Dapli cuors denter Mustér e Biasca

Gliendisdis, ils 5 d’october 2026 ha l’Uniun Pro Lucmagn salvau sia radunonza generala el restaurant sil hospezi da S. Maria. Ils organs dall’uniun – la suprastonza e la cumissiun tecnica – han dau plaid e fatg davart il menaschi digl unviern passau. Leutier ha ei dau novas dil survetsch dil traffic public da Biasca a Mustér ed il cuntrari, iniziaus dalla Pro Lucmagn. «La stad 2027 vegn quei survetsch extendius pil temps da miez zercladur entochen igl october. Da niev dat ei sis enstagl da quater colligiaziuns directas cun auto da posta sul Lucmagn», di il president dalla Pro Lucmagn, Martin Candinas. Da miez zercladur entochen la fin d’uost ein quellas sis colligiaziuns directas garantidas mintga di, schiglioc mintgamai sonda e dumengia ed ils firaus. Quei survetsch lubescha allas passaschieras ed als passaschiers in retuorn pli tard suentermiezdi e la sera.

Cuntents cul menaschi

Per la 26avla ga ei il Pass Lucmagn staus aviarts igl unviern vargau. «La Pro Lucmagn ei fetg cuntenta cul menaschi», puntuescha Martin Candinas. En siu rapport annual sebasa el sil rapport dalla cumissiun tecnica e constatescha: «Las empremas nevadas pli grondas ein succedidas pér miez fevrer. La cuvrida da neiv disfavoreivla e ferms vents han denton tuttina aunc menau tier entginas situaziuns delicatas da lavinas ella secunda mesadad digl unviern. Consequentamein ha il pass stuiu vegnir serraus duront totalmein nov dis il fevrer e mars.» Suenter in’activitad da dudisch onns sco president dalla Pro Lucmagn seretila Martin Candinas l’auter onn alla radunonza generala.

Rumiu neiv duront 882 uras

Ils cuosts pil menaschi d’unviern 2025/26 al Pass Lucmagn han contonschiu la summa da 669 378 francs. Las expensas ein aschia levamein sur la media da biars onns, mo claramein sut il preventiv. Las maschinas da rumir neiv ein stada en funcziun duront 882 uras, rodund 90 uras pli ditg ch’igl unviern vargau. «Era uonn han las pintgas quantitads da neiv sco era las investiziuns fatgas giu in effect positiv sils cuosts», constatescha Martin Candinas. En siu rapport annual revegn il president al giubileum da 25 onns ch’ei vegnius festivaus alla radunonza dils commembers igl 1. d‘october 2025 cun in’excursiun a Pian Segno e sil mir da fermada. Sin quellas duas staziuns han ils presents retschiert ina survesta dallas investiziuns fatgas ella prolungaziun dalla gallaria e dallas petgas da siglientar da lavinas sco era dallas lavurs previdas el rom dil project d’uaul dalla vart dil sid.

Investiziuns sepagan

Sco quei che la cumissiun tecnica dalla Pro Lucmagn constatescha en siu rapport annual han las investiziuns fatgas ils davos onns in effect positiv sil menaschi d’unviern. En special menziunescha ella la prolungaziun dalla gallaria dil Scopi sco era las petgas per siglientar lavinas. La stad 2025 ein las empremas lavurs en connex cul project forestal dalla vart dil sid succedidas. «Quei project da gronda dimensiun a liunga vesta migliura decisivamein la situaziun dil prighel da lavinas dalla vart dil sid. Era duront il 26avel unviern havein nus saviu rimnar experientschas impurtontas pil menaschi d’unviern dil Pass Lucmagn. L’avertura d’unviern vegn levgiada surtut grazia allas grondas investiziuns ella segirtad,» constatescha la cumissiun tecnica.

Petgas, lavineras e plontinas

Dalla vart tessinesa vegn priu differentas mesiras ils proxims onns el territori dalla via denter Acquacalda e Pian Segno. In’emprema etappa cun duas petgas da siglientar automaticamein lavinas sco era lavineras sur quellas – ei realisada. Sin ina surfatscha da rodund 70 hectaras preveda il project era nov kilometers lavineras e travs e 4000 bucs. Ei duei vegnir plantau 20 000 plontinas da pégn, schiember ni larisch. Las lavurs vid quei project cuozan aunc 14 onns.