Anna Giacometti remetta gia ussa ses uffizi
En in’emna hai num dar adia ad Anna Giacometti. La cussegliera naziunala da la PLD ha dà la gievgia sia demissiun. Questa sessiun d’atun è damai sia davosa. Remplazzada vegn la politicra bregagliotta da Christian Rathgeb.
Tuttenina vai sveltischem. Avant duas emnas aveva Anna Giacometti dà enconuschent da betg pli vulair candidar il 2027 per ina ulteriura legislatura. Uss èsi cler che la cussegliera naziunala da la PLD remetta gia ussa ses uffizi. Il proxim venderdi va a fin la sessiun d’atun ed i tutga da prender cumià da las collegas e dals collegas en il Cussegl naziunal.
Sa legra per in december e Nadal senza sessiun
«Jau hai tschernì il di da la plurilinguitad per mia demissiun«, di Anna Giacometti. La gievgia ha il parlament celebrà la plurilinguitad e la cussegliera grischuna ha surdà il scriver da demissiun en lingua taliana al president Pierre-André Page.
Ella saja levgiada e sa legria d’avair suenter blers onns puspè ina giada in december senza sessiun, di la politicra: «Igl è adina stà in stress da vegnir a chasa e pachetar svelt ils regalins e decorar il pignol avant che tuts vegnan. Quest onn hai jau flot temp.»
La raschun da chalar gia uss haja da far cun ponderaziuns a favur da la partida, explitgescha la politicra: «Sche jau restass fin il davos da la legislatura, daventass quai grev per mia partida da defender il sez en il Cussegl naziunal.» Ma cun ina persuna ch’è gia en uffizi, saja quai pli simpel.
La partida n’haja betg fatg squitsch, sutlingescha la cussegliera naziunala. I saja stà sia decisiun da chalar avant.
Christian Rathgeb daventa parlamentari
Per occupar il sez che vegn liber na dovri nagina elecziun dal pievel pli. Per il rest da la legislatura surpiglia Christian Rathgeb l’uffizi. L’anteriur cusseglier guvernativ aveva era candidà il 2023 sin la glista da la PLD. Anna Giacometti aveva fatg cun radund 16 100 las bleras vuschs sin la glista. Christian Rathgeb ha cuntanschì cun 9900 vuschs il segund plaz, quel dal suppleant. Uschia remplazza el la cussegliera partenta. El daventa cusseglier naziunal en la sessiun d’enviern.
«Jau m’allegr fitg per questa sfida», di Christian Rathgeb. El saja stà pliras giadas en la Chasa federala sco president da la Conferenza da las regenzas chantunalas il 2020 fin 2022. Là haja el survegnì in pau invista en il manaschi parlamentar. Perquai haja el grond respect e considereschia la pussaivladad dad ir en il Cussegl naziunal sco grond privilegi. Christian Rathgeb lavura a l’Universitad da Turitg sco docent per dretg statal.
Gust da leger dapli?