Marseiler è elegida cun 245 vuschs

Il suveran da la vischnanca Bravuogn Filisur ha elegì questa dumengia Ruth Leu Marseiler (61) sco nova presidenta. Ella è stada la suletta candidata ed ha fatg stgars 75 % da las vuschs valaivlas, vul dir 245 da 328. En tut èn 368 cedels da votar vegnids inoltrads, 40 èn stads vits u nunvalaivels. La participaziun a la votaziun muntava a 54,44 %. Il 1. da schaner succeda Ruth Leu Marseiler al president partent Luzi C. Schutz en uffizi per la legislatura da 2027 fin 2029.

«Jau sun motivada e plain fidanza»

Sco che Ruth Leu Marseiler ha ditg envers RTR dumengia suenter l’elecziun, saja ella fitg cuntenta cun il resultat: «Malgrà ch’jau hai annunzià mia candidatura pir dacurt, hai jau survegnì bleras vuschs. Quai ma fa plaschair e mussa la confidenza d’ina gronda part da la glieud.» La farmaceuta ch’è domiciliada a Bravuogn Filisur pir dapi l’onn passà aveva annunzià sia candidatura be duas emnas avant las elecziuns. Sco ch’ella ha fatg a savair, saja il presidi dentant gia pli ditg in tema: «Jau sun ma fatschentada gia la primavaira cun in’eventuala candidatura, hai dentant decis da spetgar, sch’i dettia candidatas u candidats indigens. Per mai èsi damai stà in process pli lung che be quellas duas emnas.» Ussa sa legria ella dentant sin quella nova sfida, savend ch’i saja d’emprender inqual chaussa nova. «Ma jau sun motivada e plain fidanza ch’i reussescha», uschia la presidenta elegida.

Ulteriuras elecziuns l’october

Ruth Leu Marseiler na sa dal reminent anc betg, cun tgi ch’ella vegn a lavurar a partir dal 2027 en suprastanza. Sco il president Luzi C. Schutz han er ils ulteriurs suprastants desistì da candidar per in’ulteriura legislatura. L’elecziun da la suprastanza è ils 25 d’october 2026. Sis candidatas e candidats han gia annunzià lur candidatura per ils quatter sezs d’occupar.