scha la platta cedess suot il pais da la maschina da glatsch, pudessan s-charpar las lingias d’ammoniac chi sun installadas illa platta per sfradantar l’inviern il glatsch e s-chodar la stà l’aua dal bogn», ha declerà Curdin Thomas in lündeschdi saira.

El ha eir concess cha la situaziun actuala saja la consequenza da la negligenza i’ls ultims decennis. «Forsa s’haja i’ls ultims 25 ons serrà ils ögls», ha dit il suprastant chi’d es in uffizi daspö s-chars üna legislatura. «Daspö l’on 1985 nu s’haja plü investi in l’implant tecnic.»

I’ls ultims duos ons vaiva eir dat duos discapits, pro’ls quals i d’eira sorti ammoniac our da las lingias, però sainza chi vess dat dons plü gronds. Ma quels discapits han dat andit ad analisar il stadi da l’infrastructura cun ün’expertisa externa. Il resultat es, cha quella nu po uossa plü gnir ütilisada. Intant es gnü allontanà l’ammoniac our da las lingias, il privel d’üna contaminaziun nun es plü avant man.

Glatsch natüral dadour cumün

Insè vaiva la suprastanza cumünala fingià chattà üna soluziun a lunga vista, sco cha Curdin Thomas ha declerà al public pro la radunanza d’infuormaziun: üna sort tapet chi sfradainta il glatsch e chi’s vess probabelmaing eir pudü ütilisar per s-chodar la stà l’aua dal bogn. Cha cuort avant cha la suprastanza laiva annunzchar üna radunanza cumünala per dumandar il credit necessari da la populaziun, s’haja la ditta però retrat da sia aigna offerta. 

Cun quai esa intant cler chi nu darà i’l implant da sport Trü quist inviern ingün glatsch per giovar a curling ed ir culs patins. Üna soluziun intermediara daja intant dadour cumün: Sülla plazza da ballapè a Gurlaina, sper la halla da glatsch, vain fat ün glatsch natüral per ir culs patins e giovar a curling – «a partir da circa la mità november» tenor infuormaziun da lündeschdi saira, ma eir dependent da las temperaturas.

«Cun curaschi, ma eir realissem»

La prosma stagiun da stà sarà l’implant da sport Trü lura darcheu accessibel, eir il bogn avert. «Ma cun aua plü fraida co fin uossa», ha dit Curdin Thomas. Üna soluziun perdüraivla voul la suprastanza uossa evaluar insembel culla cumischiun da turissem – «cun investiziuns portablas a lunga vista». Il suprastant respunsabel ha dit quai uschea: «Nus piglian per mans quai cun curaschi, ma eir realissem.»