Martin Capeder ei il niev president
Martin Capeder da Duin ei vegnius eligius ier dumengia cun in resultat excellent sco niev president communal dad Ilanz/Glion. Da 1144 vuschs valeivlas ha Martin Capeder recaltgau 88 %, quei ein 1011 vuschs.
Il resultat ei clars e fa buca surstar perquei che Martin Capeder ei staus il sulet candidat pil presidi da vischnaunca dad Ilanz/Glion. En discuors cun la FMR di Martin Capeder ch’el hagi buca stuiu far gronda reclama per sia candidatura. «Era sche jeu havess denton giu concurrenza, saiel jeu buca, sche jeu havess menau in grond cumbat electoral.» En ina democrazia s’audi la concurrenza tier las elecziuns sco il caschiel sils macaruns. «Jeu persunalmein havess beneventau d’haver empau concurrenza. Quei havess dau empau veta a quella elecziun.» Che varga 88 % dallas electuras ed electurs hagien susteniu el detti curascha. El surprendi bugen il presidi communal, di Martin Capeder.
Substituziun ha dau il stausch
L’entschatta digl onn 2026 ha Martin Capeder sco vicepresident da vischnaunca substituiu il president actual Marcus Beer. Enteifer quels dus meins ha Martin Capeder survegniu plascher digl uffeci. Quei fuffergnadi hagi propi fatg gust sin dapli, ha il nieveligiu president detg en in discuors cun la FMR avon ils 9 da settember. «Jeu crei ch’ei seigi il dretg mument, cun mia vegliadetgna, da prender uss quella decisiun. Ed jeu sai dir ch’igl interess pil menaschi ed il funcziunament dalla vischnaunca ha fatg a mi dapli gust da candidar che forsa dad ir ella publicitad a far in plaid.»
Projects e la tgira dalla cuminonza
La vischnaunca dad Ilanz/Glion ha plirs projects impurtonts che ston vegnir liquidai il proxim temps. Quei ein la planisaziun locala, la revisiun dalla constituziun communala e la planisaziun digl areal Maissen per numnar mo treis projects. Pil niev president communal Martin Capeder drovan tut quels temas in accumpignament intensiv. «La planisaziun locala stuein nus accelerar aschi fetg sco pusseivel per che vischinas e vischins che vulan baghegiar survegnien puspei ina segirtad da saver realisar lur projects en nossa vischnaunca.» Il medem vala era per la revisiun dalla constituziun communala. «Persunalmein sperel jeu ch’ei detti buca memia grondas midadas, mo decider decida naturalmein il suveran dad Ilanz/Glion.» Ensemen cun sia suprastonza communala vul il niev president ir vinavon pass per pass.
Scrinari, scolast da skis e politicher
Martin Capeder (49) ei carschius si a Castrisch. El ei bab da treis affons carschi e viva dapi 25 onns a Duin. El lavura sco scrinari ed igl unviern inscuntrav’ins el entochen dacheu ella mondura dalla scola da skis Lumnezia. Dapi varga 20 onns dat Martin Capeder lecziuns d’aissa ed ha er menau la scola da skis. Naven dil 2009 tochen la fusiun da 2014, ha Martin Capeder presidiau la vischnaunca da Duin. Silsuenter eis el staus commember dil parlament dad Ilanz/Glion e dapi igl 1. da schaner 2023 fa el part dalla suprastonza communala. Ellas elecziuns dil 2025 ei il politicher senza partida vegnius reeligius cul meglier resultat dil gremi. Dapi uonn eis el vicepresident da vischnaunca. (fmr/mg)
Gust da leger dapli?