«Per me esa greiv d’incler perche cha nus fains tuot quist»
L’INFRA vuless piglier per mauns la sanaziun da la plazza aviatica a Samedan – eir cun 38 milliuns francs raps publics. Ma ün recuors davart il dret da vuscher limitescha intaunt il spazi d’agir e finanziel da l’organisaziun purtedra. Impü critichescha la cumischiun sindicatoria da S-chanf la contabilited da quella. In l’intervista piglia Claudio Dietrich, il president da la Conferenza da la plazza aviatica, pusiziun davart quista situaziun.
«Nus vains ün indriz chi ho pütöst caracter da ruina.» Que ho constato Mario Cavigelli, il president da la cumischiun administrativa, tar l’ultima tschanteda da l’INFRA. Perque ho l’organisaziun purtedra da la plazza aviatica a Samedan eir pü e pü amortiso la valur da quella «ruina» i’l bilauntsch, dumando da la populaziun raps per refer in üna prüma etappa ils stabilimaints da la plazza aviatica e fat reservas per refer ünsocura eir la pista da la plazza aviatica.
Il resultat es ün bilauntsch negativ, üna bloccada giuridica e critica veementa davart il möd da gestiun e da contabilited (guarda eir boxa). Tar l’ultima tschanteda da la conferenza da la plazza aviatica ho il president Claudio Dietrich accentuo repetidamaing cha l’INFRA nun hegia debits. E cha dependa uossa tuot dal verdict dal Güdisch federel.
FMR: Tuot la planisaziun cha l’INFRA fo pel mumaint calculescha cun que cha’l Güdisch federel sbütta il recuors davart il dret da vuscher e legitimescha uscheja la finanziaziun publica pel proget da renovaziun planiso. Nun es que eir ün ris-ch, nu drouva eir ün «plan B»?
Claudio Dietrich: Ad es güst cha nus nu pudains der oura ils raps decis da la populaziun l’avuost 2025 aunz cha’l Güdisch federel nun ho decis. Nus essans persvas cha nus vains radschun e cha’l recuors vain sbütto dal Güdisch federel. Già il Güdisch superiur dal Grischun ho decis fich cler a favur da l’INFRA. Eir tuot ils advocats, cun quels cha nus vains discurrieu, sun da nos avis. Ma a la fin decida il Güdisch federel e zieva vzainsa. Nus vulessans esser pronts pel cas ch’el decida a nossa favur, per cha nus pudains zieva cumanzer cul proget da renovaziun. Per que stuvains fer ün büdschet chi calculescha cun quel scenari.
A pudess però esser ch’Els sun in ün an tuottüna illa listessa situaziun scu uossa. Vess El surpiglio il presidi da la Radunanza da la plazza aviatica, sch’El vess savieu che chi Al spetta quist an?
Eau speresch cha nus nun essans in ün an pü in quist lö, ma üna garanzia nu d’heja per que. Cur ch’eau d’he surpiglio il presidi as spettaiva cha culla decisiun dal Güdisch superiur saja tuot decis. Il recuors a Losanna nu d’eira auncha fat. Nus vains fat quint cun que cha que vo ün po pü svelt, cha’s po già fabricher uossa. Eau sun uossa daspö desch ans commember da la Conferenza da la plazza aviatica e gnieu dumando, sch’eau vuless fer quist, perque d’heja decis da güder a mner inavaunt quist proget.
La Conferenza da la plazza aviatica e la cumischiun sindicatoria da S-chanf – chi critichescha la gestiun da l’INFRA e’ls gremis respunsabels – haun vistas cumplettamaing cuntradictoricas sül stedi da l’INFRA. Es que üna dispütta d’interpretaziun da contabilited?
Per me esa greiv d’incler perche cha nus fains tuot quist. Tuot ils experts, quels chi lavuran per l’INFRA, ma eir externs chi haun da chefer culla contabilited, sun persvas cha nus lavurains correct. Perche cha la cumischiun sindicatoria da S-chanf preschainta mincha pêr eivnas nouvs imbüttamaints, quai nun inclegia. Scha que füss üna dispütta d’interpretaziun, as pudess dumander, schi füss sto necessari da fer quellas reservas cha vains fat per la sanaziun da la pista da la plazza aviatica. Ma quella dumanda nun ho üngüna influenza sülla liquidited. Cun u sainza quellas reservas: la plazza aviatica nun ho debits.
Ma ün quint negativ pretenda cha’s sto fer qualchosa.
Nus fains qualchosa. In quel mumaint cha la decisiun dal pövel dal 2025 aintra in vigur es la decisiun precedainta davart la plazza aviatica, quella dal 2017, glivreda. Zieva es il quint darcho in uorden.
