Plazzas na vegnan betg stritgadas
Il cussegl d’administraziun da la SRG SSR ha confermà questa gievgia il nov team da direcziun da Radiotelevisiun Svizra Rumantscha (RTR). Plinavant èsi vegnì enconuschent che RTR na sto l’onn proxim betg stritgar plazzas sco autras unitads da la SRG SSR.
La directura da RTR Simona Caminada – en funcziun dapi l’entschatta settember – survegn in nov team da direcziun: Valentin Schmed surpiglia il sectur Infurmaziun, Anna Serarda Campell e Tinet Gaudenz surprendan sco co-manaders la partiziun Cultura/Societad e Savida/Divertiment e Flavio Bundi daventa manader Distribuziun e Public.
Latiers vegnan trais «business partners»: Flurina Foppa per il sectur da Resursas umanas, Beat Lozza per il sectur Finanzas/Stab e Corsin Gadola per il sectur Operaziuns. Quai ha il cussegl d’administraziun da la SRG SSR confermà questa gievgia.
Mesiras da spargn pli concretas
L’unitad regiunala rumantscha da la SRG SSR ha annunzià questa gievgia ch’ins haja da spargnar 100 000 francs l’onn 2027 (guarda boxa). Ils respargns vegnan realisads sur las structuras e process sco era cun nizzegiar pli fitg sinergias. Ina reducziun da plazzas tar RTR n’è betg previsa per il 2027.
Tar las autras unitads da la SRG SSR vegnan stritgadas diversas plazzas: SRF stritga 39 plazzas cumplainas, RSI otg fin dudesch plazzas, RTS enfin 25 plazzas. Fin l’onn 2029 sto la SRG SSR spargnar radund 270 milliuns francs, 80 milliuns francs gia fin il 2027. Quai è ina consequenza da la reducziun da la taxa da medias decidida dal Cussegl federal.
Las mesiras da spargn da RTR en survista
Finamira da spargn 2027: 100 000 francs
Collavuraziun pli stretga cun autras regiuns linguisticas tar emissiuns d’actualitad
Diever augmentà dad intelligenza artifiziala tar ils archivs
Reducziun da prestaziuns en il marketing
Sis dumondas a la directura da RTR, Simona Caminada.
FMR: Vus avais infurmà ier gievgia da mezdi il persunal davart las mesiras da spargn e davart la restructuraziun. Co ha quel reagì sin las midadas?
Simona Caminada: Il messadi è stà da mussar co che RTR spargna il 2027 quests 100 000 francs. E tschel messadi grond è stà che nus avain finalmain pudì preschentar il nov team da direcziun. Ed jau hai in enorm plaschair da questa squadra che s’engascha cun corp ed olma per il service public. Nus essan en ina fasa da transfurmaziun e cunquai datti malsegirtads, ma nus avain ussa pudì dar in emprim scleriment davart la nova structura.
SRF stritga 38 plazzas, RTS 25, RSI otg fin dudesch – ma RTR nagina. Pon ins dir che RTR mitscha cun in egl blau?
Simona Caminada: Enfin il 2029 sto la SRG SSR tenor la decisiun politica spargnar 270 milliuns francs. Per il 2027 avain nus empruvà da betg spargnar tar il program e perquai analisà las structuras ed ils process en l’entira SRG SSR. RTR lavurà gia oz cun structuras fitg simplas e schlancas. Perquai n’avain nus betg stuì relaschar persunas. Quai è per mai natiralmain stà in grond levgiament.
Il nov team da direcziun sa cumpona sper Vus sco directura da set persunas. N’èn quai betg memia blers «schefs» e «scheffas»?
Simona Caminada: Cun il program da transfurmaziun «Enavant» avain nus decidì da far structuras che valan per tut las unitads da la SRG SSR. I dat perquai reglas. Sch’ins guarda concret: Avant il program da transfurmaziun avevan nus set plazzas entaifer la direcziun schlargiada. Oz avain nus era set plazzas, ma cun otg fatschas, e gliez perquai ch’ina partiziun vegn manada da duas persunas en in co-lead.
Ina part dal respargn duai vegnir cuntanschì tras ina collavuraziun pli stretga cun las autras regiuns linguisticas tar emissiuns d’actualitad. Tge munta quai concret?
Simona Caminada: Nus empruvain da lavurar pli stretg ensemen cun tschels e tschellas. Nossas istorgias grischunas han potenzial era giu la Bassa ed er en las regiuns talianas e franzosas. La finamira da la transfurmaziun «Enavant» è da crescher ensemen pli fitg ed era da profitar in da l’auter. Per exempel: Ina contribuziun che va en il Telesguard, sa era vegnir emessa en in’autra furma, per exempel tar Schweiz Aktuell.
Il squitsch politic sin la SRG SSR resta vinavant aut. A partir l’onn 2029 sto mintga chasada mo pli pajar 300 francs taxas da medias. Èn las mesiras che Vus avais communitgà oz simplamain in «preludi» da tut quai che vegn anc ils proxims onns?
Simona Caminada: Il respargn per l’onn 2027 avain nus ussa elavurà – ma nus avain vinavant da spargnar. E quai essan nus ussa vi dad elavurar.
L’entschatta settember avais Vus cumenzà Voss nov job sco directura. Ins sa dir che Vus n’avais betg gist gì in’entschatta simpla. Avais Vus imaginà quai uschia u fissas Vus pli gugent anc restada en l’Italia sco redactura in mument?
Simona Caminada: Sco schurnalista sai jau: Igl è da far bunas retschertgas avant ch’ins prenda ina decisiun. E quai hai jau fatg. Jau hai savì tge che spetga mai. Jau sun anc oz persvadida che quai è stada la dretga decisiun. Nus avain grondas sfidas, gea, ma jau hai gust d’esser qua e da cumbatter per in bun e ferm service public per la Rumantschia.
Gust da leger dapli?