Scargada per part subvenziunada

«Tut en tut organisein nus duront in’jamna la scargada», di il pur da Fidaz Roman Niederberger. El ei schon dapi entgins onns responsabels per che vaccas e vadials da circa 16 menaschis purils arrivien mintgamai senza blessuras giu el vitg ed a Bargis.

Per uonn ei quella lavur schon fatga e gartegiada: La scargada dil Crap da Flem ei stada miez settember ed ha attratg rodund 4000 visitadras e visitaders.

Interess che crescha

Gl’interess per la scargada ei ils davos onns carschius permanentamein. Per cumparegliar: Gl’onn 2018 ein aunc 1500 aspectaturs vegni dumbrai, uss ei quella cefra pli che dublegiada. La scargada da Flem ei cunquei ina dallas scargadas grischunas cun il pli grond interess public.

Igl ei denton buca «mo» ina scargada. Vitier s’auda era in ensolver da purs a Bargis. Secapescha vegn era procurau per divertiment musical, menaschi da fiasta ed ei dat da veser in «live-stream» dil viadi giu dall’alp.

Purs vegnan remunerai

Ils purs ein involvi ferm, els han d’organisar, far tschupials e d’exequir ulteriuras lavurs. Sco quei che Roman Niederberger informescha, vegnien els perquei era remunerai per lur stentas supplementaras. «Il material vegn mess a disposiziun dil turissem a nus.» Totalmein seigien circa 100 gidonters e gidontras necessarias per che tut gartegi.

L’indemnisaziun dils purs confirma era Christoph Schmidt ch’ei president dall’organisaziun Flem Laax Falera Management SA (FLFM SA). En il budget da la FLFM SA – che vegn per la gronda part purtada dallas vischnauncas da Laax, Flem e Falera e dalla Arena Alva SA – ei la scargada budgetada cun circa 50 000 francs.

Jascha Schmid, il meinafatschenta dalla FLFM SA, explichescha la contribuziun: «La pli gronda part, circa 80 – 90 % da quels totalmein 50 000 francs vegn impundida per infrastructura, electricitad ed il servis dil bus da shuttle.»

Il rest dalla summa mondi alla puraglia: «Quei ein alla fin aunc circa 5000  – 10 000 francs che van als purs. Els drovan quella contribuziun per ils tschupials, transports relevants ed era pil diever dil terren.» Era la «chilbi» a Scheia cun tualettas ed infrastructura stoppi vegnir finanziada cun quei, aschia Jascha Schmid.

Senza ils purs fussi nunpusseivel

«Nus paghein mo las expensas per la lavur supplementara ch’ils purs han, perquei ch’igl ei in eveniment turistic. Ei setracta perquei dad ina indemnisaziun per lavurs concretas ed expensas supplementaras», di Jascha Schmid, e vinavon: «Ils purs e lur gidontras e gidonters ein indispensabels per quella occurrenza. Sch’ins stuess sez organisar ed inscenar in tal eveniment, lu fuss quei strusch da finanziar.»

Buca far deficits

«La finamira ei da vegnir ora schuber e buca da far deficits» di era il responsabel pur dalla scargada Roman Niederberger. «E tgei ch’ei era flot ei che nus astgein era salvar ils daners da nos stans a Bargis.» Mo cun quels daners organiseschien els lu per exempel ina fiasta pils gidonters. Gronds gudogns fetschien ils purs e las puras buca cun la scargada. Gest il far tschupials seigi ina lavur che drovi era bia temps, aschia Roman Niederberger.

Bien per omisduas varts

Sandro Michael, il meinafatschenta dall’Uniun purila grischuna vesa mo avantatgs, sche turissem ed agricultura collavurien. «Dad ina vart eis ei in bi segn che la glieud s’interessescha per la scargada e dall’autra vart eis ei era flot che quei drezza il focus sill’agricultura ed era sils products dallas alps.» Savens sappien las alps gest era vender lur caschiel ad ina tala occurrenza. «Quei ei da beneventar ed ina buna pusseivladad da far attents silla lavur impurtonta si ellas alps», aschia Sandro Michael.

Buca dapertut ton turissem

Tut las alps grischunas fetschien buc in event turistic ord la scargada. «Ei dat era loghens nua ch’igl ei plitost ruasseivel, mo cunzun en loghens turistics eis ei ina buna reclama per l’agricultura», admetta il meinafatschenta dall’Uniun purila grischuna e vinavon: «Igl ei era ina sfida per quels che han d’organisar, e perquei quetel jeu era en uorden, sch’ils purs vegnan susteni empau.»