«Ün’ultima perla ch’el ans ha amo regalà»

«Be per ün cuort mumaint» – uschea as nomna il nouv ed ultim album dal chantautur, artist multifari e pionier dal rock rumantsch Paulin Nuotclà barmör. Ün album particular in tuot ils reguards e chi vain publichà digitalmaing ils 11 november 2026, il di da seis 75avel anniversari. L’album cumpiglia 13 chanzuns – chanzuns per part popularas e per part dad oters interprets, chanzuns per part veglias e nouv registradas e chanzuns per part amo mai dudidas o publichadas.

E be per ün cuort mumaint – ma tant plü profuond – sun eir stattas las registraziuns da quist nouv album. Quellas han nempe gnü lö l’on passà dürant 24 uras e quai na in ün studio professiunal da musica, dimpersè tuottafat prüvà e famigliar illa stüva dal chantautur engiadinais a Susch. La producziun ha surtut il chantautur tuatschin, Pascal Gamboni (49).

Aventüra musicala unica

«Quai es stat ün’experienza da bellezza. Alch dal plü bel ch’eu n’ha dudi in mia vita.» Uschea resümescha ün Pascal Gamboni evidaintamaing commoss e grat per quist’aventüra musicala unica ch’el ha pudü passantar la stà passada dürant 24 uras insembel cul «grond» Paulin Nuotclà. E cha Paulin Nuotclà nun haja mai dovrà daplü co duos jadas per registrar üna chanzun, accentuescha il producent da l’album.

Ch’el haja impustüt adüna resenti üna gronda fiduzcha e cordialità da Paulin Nuotclà invers sia persuna. Tant dürant las registraziuns, dürant las qualas el haja pudü dvantar – eir scha be per ün cuort mumaint – üna perdütta da sia persuna e tuot seis esser artistic, sco eir lura il temp davopro fin pro sia mort in mai da quist on. «Meis grond giavüsch d’eira insè cha Paulin possa tegner amo in man sia platta. Il temp per quai nun ha bastü displaschaivelmaing. Ed uossa ch’el nun es plü quia, realisescha pür che gronda furtüna ch’eu n’ha insomma gnü!»

Nüglia nu sto, tuot chi po

Cumanzà vaiva tuot avant raduond duos ons cun üna visita a Susch a prüma vista plütöst casuala, sco cha Pascal Gamboni quinta. El d’eira quella jada da viadi per ün concert in Engiadina e Paulin Nuotclà güsta darcheu tuornà a chasa davo esser stat a l’ospidal. «Eu vuless finir giò ün pêr chosas, far uorden cun mi’art», as regorda Pascal Gamboni als pleds d’ün stanguel, ma viv Paulin Nuotclà chi ha plünavant remarchà  ch’el vess dal rest a cas amo ün pêr chanzuns ch’el nun haja amo mai publichà.

«Eu n’ha savü cha per el nun esa plü realistic d’ir in ün studio. E cunquai ch’eu registresch mia musica tuot svessa, n’haja fat la proposta da gnir üna jada speravia pro el cun ün pêr microfons e registrar las chanzuns simplamaing pro el a chasa.» Chi saja stat üna proposta sainza sforz e sainza ün concept concret, declera Pascal Gamboni. El e Paulin Nuotclà hajan fat giò quella jada cha, scha’l resultat vess da satisfar, schi cha lura detta alch landroura. E scha na, schi chi laschan simplamaing stara.

Il resultat tils ha para satisfat ed our da 24 uras registraziuns haja dat ün album cun vegls e nouvs suns e tuns da Paulin Nuotclà chantond a gualiv oura precis uschea sco ch’el es a blers in uraglia. Davent da chanzuns popularas sco «Giodim in quella val» e «Sch’eu füss ’na randulina», sur «Ferm tabac» da Men Rauch ed «Il cumün in silenzi» da Tumasch Dolf e Peider Lansel, a cumposiziuns veglias nouv registradas sco «Eu t’n’ha jent», «Star quia», o «Dasper il mar», infin apunta a nouvas chanzuns amo mai registradas o dudidas: «Amo plü ingiò» e «Grüeziland». Duos chanzuns chi resplendan da manü l’orma critica da Paulin Nuotclà fin in seis ultims dis.

L’album «Be per ün cuort mumaint» cuntegna implü però eir ün’ulteriura truvaglia, la chanzun «Spranza». L’ultima chanzun scritta da Paulin Nuotclà e registrada dürant ün discuors da telefon be cuort temp avant sia mort. Üna chanzun chi fa pel giallina, cun ün Paulin Nuotclà reflettond e ponderond, a la quala i’s parduna la qualità da tun plütöst mediocra. «Pro quista chanzun ha ün collega da mai filtrà la vusch da Paulin ed eu til n’ha lura accumpagnà da nouv culla ghitarra», tradischa Pascal Gamboni. 

Ün ultim regal

Ed uschea savess il chantautur tuatschin – chi fa daspö raduond 35 ons fingià musica, ma chi ha scuvert tant la musica rumantscha, sco eir quella da Paulin Nuotclà pür plü tard in sia vita – quintar amo üna pruna anecdotas da bellezza. Sco per exaimpel la tschaina ch’el ha pudü passantar insembel cun Paulin Nuotclà. «El ha parti cun mai seis damangiar», s’algorda Pascal Gamboni surriond da la scena cur cha Paulin Nuotclà ha preparà sainza grondas pretaisas la tschaina cun agüd da la boxa da spitex chi s-choda il damangiar. «El d’eira üna persuna da cour, fich quieta ed averta. Eu am sentiva fich dachasa pro Paulin e vaiva il sentimaint sco scha nus duos füssan stats amis fingià blerun plü lönch.»

E s’inclegia cha fat impreschiun haja Paulin Nuotclà surtuot musicalmaing. Na be, ma eir malgrà ch’el nu d’eira plü uschè bain in chomma davo divers mals e malatias i’ls ultims ons. «In sia vusch s’haja dudi ün’intera vita. A mai han quellas 24 uras fat enormamaing impreschiun. Subit cur cha Paulin pigliaiva in man la ghitarra e chantaiva, d’eira el i’l mumaint. E quai a möd ourdvart simpel ed al listess mumaint extrem profuond. Ün’experienza ch’eu n’ha fat fich d’inrar cun otras musicistas e musicists.»

Üna qualità ch’el tschercha dal rest eir per si’aigna musica. «Meis böt da vita es da far ün bel di precis uschè ün album sco quist. Quai tuna simpel, ma quai nun esa insomma na», constatescha Pascal Gamboni e tradischa inchantà ch’üna particularità da Paulin Nuotclà haja lura eir el surtut per sai svessa sco musicist: «Daspö l’inscunter cun Paulin n’haja fabrichà aint – eir scha intant be live – pro trais da mias chanzuns ün orgel da bocca.»

Paulin Nuotclà viva dimena inavant. Saja quai illa memoria da tuottas e tuots chi til han cugnuschü, in tuot sias ouvras artisticas, melodias e chanzuns, illa musica dad otras interpretas ed interprets e bainbod eir amo in fuorma da seis plü nouv ed ultim album. «Eu sun simplamaing cuntaint per Paulin e sia musica. Ed uossa sun eu natüralmaing be buonder da l’effet cha quella ha sün tuot quellas e quels chi tilla taidlan. A mai haja toc a tuotta via immens», conclüda Pascal Gamboni maniond per finir cha quist album sarà «ün dals bels albums rumantschs. Ün’ultima perla ch’el ans ha amo regalà, che furtüna!».