Encuretg plevon ni plevonessa
La pleiv reformada Sagogn-Laax-Falera enquera in plevon ni ina plevonessa. Muort la munconza da persunal en quei sectur eis ei denton buca la suletta el Grischun. Sco il decan dalla Baselgia evangelica reformada cantunala Thomas Müller-Weigl ha detg, semigliureschi la situaziun malgrad differentas mesiras buc ils proxim onns.
Dapi l’entschatta dil 2026 enquera la pleiv reformada Sagogn-Laax-Falera in plevon ni ina plevonessa. Vacanta ei la plazza dapi entschatta uost. Quei schegie ch’ei ha dau ina ni l’autra annunzia, sco la presidenta dalla pleiv Amanda Beeli ha confirmau enviers la FMR: «Ina persuna ha la finala renviau in engaschi. Mo nus vein era giu quater tschun annunzias nunvaleivlas.»
La tscherca da persunal qualificau cuntinuescha perquei tier la pleiv Sagogn-Laax-Falera – denton buca mo cheu. Sco in sguard silla pagina d’internet dalla Baselgia evangelica reformada dil Grischun muossa, enqueran biebein otg pleivs in plevon ni ina plevonessa. Quels paucs ch’enqueran ina plazza han pia la schelta.
Plazzas vacantas dretg e seniester
Quella experientscha ha era la pleiv Scanvetg Central stuiu far. Gest duas persunas han renviau la plazza ch’ei vacanta dapi il matg 2026. «Ina persuna ha anflau in’autra plazza ed ina ei tuttina restada tier sia pleiv, perquei ch’ins ha leu buc anflau in successur ni successura», ha il president dalla pleiv Scanvetg Central Benedikt Jegi explicau. Dapi quellas empremas annunzias ed in pèr candidaturas nunvaleivlas seigi ei denton stau ruasseivel concernent la plazza vacanta. Actualmein lavurien dus plevons substituts ella pleiv.
Sin ina tscherca pli liunga sesanfla ferton era la pleiv Avras-Farera. «Tochen la stad 2027 lavura ina plevonessa substituta tier nus. Mo nus encurin schon daditg ina sligiaziun permanenta. Il problem ei che nus savein porscher mo ina plazza parziala da gnanc 50 %», ha la presidenta dalla pleiv Theres Men-Buchli fatg da saver. A liunga vesta stoppien ins perquei collaborar pli stretg denter las pleivs, gest sco igl ei previu da far ad Avras-Farera e Ziraun-Muntogna da Schons. Omisduas pleivs enqueran in plevon per la stad 2027 ed offeressen la pusseivladad da far in «job-sharing».
Munconza tochen 2032/33
Ch’ei drova ils proxims onns dapli collaboraziun denter las pleivs, quei ha era il decan dalla Baselgia evangelica reformada dil Grischun Thomas Müller-Weigl detg arisguard la munconza da persunal: «El Grischun dat ei aunc biaras pleivs pli pintgas cun pensums parzials. Che mintgina ha in agen plevon ni plevonessa, ei buca pli realistic.» Tut tenor stoppien ins era reparter las lavurs sin autras persunas sco diacons. Pertgei per ils proxims onns tochen 2032/33 seigi ei vinavon da quintar cun ina munconza da plevons e plevonessas, cunzun era cunquei che la generaziun dil «babyboom» mondi plaun plaunet en pensiun. Sco mesira hagien ins perquei era augmentau la limita da vegliadetgna per in engaschi fix sin 70 onns.
La Baselgia evangelica reformada dil Grischun quenta denton puspei cun dapli novs plevons e plevonessas. Dapi dus onns ei igl access alla professiun per academichers ed academicras aunc inaga vegniu simplificaus. Da niev tonscha numnadamein da ver in bachelor per far il program da studi per daventar plevon cul num «Quest». Quel cuoza treis tochen quater onns. «Quella midada ha caschunau in augment da students. In effect semuossa denton pér en in pèr onns», ha Thomas Müller-Weigl detg.
Da far ina prognosa a liunga vesta seigi denton era per auters motivs grev. Las baselgias reformadas dumbran numnadamein adina pli paucs commembers. Perquei sappi ins buc, cons plevons ch’ei drovi insumma aunc en tschun ni diesch onns. Clar seigi denton: «Ils proxims onns ei la munconza considerabla.»
«Ei fuss ina biala lavur»
Che la munconza da plevons ha in connex cul digren dils commembers, ha era Amanda Beeli da Sagogn constatau: «Ils davos 30 onns eis ei semidau fetg. La glieud viva en in moda pli e pli individualisada, ha buca pli aschi in interess ed extrescha perquei ord la Baselgia.» Ch’ei hagi silsuenter era dameins plevons aspirants, seigi ina consequenza logica. Per ella eis ei denton era clar che la lavur sco tala, ei buc in motiv per la munconza: «Ei fuss ina biala lavur. Cunzun sch’ins sa praticar sco a Sagogn igl uffeci persuls cun tut sias facettas. Esser plevon munta numnadamein buca mo da far priedi. Ins lavura cun giuven e vegl, pastorescha, instruescha e fa era l’administraziun.»
La pleiv Sagogn-Laax-Falera sa dil reminent aunc sperar da saver occupar aunc uonn sia plazza vacanta. «Igl october vegn in candidat aunc a sepresentar e far priedi», ha Amanda Beeli schau saver. E schiglioc anfla forsa baul ni tard in plevon-midacarriera ina via en Surselva.
Gust da leger dapli?