Ina mes’ura da consultaziun a distanza

Emprender d’enconuscher l’Ospital chantunal dal Grischun, las persunas che lavuran e la medischina che vegn pratitgada là. Quai è dapi passa in onn pussaivel a distanza. L’ospital chantunal porscha numnadamain in podcast cun il num «Die halbe Sprechstunde».

Dajan Roman, manader communicaziun da l’interpresa e David Eichler, responsabel communicaziun online e social media modereschan il podcast da l’ospital. Regularmain beneventan els ina persuna che lavura a l’Ospital chantunal a Cuira e mainan in discurs en trais. Il giast preschenta mintgamai ses champ spezial, quinta dal mintgadi a l’ospital, da sia via professiunala e declera tge ch’el fa. E quai da maniera simpatica, captivanta ed infurmativa. Fin ussa datti 14 episodas. Ina giada è vegnì a pled il schefmedi da la cardiologia che ha declerà la funcziun dal cor da maniera fitg chapaivla. In’autra giada han ils moderaturs baterlà cun il mainagestiun dal salvament Cuira che ha era raquintà dal servetsch da salvament durant il tschaiver a Cuira. E durant in’autra episoda ha la manadra da la tgira en la chirurgia tranter auter mussà tge ch’è sa midà dapi ch’ella ha cumenzà a lavurar en la tgira. Ma dapi na vi jau betg tradir.

Las istorgias mussan era la vita davos las persunas che lavuran a l’Ospital chantunal dal Grischun. Mintga episoda dura radund 30 minutas, da quai deriva er il num «Die halbe Sprechstunde». Las 14 episodas dal podcast èn disponiblas sin tut las plattafurmas da streaming.