Tschernü la cuntinuaziun
Il cumün da Zernez vain guvernà la prosma legislatura dal listess gremi sco fin uossa. Tant il president sco eir la suprastanza in uffizi sun gnüts reelets. Eir tschels gremis da l’administraziun cumünala sun occupats cumplettamaing davo il prüm scrutin.
«Tuot in tuot: fich cuntaint!» Quai disch il vegl e nouv president cumünal da Zernez davo l’elecziun dals gremis cumünals (guarda eir boxa). Domenic Toutsch ha surgni 477 vuschs pro l’elecziun dal presidi ed es cun quellas gnü reelet cun üna quota da 81,1 % in seis post. Fadri Guler, l’unic cuntercandidat dal president in uffizi, ha surgni 95 vuschs. Las 16 vuschs restantas sun idas a singulas persunas.
«Ün hom sulet nun es nüglia»
«Schi’s voul manar ün cumün, douvra üna tscherta legitimaziun», disch il president reelet a reguard la partecipaziun da 59 % pro l’elecziun dal presidi cumünal. «Üna partecipaziun uschè ota es ün bun signal.»
E plaschair til fetscha implü ch’eir tuot la suprastanza es gnüda reeletta. Gian Andri Godly ha surgni 447 vuschs, Armando Roner 439, Irma Tognini e Duosch Städler tuots duos 438, Simon Rohner 431 e Jürg Wirth 374. «Per mai esa important da pudair cuntinuar culla suprastanza ch’eu n’ha collavurà eir fin uossa», disch Domenic Toutsch. «Ün hom sulet nun es nüglia.» El surpigliarà al principi da l’on chi vain per la tschinchavla legislatura il timun dal cumün. Davo trais periodas d’uffizi avant la fusiun, presidiescha Domenic Toutsch uossa lura per la seguonda perioda eir il cumün fusiunà. Pel president reelet es illa prosma legislatura la revisiun da la planisaziun locala «d’importanza maximala», sco ch’el vaiva dit avant l’elecziun.
«Ingüna surpraisa» per Fadri Guler
Sainza success es la dumengia d’elecziun statta per Fadri Guler. Fingià avant quatter ons vaiva el candidà pel presidi cumünal – e sco quella jada ha’l fat eir quista jada plü pacas vuschs co Domenic Toutsch. «Quai nun es per mai ingüna surpraisa», disch Fadri Guler. El haja fat quint cun ün resultat in quistas dimensiuns. «Las elecziuns vegnan decisas d’üna gruppaziun lojala illa fracziun Zernez», constata’l. «Scha’l cumün füss plü grond, füss la situaziun differenta.»
Ch’el candidescha eir per chi detta insomma üna schelta – quai vaiva Fadri Guler dit fingià avant l’elecziun. «Ma eu crai cha a Zernez s’haja temma dal müdamaint, da drivir nouvas portas. Blera glieud ha displaschaivelmaing ün orizont massa stret in seis pensar», agiundscha’l davo quella. «Ma quist cumün es be üna pitschna aguoglia in tuot la Svizra.» Retrar da la politica, quai nu’s voul el. «In quatter ons suna darcheu quia.»
Fina lura restarà la regenza cumünala – resalv demischiuns inaspettadas o premadüras – la listessa sco i’ls ultims quatter ons.
Reoccupà tuot ils posts,
approvà üna nouva ledscha da sunteri
Sper il presidi cumünal e la suprastanza cumünala han las votantas e’ls votants da Zernez eir elet la cumischiun sindicatoria ed il cussagl da scoula pels prossems quatter ons:
Reelet illa cumischiun sindicatoria sun gnüts Flurina Bezzola cun 465 vuschs e Schimun Grass cun 458 vuschs. Sco nouvs rapreschantants dal gremi sun gnüts elets Thomas Höllriegl cun 409 vuschs e Fabian Denoth cun 390 vuschs.
Occupà cumplettamaing es eir il cussagl da scoula: Tanja di Tommaso es gnüda reeletta cun 295 vuschs, nouv lapro sun Cornelia Gantenbein (410 vuschs), Marchet Bonifazi (390 vuschs) e David Peter (288 vuschs). Il tschinchavel post dal gremi vain occupà dal suprastant respunsabel, quai es intant Jürg Wirth.
Approvà han las votantas e’ls votants da Zernez implü l’armonisaziun da las ledschas da sepultüra e sunteri dals oriunds cumüns in üna nouva ledscha cun 489 cunter 60 vuschs. (fmr/mst)
Gust da leger dapli?