«Nus vessan ànc savieu vender daple»

«Mama, sco vignan las rusnas agl caschiel?», ampeara igl pintg Tobby an l’istorgia satirica digl madem num da Kurt Tucholsky digls 1928. Bunameing tschient ons ple tard â la Caschareia Sur (Sennerei Sufers) stuieu far la madema dumonda. Parve dad egn sbagl tecnic durànt la producziùn veva igl caschiel numnadameing survagnieu blearas pintgas rusnas d’aria. Partutgieu eara egna producziùn dad egn mains, an que cass radund 360 magnucas. Par la caschareia e’gl sto cler ca quest sbagl mùnti c’igl caschiel setgi betga vagnir vandieu sco usito.

Igl caschiel vean controlo

Anzemen cun otg otras caschareias fa la Caschareia Sur part da l’organisaziùn da sorts «Bündner Bergkäse». La colavuraziùn cun l’organisaziùn da sorts segi fetg impurtànta par la caschareia, cun quegl c’ella garanteschi egna vendita fixa, declara igl magnafatschenda a president da l’assoziaziùn da la Caschareia Sur, Markus Meuli. Las caschareias produtgeschan igl caschiel da muntogna suainter egn rezept fix. «Tgi ca cumpra an stizùn igl noss caschiel, spetga adigna la madema qualitad», declara Curdin Giger, igl magnafatschenda da l’organisaziùn da sorts «Bündner Bergkäse».

Par garantir quella qualitad vegian els schon sur dezenis egn reglamaint da producziùn ad egna controla da qualitad ca vigni fatg da dus expearts independents, explitgescha igl Curdin Giger anavànt. Taxada vean betga me la qualitad da la «pasta» digl caschiel, mobagn ear aspects ca partutgan la pareta. Sch’igl caschiel passa igl test da qualitad, vean el vandieu anavànt sut la marca «Bündner Bergkäse».

Tut an tut vegian els pocs cass – mo zirca 1,7% – ca passian betga la controla da qualitad, explitgescha igl Curdin Giger. La qualitad segi an general fetg òlta. «Scha egn caschiel passa betga la controla, san las caschareias prender anavos igl caschiel sut tscheartas cundiziùns a vender el an lur atgnas stizùns, mo alura semplameing betga sut igl num «Bündner Bergkäse», gi el.

Sbagl tecnic da producziùn

Ear els vegian schon gieu singuls caschiels ca vegian betga passo igl test da qualitad, quegl fetschi semplameing part da la producziùn da caschiel, gi igl Markus Meuli. «C’egna producziùn d’egn antier mains e ussa stada partutgeada â da far cun egn sbagl tecnic an la nossa nova caschareia», explitgescha el anavànt. Davent digls 2024 satgata la Caschareia Sur an egn bietg nov cun indrezs novs. Durànt pumpar giou la pona an las furmas segi vagnieu tier par sbagl aria. Quegl vegi alura a la fegn do las fegnas rusnas d’aria agl caschiel. Ussa segian els landervei da catar or exact noua a co c’igl sbagl cun l’aria segi capito, declara igl Markus Meuli.

Megna blearas rusnas, dantànt megna pocs puncts

Las rusnas d’aria ân dantànt par cletg gieu nign efect segl gust digl caschiel. «Igl caschiel â passo tut igls tests oter ca quel partutgànt las rusnas», gi igl Markus Meuli. Igl caschiel vigni valito suainter egn reglamaint da taxaziùn a survigni tenor quel puncts pigls diferaints criteris, sco par exaimpel la crusta, la savur near igl gust, explitgescha igl Curdin Giger da l’organisaziùn da sorts. Tenor igl reglamaint da taxaziùn segian las rusnas d’aria (aschinumnadas «fehlerhafte Lufteinschlüsse») egn sbagl da qualitad rancunaschieu ca caschùna la declassificaziùn, declara el. Ascheia e’gl sto cler c’igl caschiel setgi betga vagnir vandieu anavànt sco «Bündner Bergkäse». 

