Niev dacasa per soras e persunal el Da Casa

Per che la casa d’attempai e da tgira a Vella sappi recepir las soras attempadas dalla claustra da Glion drova ei dapli persunal. Quei ei ina cundiziun. Quei persunal sappi la claustra metter a disposiziun el medem tratg cullas cussadentas novas, declara Ursulina Cadruvi, la gestiunaria dil Da Casa Val Lumnezia. «Igl ei enconuschent ch’il Da Casa Val Lumnezia ha ina munconza da persunal. Nus havein buc avunda persunal per saver occupar tut ils letgs. Ed aschia ein adina denter sis ed otg letgs buc occupai.» Ella di ch’ins hagi purschiu dapi questa primavera combras da vacanzas per dar cunterpeisa alla sutoccupaziun. Da quella pusseivladad vegni ei fatg diever regularmein.

La claustra era alla tscherca

Dapi in temps eis ei enconuschent che la claustra da Glion venda sia immobilia e sa a liunga vesta era buca pli menar en atgna reschia sia partiziun da soras attempadas. Il Da Casa Val Lumnezia hagi intervegniu che la claustra seigi alla tscherca da sligiaziuns per la tgira, di Ursulina Cadruvi e cumpletescha: «Ils responsabels dalla claustra han lu era dumandau nus, sche nus haveien interess da surprender ina part dils letgs dalla casa da vegls dalla claustra.»

La gestiun dalla casa d’attempai e da tgira a Vella ha sinquei signalisau interess da surprender la tgira d’ina part dallas cussadentas dalla claustra da Glion. Ursulina Cadruvi ei perschuadida che la tgira dallas soras dominicanas munta era in bien sustegn finanzial pil Da Casa Val Lumnezia. «Nus vulein mantener il Da Casa sin bunas combas finanzialas per saver garantir allas Lumnezianas ed als Lumnezians lur casa d’attempai e da tgira a liunga vesta.»

Cuntentientscha d’omisduas varts

La recepziun dallas soras dominicanas e dil persunal da tgira ei tenor Ursulina Cadruvi ina excepziun. «Las sis soras dominicanas attempadas che drovan tgira prendan cun ellas circa 260% plazzas da lavur. Las persunas da tgira ein stadas tier nus a fuffergnar ed han schau plascher fetg bein la casa ed il menaschi. Ellas survegnan ussa in contract da lavur dil Da Casa ed entran el decuors digl atun tier nus», di Ursulina Cadruvi. Cura ch’il niev persunal ei luvraus en la fin d’october e l’entschatta november 2026 entran las cussadentas novas.

Tenor la gestiunaria ein las partiziuns da tgira dalla claustra e quella dil Da Casa Val Lumnezia fetg cuntentas da saver plazzar en in liug ina part dallas soras che drovan tgira. «All’entschatta vegn ei a dar enqual mument da ‹stress› entochen che tut ei s’acclimatisau alla nova situaziun. Nus havein cunquei denton ina nova cultura da menaschi el Da Casa. Jeu sun perschuadida che quella vegn a dar biara satisfacziun ad omisduas varts.»

Prioritad ha la Lumnezia

All’adressa dallas attempadas e dils attempai dalla Lumnezia remarca la menadra dil Da Casa che las Lumnezianas ed il Lumnezians hagien adina emprema prioritad. Per ella seigi quei impurtont da deponer. «La structura da nies menaschi vegn mantenida precis sco tochen dacheu e nus sespruein era egl avegnir da dar peisa al lungatg romontsch, mo era da segidar cun persunas che san buca romontsch.»

Entochen dacheu haveva il Da Casa Val Lumnezia memia pauc persunal da tgira e saveva orda quei buca prender si novas cussadentas e cussadents. Cunquei ch’il persunal da tgira dalla claustra mida era el Da Casa sa il problem dalla munconza da persunal vegnir sligiaus pil proxim temps. Senza las cussadentas ed il persunal dalla claustra habiteschan actualmein 51 cussadentas e cussadents el Da Casa. 94 persunas lavuran ella casa d’attempai e da tgira a Vella.

Problems da plaz ei dapertut

Ursulina Cadruvi di che tuttas casas d’attempai e da tgira ella regiun ed el Grischun vegnan ad haver in problem da plaz en diesch entochen vegn onns cura che las grondas annadas e la generaziun dils «babyboomers» ston ir ellas casas da vegls e da tgira. «Per nus eis ei schon ussa mintga gada fetg grev cura che nus stuein dir na ad enzatgi ch’entrass bugen tier nus. Tgisà, forsa ch’il Da Casa sa porscher in di ina tgira ambulonta che va ella direcziun da pigns survetschs che la spitex porscha buca.» La menadra dil Da Casa accentuescha denton en discuors cun la FMR che quei seigi ad interim ina pintga visiun ch’ella hagi, ina sempla idea che stuessi aunc vegnir concretisada.

Cert ei actualmein che sis soras attempadas dalla Claustra da Glion fan midada, ensemen cun lur persunal. Bein pusseivel che quei ei mo in’emprema da futuras collaboraziuns.