Radons duess neir navanto

Sonda passada ò gia li a Savognin an sala Grava la 64avla radunanza dalla Savognin Pendicularas SA. Markus Schröcksnadel, igl president digl cunsegl d’administraziun è sa musso cuntaint tgi alla radunanza generala eran preschaints 215 acziunaris ed acziunarias. All’antschatta dalla radunanza generala è el sa regurdo cun bels pleds a Leo Jeker, igl anteriour directour administrativ e commember digl cunsegl d’administraziun, tg’è mort avant en onn.

Tot oter tgi simplas relaziuns

Markus Schröcksnadel ò detg tgi cun mantger all’antschatta dalla staschung d’anviern 2025/26 a Radons la neiv naturala seia betg sto pussebel da scumanzar chella schi ideal. Dall’acziun da neiv a Radons cun scolars e scolaras, cun giasts e cun gastronoms seia el sto impressiuno. I sa verifitgescha tgi er schizont ainten en territori da skis da 1900 meters sur mar mantga adegna ple savens la neiv naturala. Realitad seia er tgi igl giast sa decidia adegna ple savens a curta vista per eir cun skis, chegl sen fundamaint dalla relaziun da neiv e dalla purscheida dallas pistas. Sto igl cass seia chegl gist tranter Nadal e Bumang. A parteir digl favrer vegia chegl sa mido ferm cun dar neiv e las relaziuns esser stadas bungas aint igl antier territori da skis.

Investiziuns da dus milliuns francs

Igl davos onn da gestiun ò la societad acziunara dallas pendicularas da Savognin fatg diversas investiziuns. Investia è nia ainten la siertad digl menaschi, ainten la franchezza dalla tecnica digls implants, scu er aint igl svilup persistent dall’infrastructura. Igl davos onn èn neidas fatgas investiziuns per ena somma da dus milliuns francs. L’investiziun gronda cun ena somma da passa en milliun francs è neia fatga per ramplazzar igl manaschamaint dalla soptgera da seis da Somtgant allas Martegnas digl onn 2000. Chella investiziun seia stada en term impurtant per la garanzeia a lunga vista digl travagl dalla soptgera da seis, ò menziuno Markus Schröcksnadel. Ultra da chegl èn neidas fatgas revisiuns pi grondas tar la telecabina da Tigignas a Somtgant e tigl runal Laritg.

Fasa d’examinaziun

Radons è en veir eldorado per eir cun skis, schi dat avonda neiv naturala. Gist chella mantga pero savens, uscheia tgi las relaziuns èn tot oter tgi idealas. Da chella realitad è er igl cunsegl d’administraziun da Savognin Pendicularas SA ple tgi pertschert. Tenor Markus Schröcksnadel ins seia vedlonder da dei annò d’examinar cun plessas organisaziuns, schi seia pussebel da far indrezs da far neiv a Radons. Vot deir, schi dess ansomma la lubientscha ed er scu tg’ins pudess finanztgier chella investiziun. Scu tgi Curdin Baltermia, igl directour tecnic dallas pendicularas, ò detg totga Radons tar ena planeira otalpina ancunaschainta per la sia varietad dalla cuntrada. Tar chella totgan schibagn spazis da veiver umids scu paleis otas scu er pros da muntogna sitgs cun bleras speztgas.

Anfignen oz vegian chels sclarimaints custo var 150 000 francs, ò menziuno Curdin Baltermia. Per navantar Radons seia da chintar cun investiziuns da 15 anfignen 20 milliuns francs. La dumonda dalla finanziaziun dall’annavaziun vigna tenor Markus Schröcksnadel a duvrar ses taimp. Ins seia er an contact cun igl cumegn da Surses. Per far investiziuns pi grondas vegn igl er a duvrar daple giasts e cunzont daple frequenzas. En zap ins vegia fatg an chella direcziun cun l’avertura digl anteriour Hotel Cube an en alloschamaint da giuventetna. Or digl mez dalla radunanza generala è er nia detg tgi fiss urgent da ramplazzar igl restorant da muntogna a Somtgant. Markus Schröcksnadel ò detg tgi da chella realitad ins seia pertschert, ma tgi la situaziun da finanzas lubescha simplamaintg betg da ramplazzar chel.

Bungs affars per la gastronomia

Igl retgav da menaschi digl davos onn da gestiun dalla societad acziunara monta a 9,43 milliuns francs. An cumparaziun cugl onn da gestiun precedent è chegl en regress da 0,7 %, vot dier exact 67 153 francs pi pac. Las antradas digl transport tar las pendicularas èn sa redutgeidas per 4 % sen en total da 6,5 milliuns francs. La sviouta laterala tar las pendicularas monta a 317 173 francs ed è per 7,1 % pi ota tgi anc igl onn avant. Cun en augmaint da 10,4 % ed en total da 2,52 milliuns francs è la sviouta tar la gastronomia s’augmentada igl onn da gestiun 2025/26 per ena bela cefra. L’ora magnifica è stada la raschung principala tgi gist las ustareias da muntogna dallas pendicularas on fatg miglers affars.