Par regla sa la caschareia vender igl caschiel ca passa betga igl test da qualitad an la sia stizùn a Sur. «Mo nus fussan mena rivos da vender tàntas magnucas an la nossa stizùn», declara igl Markus Meuli. Ascheia â la caschareia stuieu ancurir egna otra veia da vender las 360 magnucas. «Nus levan an nigns cass c’igl bùn caschiel stotgi vagnir dischmess», gi el.

Vandieu online igl caschiel

Qua â la caschareia samess anzemen cun la Gebana SA, egna firma par la vendita directa ad online da products da bio. La Caschareia Sur veva schon ple bòld luvro anzemen cun Gebana a vandieu igl sieus caschiel tgora sen quella veia. La firma â ear adigna puspe agl sortimaint products ca coraspundan betga a las normas, mo en tutegna da bùna qualitad.

«Nus vagn bugent sustanieu la Caschareia Sur da vender igl caschiel», cunfirmescha la Madeleine Jung c’e raspunsabla tier la Gebana par la purschida «Schweizweit ab Hof». Ella vegi gieu contacto la Caschareia Sur avànt tres ons cura c’ella tschartgeava caschiel tgora par igl sortimaint da Gebana. «Ascheia ancunaschevan nus schon la caschareia a la bùna qualitad digls products», explitgescha ella anavànt. Cun quegl c’igl eara cler c’igl satracti dad egn sbagl ca vegi nign efect segl gust, vegian els bugent colavuro. L’intenziùn eara dad evitar c’igl caschiel stotgi vagnir dischmess.

Anzemen ân la Gebana a la caschareia alura dezidieu igl prezi a c’igl caschiel vigni vandieu sco measa magnuca. Dalùnga ear’igl alura pussevel da reservar igl «Sufner Bergkäse» cun las pintgas maclas sur la pagina d’internet da Gebana. Plenavànt â Gebana ànc tarmess a sia cliantela egna newsletter par far atent sen l’acziùn.

720 pacets an tres gis

«Nus vessan ànc savieu vender daple», raspunda igl Markus Meuli a la dumonda, sch’els vegian savieu vender tut las magnucas. Dalùnga vegian els gieu anzemen las pustaziùns c’en vagnidas surtut da la Svizra Orientala. Ussa nav’igl peia me ple par la logistica da pacatar a tarmeter var 720 measas magnucas caschiel davent da Sur. «Gebana â tarmess a nus igl material da pacatar. Egna antiera paleta e quegl sto», raquenta igl Markus Meuli. Ascheia ân tres parsùnas da vendita sadrizo aint an la caschareia a Sur par tres gis agl satember ad ân pacato an egn pacatar. Ear la posta â stuieu vagnir infurmada oravànt da quella furniziùn extraordinaria ad e stada sen veia quels tres gis cun egn auto ple grànd plagn caschiel.

Nigna surpresa

«Nus vessan mai tartgieu ca nus rivagn da vender tut las magnucas», cunzeda igl Markus Meuli ad e surlivgieu ca la vendita â funcziuno aschi bagn. Ad ear la Madeleine Jung da la Gebana â plascher ca l’acziùn e stada egn suczess: «Nus eassan cuntaints ca las nossas cliaintas ad igls noss cliaints ân gieu egn tal interess ve da que caschiel.» Surstada segi ella dantànt betga. Gebana vegi schon gieu acziùns samagliàntas cun products da bùna qualitad mo cun pintgs «sbagls», declara ella anavànt: «Quellas acziùns ân par regla grànd suczess. Vetier vean c’igl caschiel da muntogna e egn product fetg popular.»

A Sur a la dumonda davart las rusnas agl caschiel peia cato egna bùna fegn – graztga ad egna ideia pragmatica ad egna cliantela ca â betga mess megna bleara pesa sen las pintgas rusnas agl caschiel. Oter e quegl parancùnter an l’istorgia da Kurt Tucholsky. Qua escalescha la discussiùn davart las rusnas agl caschiel an egna maniera absurda. Igls carschieus c’amprovan da raspunder la dumonda inozainta digl unfànt sadaspetan tocen avànt dartgira.