Las bumbas sin maisa

En noss dachasa explodeschan adina puspè bumbas. Bumbas repartan resti e termagls en l’entira chombra d’uffants. Bumbas fan or dad ina charplina in conflict senza fin. E dacurt siglientan las bumbas perfin sin nossa maisa-cuschina, però per cletg be bumbas ludicas. En il gieu «Bombbusters» èsi numnadamain da neutralisar bumbas, e cler, sche quai na gartegia betg … boom!

Da pachetar ora l’emprima giada il gieu sun jau stada in pau trumpada: Jau aveva spetgà zangas, cabels ed alarms. Enstagl hai jau be chattà ina massa cartinas cun malegià si cabels e cifras. Suenter curt mument èsi però stà cler ch’i na dovra betg glischinas e sirenas per in grond divertiment. Igl è stà da cumbinar e tschertgar sin basa da paucs indizis tranter las atgnas cartulinas e las zuppadas dals congiugaders pèrins da cabels blaus cun las medemas cifras. Sche quai è gartegià, èn quels cabels vegnids tagliads e scuvrids. Sche betg, è l’explosiun da la bumba adina vegnida pli datiers. E paupra, sch’ins ha tschernì in cabel cotschen tar in vischin … boom!

«Bombbusters» è in gieu cooperativ per duas fin tschintg persunas a partir da diesch onns. Era sch’il gieu da l’interpresa Pegasus è illustrà cun figuras gnoccas da comic, n’è el betg mo in gieu be per uffants, il cuntrari. Cun missiuns numeradas vegn il gieu adina pli grev, uschia che er ina runda da persunas creschidas po dar «Bombbusters». E sch’ins ha dà ina missiun, na vul quai betg dir ch’ins na po betg anc ina giada dar quella missiun. La repartiziuns da las cartulinas e las cumbinaziuns sa midan trasora.

In grond plus da «Bombbusters», ch’è dal reminent il Gieu da l’onn 2025,  è ch’ins na sto betg gia enconuscher l’entira instrucziun avant che giugar. Las emprimas missiuns decleran pass per pass tut las reglas. Sch’ina dispita explodescha tar nus a chasa, vegn «Bombbusters» ussa sin maisa e neutralisescha il conflict.