La tundeida da 300 nursas

Siva digl 2003 ò la Tundeida a Savognin aint igl meis d’otgover igl sies post fix aint igl calender d’arranschamaints. La Tundeida è er siva passa dus decennis l’attracziun turistica ainten la regiun da vacanzas da Surses e sonda passada è chegl sa musso danovamaintg. Gio allas 10.30 era la plazza Grava a Savognin ple tgi angal occupada e per lung dalla veia spitgivan tschents e tschents persungas sen las vers 300 nursas.

Tar la Tundeida èn ellas las protagonistas, u per deir uscheia per en de igls gronds «stars». Scu gio tar las davosas 23 ediziuns è er igl tonder las nursas sto igl punct culminont a Grava anmez Savognin. Igl è alloura er sa verifitgia tgi igl om digl Tessin tg’ò tundia las nursas tgapescha igl sies mastier, tg’el ò en agen anschign e la rutina mantga er betg. Strousch tschintg minutas ò el gia per tonder ena nursa. D’ena nursa dattigl digl reminent tranter 3 anfignen 5 kilos langa. La langa-nursa gist chella è stada igl 2003 la raschung tgi Lucia Netzer-Peduzzi ò igl 2003 scu inizianta principala dalla Tundeida lia mussar tge valour e quant custevel tgi chel product è.

En bung pêr

An discurs cu ples digls 40 expositours ed expositouras digls products multifars è sa verifitgia tgi visitaders e visitadras on  er cumpro las tgossas fatgas venalas dalla Tundeida. Naturalmaintg tgi da cumprar davigl blers products da nursa, products regiunals fatgs a tgesa, fitg bela roba da lenn e la collecziun d’artetgels da langa vess betg savia esser pi vasta. A parteir dallas 14.30 è nia pi quiet tgi anc tranter las 10.00 e las 13.00. Luvro bagn on igl antier de igls affars tg’on purschia da magler e da bever. Er an chella tgossa è sto pussebel da sa lascher eir bagn cun tratgas da tgern-nursa u cun spezialitads indigenas.

La gliout è bagn neida er chest onn per vaseir las nursas ed er las tgoras, ma er per star an cumpagneia e galdeir varsaquantas belas ouras, gist cun uscheia en de dad ôr. En de tg’ò eneda daple confirmo tgi agricultura e turissem èn e restan en bung pêr. 

Igl nov president fò ena bilantscha positiva

Per l’organisaziun dalla Tundeida segna l’Uniun purila Alvra cun anc oters partenaris digl turissem, dall’economia e dalla gastronomia. President digl comite d’organisaziun è da nov igl pour da Savognin Flavio Guetg. El ò surpiglia chel uffezi d’Otmar Netzer, el tg’è igls davos 12 onns sto parsoura digl comite d’organisaziun dalla Tundeida.

Scu tgi Flavio Guetg ò detg anvers la FMR schea igl domber digls stands cun 40 stands aint igl rom digls davos onns. El è sa tgapescha sa musso ple tgi angal cuntaint cun esser agl li passa 2500 persungas. El dei tgi la gronda part digls visitaders e dallas visitadras vignan gio sen las 10.30 per gio esser segl post cura tgi las nursas vignan oragiu da Son Mitgel a Naloz per sa render agl plaz da festa a Grava. Cun pacas excepziuns dereivan tots igls expositours e las expositouras da Surmeir u schiglio digl Grischun Central, ò detg igl nov president digl comite d’organisaziun dalla Tundeida.

Do an îgl è tgi igls stands eran repartias pi bagn, igl era avonda spazi, ed igl plaz da fiera pareva pi lung, chegl tg’è er sto bung cun esser schi blera gliout per veia sonda passada a Grava a Savognin. Flavio Guetg ò punctuo:  «Ia fatsch propi ena bilantscha positiva cun esser igl interess per l’occurrenza sto immens grond, la gliout neir an rotscha ed igls expositours ed expositouras cuntaints».

Igl gioven pour da Savognin ò er piglia peda per l’egn u l’oter discurs, el ò gia la survista dall’occurrenza e cun bunga raschung dastgea piglier ancunter resungs plaschevels da tottas varts.