Emprender da sepresentar

Igl atun sco la primavera dedichescha il gimnasi dalla claustra a Mustér mintgamai in’jamna a temas specials – vul dir ad in’jamna da focus. Quell’ei vegnida arranschada dils 5 entochen ils 9 d’october 2026. L’emprema classa ha giu il tema «Ad fontes» e la secunda film e foto. La tiarza classa ei vegnida spartida: Ina part ei sefatschentada dil romontsch, l’autra dil teater e la cumpetenza da sepresentar. La quarta classa ei seprofundada ell’etica e religiun, la tschunavla ella musica e la sisavla ei stada sin viadi ella Romandia ni ella regiun ladina dall’Italia. L’jamna da focus al gimnasi ha purschiu allas studentas ed als students l’occasiun da far novas experientschas (mira era box).

Vusch, articular e moviment

Schegie che l’jamna da focus dalla tiarza classa ei stada sut il motto «teater e cumpetenza da sepresentar», ei il teater vegnius alla cuorta. «En in’jamna eis ei strusch pusseivel da preparar in toc teater. Per quei motiv ein ils tschun dis da mia instrucziun sedrizzai cumpleinamein alla cumpetenza da sepresentar.» Quei di David Flepp ch’ei staus responsabels duront l’jamna da focus per la tiarza classa ensemen culla scolasta da classa Luise Camathias. L’jamna da focus cun «teater e cumpetenza da sepresentar» vegn arranschada al gimnasi dalla claustra a Mustér mintga dus onns. Sco pedagog da teater ed actur sa David Flepp tgei ch’ei impurtont per far ina buna pareta avon in publicum: «La preschientscha sco tala ei ina cumbinaziun dalla vusch, digl articular e dil moviment.» Ils exercezis ein succedi en classa ni el rom da gruppas pli pintgas, quei che ha funcziunau bein tenor David Flepp. El hagi empruau da laschar flessegiar en si’experientscha denter auter sin tribuna: «Las scolaras ed ils scolars han era astgau saver ch’jeu sun aunc adina nervus avon mintga presentaziun.»

Sesarver

El decuors dils tschun dis d’instrucziun dall’jamna da focus ei David Flepp seconcentraus denter auter sin in punct decisiv ella cumpetenza da sepresentar: «Quella classa cun 14 dels ei surtut linguisticamein fetg heterogena. La mesadad dallas scolaras e dils scolars ei vegnida en quella classa avon paucas jamnas. Quei ha buca fatg pli sempels il pensum ed en quei senn ei quei stau la gronda sfida da quels dis da focus.» Per quei motiv hagi ei era fatg da basegns da s’avischinar ina ed in a l’auter. Il medem mument denton era da sesarver. «Quei vul dir reducir retenientschas e bandunar la zona d’esser scolara ni scolar», constatescha David Flepp e manegia: «Ei semuossa pli e pli che las classas ein buc aschi ulivadas sco pli baul. Mintgina e mintgin ei auters e meritass bunamein in accumpignament individual.»

Sepresentar avon la classa

Per la fin dall’jamna da focus han las scolaras ed ils scolars giu il pensum da sepresentar avon la classa. Quei han ellas ed els fatg cun in agen text limitaus sin ina lunghezia da tschun minutas. Quei ha saviu succeder era en fuorma d’ina rema, in rap ni ina canzun. David Flepp ei cuntents cugl engaschament dallas scolaras e dils scolars e manegia: «En sesez fuss ei interessant da cuntinuar cun quei tema cullas medemas scolaras ed ils medems scolars en in onn ella 4. classa. Lu vesess ins il svilup ni tgei ch’ei restau da quei che nus havein empriu l’jamna vargada.»