In che lingua clappast tü tia documainta da votaziun?
Per las votaziun dal pövel dals 27 settember haun tuot las votantas e votants cun dret da vuscher clappo lur documainta e cedlas da votaziun. Scha s’ho il dret da vuscher in Engiadin’Ota d’eira que quista vouta ün paquet da pais; eir cun pais da lingua. La FMR ho dumando zieva, cu cha la documainta putera vain elavureda e cu ch’ella chatta la via tar las votantas e votants.
Aunz votaziuns a l’urna clappa mincha votanta e votant sia documainta e cedlas per posta in chesa. Tuot tenor scha’s tratta da votaziuns federelas, chantunelas u regiunelas (vair box) vain quella scritta da l’administraziun pertucheda. Illa busta da la Regiun da Malögia per la votaziun dals 27 settember es aint eir üna missiva in connex cul provedimaint da sandet in Engiadin’Ota. Già cha nu figürescha üngün impressum classic, scu uschigliö tar publicaziuns, es gnieu sü la dumanda cu precis cha quist cudaschet da passa 38 paginas es gnieu realiso?
Da la consultaziun a la missiva
Al cumanzamaint dal proceder sto il speditur, in quist cas l’instituziun da dret public, la Sanadura. Il cuntgnieu da la missiva es gnieu consulto ed elavuro dal cussagl administrativ. Il büro da comunicaziun da la Sanadura ho alura miss a disposiziun la versiun da stampa inclus il design al secretariat da la regiun. Que constatescha Jenny Kollmar. La mnedra dal secretariat da la Regiun Malögia es gnida incumbenzeda dad organiser tuot ils pass da la traducziun, stamparia e distribuziun per la regiun cun 12 vschinaunchas.
Da la missiva a la traducziun
La missiva chi riva aint il secretariat da la Regiun Malögia es tenor ella la versiun pronta per la stampa e per tudas-ch. Per cha quella possa gnir tramissa ad ura in quella vschinauncha cha minchüna e minchün ho sias scrittüras, drouva que ouravaunt aunch’üna versiun putera per la Regiun Malögia. Mincha votanta u votant po indicher tar sia chanzlia cumünela in chenüna da las trais linguas chantunelas ch’ella vuless gnir infurmeda avaunt üna votaziun. I’l cas da l’Engiadin’Ota haun 510 votantas e votants dit cha vessan gugent la documainta per rumauntsch. La versiun tudas-cha vo dimena illa traducziun putera.
Üna traducziun da 38 paginas
Per Jenny Kollmar es il pü important cha detta üna buna coordinaziun traunter tuot las persunas invoutas. Cha’l squitsch saja pel solit grand a reguard tegner aint ils termins. La pü granda sfida saja tenor ella cha tuot il proceder saja bain armoniso, cha be uscheja chatta la documainta la via a temp fin tar las vschinaunchas. Aint in quist proceder es que alura eir da fer quint cul temp cha drouva per la traducziun. I’l cas da la broschüra da la Sanadura ho la traducziun druvo pochs dis, niauncha ün’eivna, scu cha pera. Que es be pussibel pervi cha la Regiun Malögia lavura cun üna traductura cun experienza da passa 50 ans illa lavur da traducziun. Cha quella hegia già tradüt ledschas e texts giuridics u administrativs pel chantun Grischun e per la Confederaziun.
Da la traducziun illa chartera
La traducziun finela es steda a disposiziun al cumanzamaint d’avuost ed es gnida surdeda insembel culla versiun tudas-cha a la stamparia per la producziun da var 9 540 töchs per tudas-ch e 510 puters, scu cha’l secretariat conferma. La stamparia ho alura tramiss la documainta directamaing a las chanzlias cumünelas chi daun inavaunt a la votantas e votants in seguit. A La Punt Chamues-ch vain p.ex. tramiss tuot per tudas-ch e cha detta pochas dumandas per versiuns rumauntschas, uschè sün dumanda tar la chanzlia. E la chanzlia da S-chanf ho p.ex. tramiss 175 exemplers puters e 365 tudas-chs.
Il pais da las bustas
Scha s’es votanta u votant p.ex. a San Murezzan – chi ho güst eir elecziuns a l’urna al listess di – alura es la busta steda plain stichieu. L’organisatura dad ün tel cudaschet nun ho be dad esser in stret barat cun tuot ils posts chi güdan a realiser. Ella stu eir esser bain organiseda: Aunz cha las bustas plachan aint illas charteras d’Engiadin’Ota vain realiso ün proceder chi do bgera lavur; lavur da la consultaziun dad üna missiva, sur la planisaziun, la traducziun fin tar la distribuziun.
Il paquet illa Regiun Malögia:
Sch’üna votanta u ün votant ho fat la schelta da clapper sia documainta e cedlas per rumauntsch, alura guarda il paquet our quista vouta uschè:
Federel: Per las votaziuns davart l’Iniziativa da neutralited e l’Iniziativa d’alimentaziun es il speditur la Confederaziun. La documainta es per rumauntsch grischun e las cedlas sun trilinguas.
Chantunel: A livel chantunel vegn vuscho davart il dret da vuscher cun 16 ans. La documainta es scritta per rumauntsch grischun e las cedlas sun trilinguas.
Regiunel: Per la Regiun Malögia as chatta illa busta la missiva davart quatter cunvegnas da prestaziun in connex cul provedimaint da sandet in Engiadin’Ota in lingua putera. Las cedlas sun bilinguas: tudas-ch e puter.
Cumünel: A cas cha do üna votaziun u elecziun a l’urna in üna vschinauncha, alura vegnan la documainta e las cedlas tramissas illa lingua schelta da las votantas ed ils votants. (ab/fmr)
Gust da leger dapli?