Il s-chevd illa contabilited actuela, es que la consequenza da l’intschertezza giuridica pervi dal recuors davart il dret da vuscher?
Scu cha quella es preschanteda aint il bilauntsch, schi. Ma ad es fich important d’incler cha que nun exista üna surdebitaziun effectiva. Nus nu vains debits tar credituors e nus nu vains dabsögn da raps da las vschinaunchas per pajer debits. Que haun confermo tuots chi haun analiso nossas cifras. A’s tratta d’üna surdebitaziun da contabilited.
Taunt il recuors davart il dret da vuscher scu eir la cumischiun sindicatoria da S-chanf criticheschan cha nu’s so inua cha quels 6,5 milliuns francs, raps publics dal proget da renovaziun 2017 me realiso, sun rivos. Cha s’ho fat sbagls, que nu contesta neir na la Conferenza da la plazza aviatica?
Il rapport Wehrenberg (chi ho perscruto ed evaluo l’agir dals gremis da l’INFRA i’l proget da sanaziun melgratagio dal 2017 – remarcha redacziunela) ho musso cha nu s’ho fat tuot güst. Zieva la decisiun dal pövel l’an 2017 s’ho que cumanzo a planiser, a der oura raps per quel proget da renovaziun. Il problem d’eira alura cha’l proget vess custieu bger dapü cu antecipo. Perque s’ho que sbütto il proget 2017 e cumanzo a planiser ün nouv, quel dal 2025. Ma ils raps cha’s vaiva già investieu i’l proget 2017, quels sun davent. Las vschinaunchas nu clappan inavous quels raps.
Ma es que la dumanda centrela, scha’s clappa inavous quels raps u na? La pretaisa es cha’s stu s-chaffir transparenza davart l’ütilisaziun da quels.
Quels raps sun gnieus investieus illa planisaziun dal proget 2017, fich simpel. Eau nun incleg quella dumanda davart transparenza. Ad es fich transparent: Zieva cha s’ho investieu 6,5 milliuns francs s’ho que trat ün strich e dit: Quel proget 2017 as sto glivrer e cumanzer cun ün nouv.
Tenor El, tenor l’INFRA, nu drouva que ün’elavuraziun da quel proget melgratagio, dapü transparenza?
Na. Il rapport Wehrenberg ho constato chi nu do temas da relevanza penela e cha nu’s po fer respunsabel ad üngün pels raps dos oura i’l proget 2017. Perque ho l’INFRA decis già l’an 2024 da na pü fer ünguotta oter in quel reguard. E la populaziun ho decis da vulair cuntinuer cul proget 2025 e na cun quel dal 2017.
S’ho que tenor El trat las conclusiuns politicas güstas?
Schi, que vainsa fat. Ma tuot que cha’s fess impü, que custess eir dapü. E chi pajess que? Las vschinaunchas. Perque s’ho dit cha’s schmetta.
Bloccada giuridica e critica politica
Già daspö bundant ün an es l’INFRA confrunteda cun ün recuors davart il dret da vuscher: In avuost 2025 ho üna magiurited da la populaziun illas vschinaunchas purtedras decis da pajer 38 milliuns francs per ün nouv proget da sanaziun per la plazza aviatica a Samedan – ed al listess mumaint d’anuler l’agna decisiun populera da l’an 2017 per üna finanziaziun dad 8,5 milliuns francs ad ün proget da renovaziun mê realiso.
Traunter oter quella cumbinaziun – raps per ün nouv proget da renovaziun ed annullaziun dal proget precedaint sainza güstificaziun che cha s’ho fat culs raps publics da tel – critichescha Cornel Widmer in sieu recuors davart il dret da vuscher. Zieva cha’l Güdisch superiur dal Grischun ho refüso il recuors l’utuon 2025 ho l’anteriur commember da la cumischiun sindicatoria da l’INFRA recurrieu eir tar il Güdisch federel. Quel nun ho aunz decis illa chosa.
Il recurrent es eir commember da la cumischiun sindicatoria da S-chanf: Ed i’l nom da quel gremi ho Cornel Widmer annunzcho da ponderer ün plaunt cunter ils organs respunsabels da l’INFRA. Eir la cumischiun sindicatoria da S-chanf critichescha cha l’INFRA stöglia s-chaffir transparenza davart il proget da sanaziun na reuschieu – e cun que che ch’ella ho fat culs raps publics dal proget da sanaziun da l’an 2017.
La cumischiun sindicatoria da S-chanf pretenda cha vegnan sclaridas las respunsabilteds davart quel proget melgratagio ed ün’examinaziun independenta da la contabilited da l’INFRA. (fmr/mst)
Gust da leger dapli?