Anzemen sen tribuna
L’antscheata digl on ân las duas uniùns da giuvantetgna da la Muntogna da Schons, la Calandaria a la Cumpagneia da Donat, fusiuno. L’amprema ocurenza â la nova Uniùn da giuvens Anarosa schon dumagnieu. Ussa saprepareschan igls cumembers a las cumembras par lur proxim evenimaint agl atun: egn teater cun feasta da fusiùn.
Tgi c’e sto a la feasta d’Alp Curtginatsch l’antscheata d’avust â betga me savieu giuder la beala ora, mobagn ear egna plata da caschiel near egn generus toc turta. Ad ella near el e ascheia schon vagnieu an contact cun la nova uniùn da giuvantetgna da la Muntogna da Schons: L’Uniùn da giuvens Anarosa. Las duas uniùns Calandaria a la Cumpagneia da Donat a conturn ân numnadameing fusiuno l’antscheata digl on.
Sco amprema ocurenza cuminevla â la nova uniùn organiso l’ustreia da feasta sen l’Alp Curtginatsch. Igl president da l’uniùn, Gian-Luca Michael da Donat, e cuntaint sco els ân dumagnieu lur amprema ocurenza sco nova uniùn. «Nus vagn gieu avunda cumembers a cumembras ca ân savieu gidar», cunstatescha el ad aschunta ca quegl segi betga adigna sto igl cass par las duas uniùns igls davos ons.
Adigna puspe egn tema
Igl tema da fusiunar e adigna puspe vagnieu discuto – schi bagn tier la Calandaria, l’uniùn da giuvens da Vargistagn, Maton a Lon, sco ear tier la Cumpagneia da Donat a conturn. Quella tematica â ear acumpagnieu igl Gian-Luca Michael durànt igl sieus tains sco anteriur president da la Cumpagneia: «Durànt a suainter corona e la nossa uniùn dada ampo ordapar. Ascheia sund jou mintg’on puspe vagnieu cugl tema da fusiunar a la radunànza generala», declara el.
Igl on 2025 en tutas duas uniùns stadas aschi lientsch, ascheia ca las duas suprastànzas en sasidas anzemen par prender a màn la fusiùn. Ear las vischnàncas da la muntogna da Schons vevan dantànt fusiuno. Ascheia fagev’igl par els sen ca las uniùns da giuvens s’uneschian ear, sco igl Gian-Luca Michael cunstatescha.
Betga tuts earan parsuainter
Igl schaner 2026 â alura gieu liac l’amprema radunànza generala da la nova uniùn. Digl tut sainza conflicts e’gl dantànt betga ieu. Igl Gian-Luca Michael raquenta c’egn, dus cumembers segian sortieus da lur uniùn, cun quegl c’els earan betga parsuainter da fusiunar. Dantànt en ear antros novs cumembers, a l’Uniùn da giuvens Anarosa dumbra actualmeing 36 cumembers a cumembras.
Egn num unic
Durànt quella amprema radunànza generala e ear vagnieu vuscho giou pigl nov num da l’uniùn. «Nus levan catar egn num unic da la nossa valada, anzatge spezial», explitgescha igl Gian-Luca Michael igl num «Anarosa». Quel sareferescha a l’alp digl madem num senzum la Muntogna da Schons, egna da las ple gràndas alps digl Grischùn.
Egna nova sfida
La suprastànza da la nova uniùn sacumpona da Gian-Luca Michael (president), Silvan Beeli (actuar a vizepresident), Jan Battaglia (cassier), Laura Sutter (assessura) a Conradin Dolf (assessur). «Nus vagn sadezidieu par egna suprastànza da tschentg parsùnas, ascheia ca nus vagn aint rapreschantànts da la muntogna sura a sut», declara igl president.
Egna da las sfidas par la nova uniùn veza igl president an drizar igl sguard anviers igl futur. La nova uniùn vean a surprender ocurenzas ca vagnevan fatg u da la Calandaria near da la Cumpagneia. Igl Gian-Luca Michael spera ca quellas ocurenzas vagneian ussa purtadas da tut igls cumembers mademameing. «Igl dovra siir egn peer ons antocen c’ign vean propi aint», cunstatescha igl president ad e optimistic pigl futur da l’uniùn. Tge ca el veza positiv e ca var la measadad digls cumembers abitescha ear an la regiùn. Ascheia e’gl ear sto pussevel da catar avunda cumembers ca sapartizipeschan a lur proxima ocurenza: igl teater.
Teater a feasta da fusiùn
Igl teater anual da la Cumpagneia da Donat â egna lùnga tradiziùn. Malgro la fusiùn, â ear quest november puspe liac igl teater tradiziunal a Donat. Uon vean quel peia par l’amprema eada preschanto da l’Uniùn da giuvens Anarosa. Ascheia statan giuvens a giuvnas da la muntogna sura a sut anzemen sen tribuna. «Anzemen cun igl teater, lainsa nus ear gest far la nossa feasta da fusiùn», raquenta igl Gian-Luca Michael plagn plascher da lur plans.
Actualmeing satgata l’uniùn amiez la preparaziùn digl teater a la feasta. Igl Gian-Luca Michael tradescha c’els vegian trànter oter l’ideia da manar sei sketchs cun anteriuras cumembras ad anteriurs cumembers da las uniùns. Ign dastga peia salegrar segls 21 da november, cur ca l’Uniùn da giuvens Anarosa anvida par l’amprema eada a teater a Donat a magna ascheia anavànt egna tradiziùn impurtànta an la val.
Gust da leger dapli?