«Nus vulein era votar»

La Surselva ha oz 15 vischnauncas politicas. Ina da quellas, la vischnaunca da Schluein ei extrada dalla SanaSurselva cun ina decisiun dalla radunonza communala ed ei dapi uonn buca pli commembra dalla corporaziun da vischnauncas da sanadad dalla Surselva. A Laax ha la suprastonza communala decidiu d’extrar, quei ch’ei dispiteivel tenor il dretg cantunal  surordinau (La FMR ha rapportau ier mesjamna). Ferton che la situaziun da partenza a Schluein ei clara, van ils da Laax sillas barricadas e vulan votar ils 29 da november davart la cunvegna nova dalla Sana Surselva cun la Reit da Sanadad Surselva. La via ch’ina part dil suveran da Laax vul encaminar per effectuar ina votaziun era aunc buca clara il davos mardis. (mira box).

Negin che capescha

Las persunas che la FMR ha dumandau sin via a Laax ed a Schluein capeschan buca ch’ei dat negina votaziun davart la nova cunvegna da prestaziun denter la SanaSurselva e la Reit da sanadad Surselva.

«Nus vulein era votar», quels plaids ein vegni pliras gadas duront las intervistas. Repetidamein ei vegniu accentuau che la nova cunvegna seigi era da gronda muntada pigl avegnir dil Spital regiunal Surselva. Ei suondan entginas rispostas spontanas da habitontas e habitonts da Laax e da Schluein dil davos mardis.

Claudio Coray, Laax

Jeu manegel che nus duessan era saver prender posiziun. Donn che nus astgein buca votar. Ei fuss fetg donn sch’ei dess midadas negativas per nies spital. Nus havein giu da gir nuot entochen ussa. Quei ei iu tut sur la suprastonza communala. Jeu sun dall’idea ch’ei fuss negin problem da schar decider era il pievel da Laax davart la cunvegna da prestaziun nova. 

Peder Camathias, Laax

Nossa suprastonza ha decidiu d’extrar e jeu manegel che quei seigi buca propi ina buna decisiun. Era sch’ins ei d’in auter meini eis ei tenor mei tuttina d’esser presents e separticipar dalla discussiun. Jeu sun schon per mantener in spital sco la cunvegna nova preveda, la damonda ei semplamein co e sin tgei moda e maniera che quei spital vegn finanziaus.

Paulina Arpagaus, Laax

L’executiva sa buca decider suletta da buca schar decider il suveran davart quella nova cunvegna culla Reit da sanadad Surselva che cuntegn gie era igl avegnir dil spital da Glion. Nossa populaziun sto era gir gie ni na. Jeu schessel claramein gie alla cunvegna nova naven digl emprem da schaner 2027 e cunquei era gie all’existenza futura dil Spital regiunal Surselva.

Diana Cadruvi, Laax

Jeu acceptel la decisiun dalla suprastonza communala da buca far part pli dalla SanaSurselva. Pertuccont il spital da Glion quetel jeu bien che las dunnas san parturir era vinavon el spital. Leu havein nus l’obligaziun d’esser solidarics enviers ils vitgs ch’ein pli giud via che Laax.  Mo nus havein buca da votar e perquei eis ei era buca da far patratgs.

Flurina Rossbach – Caviezel, Schluein

Per mei ei quei buca bien che nus savein ­buca condecider en caussa cunvegna da ­prestaziun. Secapescha ch’jeu schess era bugen miu meini en ina votaziun. La politica stuess collaborar. Jeu hai l’impressiun ch’ei vegni luvrau plitost in encunter l’auter en Surselva.

Roman Egger, Schluein

Nus havein da gir nuot, essan extrai ed havein d’acceptar ussa quei che las autras vischnauncas decidan. Quei ei buca bien. Nus s’udin tier quella regiun. Jeu schess fetg bugen gie alla nova cunvegna da prestaziun e cunquei era al spital. Tenor mei drova ei ina megliera collaboraziun en Surselva.