Il project pil «White Pillow Park» s’avonza

Ella zona da mistregn Grüneck el vest da Glion vul la «White Pillow Park SA» realisar in parc da freestyle per skiunzas e snowboarders. «Nus lein porscher in’infrastructura a sportistas e sportists da professiun, mo era ad ina e scadin, pign e grond», di Lukas Hammer. Ensemen cun Mitch Buvoli ha el fundau la societad acziunara e dapi rodund dus onns e miez lavuran els vid lur idea. White Pillow vul dir ton sco plumatsch alv.

In parc per ina e scadin

Il baghetg cun ina altezia d’entochen 38 meters cumpeglia differentas pistas artificialas d’exercezi. Ina part ei era cumbinada cun in grond plumatsch per setschentar. «Il parc vegn ad esser interessants pils sportists da professiun surtut duront la stad ed igl atun. Per che nossa purschida corrispundi lu era als basegns dad els, havein nus era involviu ils megliers dil freestyle da skis e snowboard dalla Svizra en nossa planisaziun», puntuescha Lukas Hammer ch’ei dapi biars onns secundindigen a Sursaissa. Il venderdis e la sonda vargada han ils iniziants dil project ch’ei calculaus cun cuosts da rodund quater milliuns francs orientau la populaziun. Quei ei vegniu fatg en localitads dalla claustra a Glion. A quell’orientaziun ei era il niev president communal d’Ilanz/Glion, Martin Capeder, separticipaus, aschi bein sco Anja Beivi dil Program San Gottardo.

Freestyle, padel e halla

El tgierp dall’infrastructura cun differentas pistas externas duei ei dar localitads sanitaras e gardarobas, mo era ina gronda halla. «Apparentamein ei ina tala in basegns cheu a Glion. En quella direcziun essan nus vegni plidentai da pliras varts», di Lukas Hammer. Mo ei duei era dar in plaz da padel, ina sort da tennis sin in plaz pli pign. «Cheu a Glion dat ei gia ina tal’infrastructura, mo buc endadens», constatescha Lukas Hammer. Il tgierp enteifer il baghetg duei vegnir concepius sin duas alzadas e haver ina surfatscha da 45 sin 24 meters.

Il terren stat a disposiziun

Il «White Pillow Park» duei vegnir realisaus ella zona da mistregn Grüneck gest spel baghetg d’Aldi. Sco Lukas Hammer di, sappi il parc era far diever da parcadis dalla stizun vischinonta, ina part realiseschi la societad denton era sezza. Il baghetg duei vegnir construius cun fundaments da betun, silsuenter cun cumponentas d’itschal en cumbinaziun cun lenn.

«Il terren s’auda per ina buna part ad in privat, ina part ei en possess dalla vischnaunca. Cun omisduas partidas essan nus gia secunvegnidas. Il terren vegn mess a disposiziun a nus el dretg da baghegiar ils proxims diesch onns cull’opziun d’ina prolungaziun per tschun onns, pia en tut 15 onns», di Lukas Hammer e declara: «Avon che nus realisein il parc vegnin nus a deponer ina cauziun che cuarcla ils cuosts per spazzar e dismetter il parc. Con aulta che quella summa ei, vegn ei pér a semussar en connex cun offertas concretas.» Cun quella cauziun vegli la societad garantir ina dismessa digl object, seigi per in motiv ni l’auter. La «White Pillow Park SA» duei lu era esser responsabla pil menaschi dil parc.

Sustegn dil Program San Gottardo

Il Program San Gottardo ha gia sincerau ina contribuziun maximala da 50 000 francs per la projectaziun digl object. «Ord nossa vesta ei quei parc ina purschida unica per l’entira regiun San Gottardo, gie, el ei schizun unics ell’entira Europa», di Anja Beivi dil Program San Gottardo. Tgei contribuziun che vegn eventualmein messa a disposiziun per la realisaziun dil parc ei aunc buca clar. «La giunta dil Program San Gottardo vegn a giudicar quei sin fundament dalla damonda che vegn lu dils iniziants. Igl ei pusseivel ch’ei dat in emprest senza tscheins», declara Anja Beivi.

Signal positiv dalla vischnaunca

La primavera passada han ils iniziants dil parc preinformau il parlament communal d’Ilanz/Glion davart il project da quei parc. «Igl ei en mintga cass in interessant project. Jeu hai l’impressiun ch’il parlament communal vesi quei semegliontamein», di Martin Capeder che vegn a presidiar la vischnaunca d’Ilanz/Glion naven dil schaner 2027. Sin fundament dalla dimensiun dil parc seigi ina revisiun parziala dalla planisaziun locala per quei areal necessaria.» Martin Capeder fa denton era allusiun dil maletg dil vitg: «Quei baghetg da gronda dimensiun pertucca secapescha ils vitgs da Schnaus e Strada.»

Decisiuns communalas

Avon che la realisaziun seigi insumma tema, drova ei ussa duas impurtontas decisiuns dalla vischnaunca d’Ilanz/Glion. Ils 28 d’october 2026 decida il parlament davart ina contribuziun communala da 350 000 francs al parc. Passa quella fatschenta las tortas, duei la revisiun parziala dalla planisaziun locala suandar. Tenor Lukas Hammer eis ei pusseivel che quella vegn suttamessa al parlament gia il fevrer vegnent e ch’ella vegn lu spert era avon il pievel, probabel gia l’entschatta zercladur 2027. La revisiun ei necessari perquei ch’il parc ha autras dimensiuns che quellas ch’ein ussa fixadas en quella zona da mistregn.

«Quei mument che nus havein tuttas lubientschas vegnin nus a realisar il parc. Sche tut va bein, savess el vegnir en funcziun gia la fin dalla primavera 2028», di Lukas Hammer e puntuescha: «Dalla vart dils iniziants ei la finanziaziun digl project segirada. Culs investurs ein precontracts gia vegni fatgs.» Sper lavurs da projectaziun da detagl vegn luvrau il mument era vid detagls pertuccont la persistenza dil material dil baghetg e dil menaschi. Ina damonda per reveder la planisaziun locala en quei territori ei gia vegnida inoltrada per preexaminaziun agl Uffeci pil svilup dil spazi dil cantun Grischun.

In dacasa per miezmiur e miezutschi?

Ferton ch’ils sportists duein sedivertir sillas pistas artificialas dil parc, savess ei dar veta permanenta egl intern dil baghetg. El «clutger» da quel savess Lukas Hammer s’imaginar ch’ei savess dar spazi per miezmiur e miezutschi: «Secapescha che quei astga buca restrenscher il menaschi da sport, mo quella pusseivladad ei buca nunrealistica. Quei ei buc in motiv per la propaganda da nies project, mobein manegiau sincer en favur dalla protecziun da quels animalets.»