200 solistas e solists digl entir mund

Il Cup mundial dalla Confederaziun internaziunala dils accordeonists vegn arranschaus mintg’onn. El ha liug alternontamein en in’autra tiara. Ils davos onns eis el vegnius organisaus a Bijeljina en Bosnia-Erzegovina, a Castelfidardo ell’Italia ed a Sarajevo en Bosnia-Erzegovina. Igl uost 2026 ei Astana en Kasachstan stau il liug hospitont. Leu ei lu era vegniu decidiu ch’il proxim Cup mundial hagi liug en Svizra. La federaziun internaziunala ha surdau la concurrenza ad accordeon.ch, la Federaziun d’accordeonistas ed accordeonists dalla Svizra. Lezza ei sedecidida d’arranschar la concurrenza a Mustér e quei dils 14 entochen ils 19 da settember 2027. «Quei Cup mundial ha gia giu liug pliras ga en Svizra, la davosa ga avon tschun onns a Zofingen», di Flavio Murer che vegn tgamunar il comité d’organisaziun local a Mustér. Il Cup mundial ei aschidadir in campiunadi mundial.

Buca l’emprema concurrenza

Che l’associaziun svizra organisescha igl 80avel Cup mundial dallas concurrenzas da solo d’accordeon a Mustér ha plirs motivs. El vitg claustral ha giu liug la Fiasta d’accordeon dalla Svizra Orientala igl onn 2006 ed igl onn 2016 la Fiasta federala d’accordeon. Las duas fiastas ein vegnidas arranschadas dall’Uniun da harmonicas Cadi. L’organisaziun e las pusseivladads cun in tschuppel localitads adattadas per las concurrenzas han imponiu accordeon.ch. Per quei motiv ha l’organisaziun federala contactau il president dil comité d’organisaziun da lezzas duas fiastas, Flavio Murer, per sondar las pusseivladads da surprender quei Cup mundial. Damai che l’Uniun da harmonicas Cadi ei inactiva il mument, ei lu sedau la caschun da procurar l’organisaziun dalla fiasta el liug entras La Culturella che vegn medemamein presidiada da Flavio Murer. «La fiasta sco tala vegn organisada dalla Confederaziun internaziunala dils accordeonists (CIA) en collaboraziun cun accordeon.ch. A Mustér ei La Culturella responsabla pil menaschi da fiasta. Ella fa quei cun sustegn da gidontras e gidonters voluntaris», di Flavio Murer.

Quater motivs per Mustér

Per la presidenta d’accordeon.ch, Yvonne Glur-Troxler, plaidan quater motivs per l’organisaziun da quei Cup mundial a Mustér: «Igl ei igl 80avel Cup mundial e la Svizra ei stada confundatura dalla federaziun internaziunala. Il secund argument ei che Mustér porscha idealas relaziuns sco liug pign ella muntogna per in tal arranschament. Nus vegnin ad haver in’jamna sco silla carta da panorama. En cumparegliaziun cull’occurrenza ad Astana en in marcau grond, ei Mustér in liug pign che porscha la caschun da s’entupar. Cun Flavio Murer havein nus ina persuna ch’organisescha fetg bein e leutier vegn il romontsch. Sco la scena d’accordeon ei il romontsch ina minoritad. Cheutras sedat ina biala simbiosa.»

200 solistas e solists

A quei Cup mundial da strusch in onn a Mustér spetga Flavio Murer in tschuppel glieud digl entir mund: «Nus quintein cun 200 solistas e solists. Leutier vegnan parents, accumpignaders ni scolastas e scolasts da musica. Tut en tut vegnan denter 600 e 700 persunas ad esser duront rodund in’jamna a Mustér.» Sco Yvonne Glur-Troxler di, vegnan rodund 30 naziuns ad esser representadas a Mustér. Per part stoppien las musicistas ed ils musicists passar ina selecziun en lur tiara per astgar separticipar al Cup mundial.  La Culturella ei responsabla pils fatgs organisatoris locals. «En emprema lingia fagein nus la punt denter la federaziun svizra ed ils purschiders locals. Sedrun Mustér Turissem procura per las pusseivladads da pernottaziun», di Flavio Murer. Denter 30 e 40 persunas voluntarias ein engaschadas duront quell’jamna da concurrenza a Mustér. Gia sincerau lur agid han pliras commembras e plirs commembers dalla federaziun svizra: «Ei drova era glieud che sa ils lungatgs dallas participontas e dils participonts che derivan digl entir mund», declara Flavio Murer.

Dapli ch’ina concurrenza

Il Cup mundial d’accordeon ei dapli ch’ina concurrenza. En differentas categorias emprovan accordeonistas ed accordeonists da mussar la megliera prestaziun. Quei succeda en categorias naven da juniors entochen a categorias da divertiment virtuosas. Parallelamein spel Cup mundial seraduna il congress dalla CIA a Mustér a sia radunonza generala dils delegai. Aschia ei Mustér duront rodund in’jamna liug da concurrenza dall’elita musicala, da lavur internaziunala dallas federaziuns d’accordeon e leutier liug da sentupada dil «mund digl accordeon». Sco quei che Flavio Murer di, dispona la Svizra d’ina scena d’accordeon engaschada: «Ella ei presenta sin plaun internaziunal, buc il davos entras persunas da musica qualificadas sco Ruedi Marty. Dapi onns eis el in commember tschercau dalla giuria internaziunala.» Dalla Svizra vegnan rodund diesch solistas e solists a sepresentar a Mustér. Per Flavio Murer eis ei per quei motiv clar: «A Mustér ha la scena d’accordeon svizra la schanza da sepresentar sco hospitonta ed ambassadura musicala.»