Petiziun per mantener il mulin
Varga 350 persunas han suttascret ina petiziun per mantener il baghetg digl anteriur mulin che schai sigl Areal Maissen a Glion. Dacuort ha la vischnaunca Ilanz/Glion annunziau ch’ella vegli spazzar il mulin ch’ei vegnius baghegiaus avon 110 onns. Ina gruppa d’architects ed autras persunas emprovan d’impedir quei cun ina petiziun che vegn surdada ils proxims dis alla suprastonza communala dad Ilanz/Glion.
La vischnaunca dad Ilanz/Glion vul buca prender posiziun davart la petiziun per mantener l’anteriura «Neumühle» che schai sigl Areal Maissen alla Via dil Glogn gest visavi dil Migros vegl. Il president communal Marcus Beer ha rispundiu a scret alla FMR che la vischnaunca prendi negina posiziun avon che la petiziun seigi buca deponida tier la vischnaunca.
Mantener ina perdetga dil temps
La gruppa d’interess che ha lantschau la petiziun secumpona da Roland Meiler, Abigail Stoner, Selina Caderas, Adriana D’Inca, Philipp Imboden e Daniel Schneider. Quellas sis persunas vivan a Glion e contuorn. Igl architect Daniel Schneider da Luven di che lur finamira seigi da mantener il mulin baghegiaus igl onn 1916. «Nus constatein ch’il mulin da Glion ha in grond potenzial pil diever futur e pil svilup digl entir Areal Maissen. Il mulin savess esser in punct da gravitaziun per quei areal e rinforzar il caracter da quei quartier. Cheutras survegnessen ulteriurs baghetgs novs en quei quartier ina pli gronda qualitad.»
La damonda da spazzar
Il fevrer 2025 ha la populaziun dad Ilanz/Glion decidiu da cumprar il terren da baghegiar sigl Areal Maissen. Ei setracta d’ina surfatscha da 6329 meters quadrats. Sin quei areal stat era il Mulin da Glion. Cun in dretg da baghegiar ad in ni plirs investurs vul la vischnaunca possibilitar spazi commercial, da habitar e spazi public. Il zercladur 2026 ha la suprastonza communala approbau ina concurrenza d’investurs ed avon paucs dis ha la Repower SA sco possessura actuala dil Mulin inoltrau ina damonda per sanar igl edifeci da substanzas nuscheivlas sco asbest. La vischnaunca dad Ilanz/Glion ha publicau la spazzada dil baghetg suenter ch’igl asbest ei allontanaus. Il termin da protesta scada sonda proxima, ils 3 d’october. Ils iniziants dalla petiziun che vulan impedir la spazzada vulan surdar las suttascripziuns ils proxims dis.
Miraglia da crap natural
Ils petiziunaris ch’ein per gronda part architects discuoran d’in mulin vegl cun ina buna substanza da construcziun. Ils mirs seigien vegni construi avon 110 onns da Johann Neuwirth sco mirs da crap natural. Endadens hagi la casa ina sempla construcziun da lennaria. Las duas hallas egl intern sappien vegnir duvradas per differents scopos. Daniel Schneider di che las petiziunarias ed ils petiziunaris seigien perschuadi ch’ei fussi donn da spazzar il mulin enstagl da sanar ed integrar quel ella nova surbaghegiada sigl Areal Maissen.
Sustegn sco finamira
Ils iniziants dalla petiziun scrivan ch’els veglien buca impedir il svilup digl Areal Maissen ed eventuals projects da surbaghegiada. Lur finamira seigi da tschercar la discussiun culla vischnaunca e d’evaluar la pusseivladad da sviluppar igl Areal Maissen cun mantener il mulin. «Nies giavisch ei ch’igl Areal Maissen daventi in ferm quartier e ch’ei vegni buca semplamein baghegiau leu casas senza expressiun», di Daniel Schneider. La petiziun seigi il resultat d’ina procedura che hagi entschiet avon plirs onns entras differents impuls. Novs impuls hagi ei per exempel era dau alla occurrenza «Fueina da cultura», organisada avon paucs onns dalla cumissiun da cultura dad Ilanz/Glion. Ils auturs dalla petiziun hagien encurschiu ch’ils inputs arisguard il diever dil mulin da Glion maunchien ussa ella exposiziun publica dalla spazzada dil mulin e perquei hagi ins iniziau la petiziun.
Localitads per la giuventetgna
Ils petiziunaris han plans concrets per in diever futur pil mulin da Glion, inagada che quel fuss sanaus. Las salas grondas sepurschessien per in local per la giuventetgna, di igl architect Daniel Schneider. In’autra pusseivladad fuss ei da construir localitads per occurrenzas publicas en cumbinaziun cun in pign café, bar ni restaurant.
Il mulin dil Blumer
Il mulin da Glion ei vegnius baghegiaus igl onn 1916 da Johann Neuwirth da Sevgein. En siu artechel davart ils mulins da Signina, Pitasch, Luven e Duin (Calender Per Mintga Gi 2026) sebasa Flurin Caviezel da Castrisch al cudisch dil marcau da Glion da Christian Candreja. Leu stat ei scret che Johann Neuwirth hagi cumprau il sulom da baghegiar alla Via dil Glogn dalla vischnaunca burgheisa per in franc il meter quadrat. Pervia da munconza da successurs en famiglia hagi Johann Neuwirth vendiu siu mulin da garnezi ed ossa suenter ils 1930 a Melchior Blumer da Glaruna. Il «Melch», sco Blumer vegnevi numnaus da tuts a Glion, havevi in frar cun num Albert Blumer. Suenter la mort da Melchior Blumer ha il frar Albert cuntinuau cul mulin, engrondiu la purschida da products cun ina bubronda fructificonta cun num Proviva e cun differents products da cosmetica ch’el produceva en sia gronda casa a Vuorz. Il mulin e la furniziun da frinas ei denton restada l’existenza principala dad Albert Blumer entochen sia mort prematura. Suenter che la firma Lietha da Grüsch e Grüninger da Flums han menau il mulin aunc divers onns, ha la Aurax SA (pli tard Repower) cumprau l’immobilia dil mulin. Il Mulin da Glion ei vegnius numnaus sur decennis da biara glieud il mulin dil Blumer. (fmr/mg)
Gust da leger dapli?