Il pievel sa decider
Il suveran ellas vischnauncas sursilvanas decida la fin da november davart la reorganisaziun dil provediment da sanadad ella regiun. Quei han decidiu unanimamein gievgia sera ils delegai e las delegadas dalla SanaSurselva. Lezs han era deliberau claramein la proposta da cuntinuar culla partiziun da parturir a Glion.
Co s’organisescha il provediment da sanadad en Surselva igl avegnir? – Quella damonda duei vegnir surschada ils 29 da november 2026 allas votantas ed als votants dallas singulas vischnauncas commembras. Quei han ils delegai e las delegadas dalla SanaSurselva – che secumpona da delegai da tuttas vischnauncas commembras – decidiu unanimamein la gievgia vargada. Quei ha l’organisaziun dalla SanaSurselva schau saver en ina communicaziun da medias. En votaziun va lu ina cunvegna da prestaziun cumplessiva denter la SanaSurselva e la Reit da Sanadad Surselva (mira boxa). Lezza s’occupass – en cass d’in GIE all’urna – igl avegnir dil menaschi dallas instituziuns da sanadad en Surselva.
La SanaSurselva resta incumbensadra e determinescha las prestaziuns pretendidas dalla regiun. Quei pertucca per exempel casas da tgira, la Spitex, il survetsch da salvament ed il Spital regiunal Surselva a Glion. La finamira dalla nova cunvegna ei la finala da transferir tuttas regulaziuns e cunvegnas d’entochen ussa per mintga singula instituziun en in concept communabel.
Mantener la staziun da parturir
In grond punct da discussiun ei leutier stada ils davos meins la staziun da parturir el spital a Glion, la quala fuss medemamein part dalla cunvegna culla Reit da sanadad. Il cantun Grischun haveva recumandau oriundamein, en siu maletg empalont, da serrar la staziun da parturir. Sinaquei han denter auter las spindreras che collavuran cul Spital regiunal Surselva scret ina brev da protesta al directur da sanadad Peter Peyer ed han lantschau ina petiziun. Malgrad las recumandaziuns dil Cantun ha la SanaSurselva annunziau viers la fin d’uost da vuler mantener la staziun da parturir a Glion.
Cuort avon la radunonza da delegai dalla SanaSurselva da gievgia ha denton la PLD perencunter annunziau critica a caschun dalla sesida dil parlament communal d’Ilanz/Glion. Ella vesess potenzial da spargn e cunquei ina pusseivladad per sbassar il deficit annual che las vischnauncas vegnan a stuer purtar.
Applaus dil publicum
La radunonza da delegai dalla SanaSurselva ei ussa denton s’exprimida claramein per cuntinuar culla partiziun el spital a Glion, sco era RTR ha rapportau il venderdis. «Cunquei resta quella impurtonta purschida medicinala part dil provediment da sanadad regiunal», ha resumau la SanaSurselva en sia communicaziun. Alla decisiun hagien contribuiu sclariments en detagl. Lezs hagien relativau ils respargns ch’ins savess far cun serrar la partiziun. «Numerus cuosts che vegnan attribui matematicamein agl agid da parturir curdassen buca naven tier ina serrada, perquei ch’ei drova tuttina per exempel l’anestesia, la sala d’operaziun, l’infrastructura ed auters survetschs medicinals», ha schau saver la SanaSurselva. Alla radunonza da delegadas e delegai da gievgia sera hai schizun dau applaus dallas rodund 50 persunas el publicum, suenter ch’il gremi haveva votau cun 26 cunter ina vusch da mantener la staziun da parturir el Spital regiunal Surselva.
Decidan era Laax e Schluein?
Tgeininas vischnauncas decidan insumma davart la cunvegna da prestaziun denter la SanaSurselva e la Reit da sanadad? – Quei ei era RTR sedumandaus en in rapport dil venderdis. Il punct dispiteivel ei che Schluein e Laax ein bein – tenor definiziun dil Cantun – participadas alla regiun da sanadad en Surselva. Las duas vischnauncas ein denton extradas avon treis onns dalla SanaSurselva.
Alla radunonza da delegadas e delegai ha il president dalla SanaSurselva, René Epp, denton schau saver ch’era il suveran da Schluein e Laax sappien decider. Enviers RTR ei il president communal da Schluein, Ralph Schläpfer, semussaus cuntents cun quella proposta. Tenor el fussi denton stau «aunc pli positiv, sche la populaziun havess igl emprem saviu decider, sch’ins vul insumma la Reit da sanadad», avon che decider davart in budget a cuorta vesta che risguardi buca las grondas investiziuns futuras en in niev spital.
Danunder vegnan ils cedels da votar?
Tenor il rapport dad RTR resta il mument pia aunc aviert co exact ed en tgei fuorma che las duas vischnauncas da Laax e Schluein vegnan a separticipar alla votaziun all’urna e schizun ad in futur provediment da sanadad ella regiun. Per exempel setschenti la damonda fetg pratica tgi che metta insumma a disposiziun ils cedels da votar che havessen da vegnir reparti il november a Schluein ni forsa era a Laax.
Pli spinusa para la situaziun giuridica numnadamein dad esser a Laax. Leu ha la suprastonza communala gie decidiu avon treis onns d’extrar dalla SanaSurselva. La SanaSurselva ei denton dall’opiniun che quell’extrada – sin basa dalla decisiun dalla suprastonza – seigi buca stada legala e che la vischnaunca da Laax seigi pia aunc adina commembra dalla corporaziun. En ina brev – che RTR citescha – refusa Laax denton quella vesta e cunquei ina votaziun dil pievel davart la cunvegna da prestaziun denter la SanaSurselva e la Reit da sanadad Surselva. (rtr/fmr)
Gust da leger dapli?