Mussar bandiera per Laax

A Laax vesi ins buc aschi biaras bandieras dalla vischnaunca, di la menadra digl Uffeci da baghegiar da Laax, Simona Camathias. «En egl cheu a Laax dat quei per exempel igl 1. d’uost cura che biara glieud decorescha las casas ni ils curtgins cullas bandieras. Ins vesa stedi bandieras svizras e grischunas, mo buca sgarscheivel biaras dalla vischnaunca da Laax.» Tenor la menadra digl Uffeci da baghegiar seigi quei era stau in motiv da porscher la bandiera cul logo dil pèsch che ri ch’ei detti dapi entgins onns.

Pli baul tschera brutta ed oz cun bucca da rir

«Biars han aunc la bandiera cul logo vegl dil pèsch culla tschera brutta», di Simona Camathias. «Nus havein da miu saver era mai fatg acziuns da vendita cul niev logo.» Sco quei che la FMR ha rapportau ils 11 da december 2025 ha la vischnaunca da Laax fatg avon prest nov onns ina midada discreta vid gl’emblem. La cumissiun cantunala d’uoppens ha da lezzas uras saviu lubir senza conclus dalla regenza ch’il glischun da Laax fa ina bucca da rir.

Per indigens e hosps

«Nus havein survegniu differentas damondas d’indigens e da hosps che han casas da vacanzas cheu a Laax che vulessen cumprar ina bandiera», di la menadra digl uffeci communal da construcziun. Quei seigi lu era stau ina raschun ch’ins hagi fatg igl appel per mirar sch’ei detti aunc autras interessentas ni interessents. «Entochen oz havein nus 15 empustaziuns d’indigens e da hosps. Nus prendein las empustaziuns che vegnan entochen la fin d’october 2026.» Tenor la publicaziun el Fegl Ufficial Surselva san ins suenter quei termin buca pli empustar la bandiera tier la vischnaunca.

Mussar plascher dil vitg

Tier las bandieras da Laax che vegnan empustadas ussa setracta ei d’ina versiun stampada. La bandiera cuosta 85 francs ed ha ina mesira dad 1.20 x 1.20 meters. Ella dispona d’ina carabina per pender la bandiera vid in mast. La bandiera sa denton era vegnir pendida vid la fatschada dalla casa culas carabinas aschuntadas. Simona Camathias di che tenor l’experientscha dalla vischnaunca tegni ina bandiera igl entir onn sut l’aura circa dus onns. «Nus essan dall’idea che tgi che decorescha sia casa ni siu curtgin cun ina bandiera da Laax, dil Grischun ni dalla Svizra muossa cheutras il plascher vid nies vitg. Da leu enneu sun jeu optimista che nus survegnin aunc numerusas empustaziuns entochen la fin da quei meins.»

Decoraziun pil centenari

Igl onn 2028 festivescha il vitg da Laax il centenari da 600 onns libertad. In mument per trer si ina bandiera dil vitg cul niev logo? Quei fussi ina fetg buna idea, di Simona Camathias. «Mo cun l’acziun dad ussa havein nus en sesez buc intenziunau d’embellir il vitg per la fiasta da 600 onns libertad.» Mo la decoraziun culla bandiera seigi secapescha fetg beinvegnida era per la fiasta.