«Nus savein buca controllar mintga plonta»

La sentenzia dalla Dertgira cantunala dil cantun Friburg ei buca stada tschelada al selvicultur Maurus Cavigelli. El ei responsabels per il revier forestal dallas vischnauncas da Laax, Sagogn e Falera ed era per igl uaul dalla vischnaunca da Schluein. In uaul che sesanfla en in territori turistic e ch’ei fermamein frequentaus da persunas per passatemps ni per encurir bulius ni per auters motivs.

«Nus savein secapescha buca controllar mintga plonta», gi Maurus Cavigelli. Da buca haver controllau la plonta ch’ei curdada il fenadur 2020 sin ina dunna e blessau quella grevamein, ha la Dertgira cantunala dil cantun Friburg renfatschau al selvicultur responsabel. La dertgira ha sco secunda instanza sentenziau el d’haver commess ina greva blessura corporala per negligientscha. E sco ei para vegn era la Dertgira federala a sefatschentar cun quei cass.

Ina senda instructiva

Detagls dalla disgrazia respectiv dalla sentenzia dalla dertgira san ins leger ella publicaziun «Wald und Holz» dall’Uniun dils possessurs d’uaul svizzers dil zercladur 2026. Tenor quella descripziun ei la disgrazia succedida en in’aschinumnada senda instructiva, leu nua ch’ei dat instrucziuns per la publicitad, en quei cass probablamein davart igl uaul. La dertgira fa valer, tenor igl artechel menziunau, ch’il revier forestal hagi giu l’incumbensa da controllar la senda instructiva e che quei revier hagi delegau la controlla al selvicultur: «Neu da quella incumbensa ha il selvicultur giu ina responsabladad viers las persunas che fan diever dalla senda.» E la dertgira vesa ina incumbensa giuridica pil selvicultur dad impedir la disgrazia.

Tenor las indicaziuns dalla uniun tetgala dils possessurs d’uaul circumscriva la dertgira ualti exact co ella vesa l’incumbensa da controlla dil selvicultur: «Ina controlla visuala e documentada silmeins ina ga per onn e suenter pli gronds stempraus.» Bein ei la dertgira dil meini che la pretensiun da controllar mintga singula plonta seigi exagerada. Ella vesa denton per necessari ch’ils loghens egl uaul che han ina certa infrastructura a disposiziun dalla publicitad, basegnien ina survigilonza pli severa.

Pli bugen ina plonta da memia

La plipart digl uaul grischun, numnadamein 85 %, ei en possess dallas vischnauncas. E quellas vischnauncas ein s’organisadas cun ils possessurs privats ella organisaziun Selva. Il meinafatschenta da Selva Alain Schmid ei secapescha era sefatschentaus cun quella sentenzia. «Impurtont ord nossa vesta ei ch’ei dat buc in’incumbensa da survigilonza per igl entir uaul.» Quei ei tenor Alain Schmid buca pusseivel dad ademplir el cantun Grischun cun sias grondas e spundivas surfatschas d’uaul cun nundumbreivlas sendas da viandar e vias d’uaul: «Mintga persuna astga en Svizra entrar egl uaul ed ella sto era esser pertscharta da certs prighels.» Il meinafatschenta da Selva fa attent alla schitgira actuala ni alla malsogna che pertucca ils fraissens che lain crescher quels prighels.

Sin fundament dalla sentenzia da Friburg cusseglia Selva tuttina a ses commembers da controllar pli sever leu nua che la publicitad fa diever dad infrastructura che sesanfla egl ni agl ur digl uaul. Seigi quei plazzas da giug, da grillar ni auter – Tenor la devisa dad Alain Schmid: «Pli bugen allontanar ina plonta da memia ch’ina da meins.» La Associaziun svizra dils possessurs d’uaul spera da sia vart che la Dertgira federala defineschi pli clar la responsabladad dils possessurs d’uaul.

Stedi vidlunder d’allontanar fraissens

Maurus Cavigelli e ses collaboraturs ein, sco era en auters reviers, stedi vidlunder d’allontanar fraissens malsauns e malsanetschs ed autras plontas predestinadas da curdar per tiara cul proxim stemprau. Che las rescas d’accident selain buca eliminar dil tut ha era el fatg persenn. Igl emprem d’uost 2026 ei ina gruppa da viandonts caminada duront in urezi sin la Via Lag Tiert ella vischinonza da Murschetg. Il stemprau ha dersch plirs pégns ed in viandont ei vegnius blessaus d’ina plonta. Consequenzas giuridicas ha quella disgrazia denton giu neginas.