Cantar en gida da cantar bein

La suprastonza nova dil District da cant Surselva ch’ei en uffeci dapi il mars 2025 vul rinforzar la scolaziun da vusch e la cuminonza denter cantaduras e cantadurs, mo lu era dar la caschun a dirigentas e dirigents dils chors sursilvans da seperfecziunar e d’emprender d’enconuscher nova litteratura da cant. Il fevrer ha giu liug il Di da cant a Trun cun varga 100 cantaduras e cantadurs. Quei di ei staus in success e vegn repetius il fevrer 2027. Questa stad ha il district da cant envidau ils affons ad in’jamna da cant ed ussa ils 24 d’october ein cantaduras e cantadurs e dirigentas e dirigents envidai ad in cuors da cant a Glion ella claustra dallas soras dominicanas.

Con impurtont ei cantar en?

Quei proxim cuors pratic muossa sin basa dils siat elements fundamentals dalla scolaziun da vusch (respiraziun, energetisaziun etc.), co ins sa integrar quels ella lavur cul chor: «Nus havein giu il grond cletg da gudignar la cantadura professiunala Salome Cavegn pil cuors da cant», di Flavia Walder da Sevgein, la dirigenta e suprastonta dil district da cant. Salome Cavegn vegn a dar a nus fetg biaras informaziuns sur dalla vusch e co tractar la vusch.» Ei seigi per exempel impurtont da cantar en e da preparar la vusch pigl exercezi ni pil concert, di Flavia Walder. In’auter aspect seigi la lavur vid las canzuns cullas vuschs ch’ein cantadas en.

Tips e trics

Sco Flavia Walder di, vegn’ins a luvrar cun litteratura enconuschenta e cun exempels concrets. In exempel savessi esser cura che las sopranistas ston cantar tuns fetg aults ni cura ch’ils bassists han difficultads. Ni cura ch’ei intuneschi semplamein buc. In’autra tematica seigi il trer flad duront il cantar. «Duront quei avonmiezdi da cuors survegnin nus tips e trics ed explicaziuns da Salome Cavegn.» Cun exempels da repertori ed in cantar en communabel van las participontas ed ils participonts alla tscherca da vias co applicar la scolaziun da vusch directamein en la lavur dad emprova ed el repertori.

In cuors per tuttas e tuts

«Igl ei buc aschia che nos chors havessen in deficit da scolaziun enviers auters chors», di Flavia Walder, organisatura dil cuors da cant. «Il cuors da cant per cantadurs e dirigentas  duei plidentar tuttas cantaduras e cantadurs, era quels che legian buca notas e contan tuttina en nos chors.» Il cuors da cant en claustra seigi in luvratori da cant. Ins sappi era far damondas e discutar culla menadra dil cuors, di Flavia Walder el discuors culla FMR.

In abo da cant

ll district da cant e l’Uniun ceciliana Surselva porschan sper il cuors da cantar dils 24 d’october gia dapi dus onns ina scolaziun individuala per cantaduras e cantadurs dils chors sursilvans. Quella vegn procurada dalla cantadura professiunala Letizia Scherrer en collaboraziun culla Scola da musica Surselva. La scolaziun individuala cuntegn ina lecziun generala cugl entir chor. Ellas emprovas sissu dat ei in’instrucziun da cant da 20 minutas cun mintga commembra ni commember interessau. Quella scolaziun ch’ei vegnida frequentada entochen dacheu da denter 10 e 15 chors vegn numnaus «abo da cant». Sin basa privata e sin agen quen sa tgi che vul  frequentar ulteriuras uras da cant tier Letizia Scherrer ni tier sias u ses collegas dalla Scola da musica Surselva.