Tants tgi manegian ple tgi angal bagn

An Surses è ena persunga fitg angascheda per la giuventetna e chegl è Adrian Ballat. Igl om uriund da Parsonz e sesent a Savognin è fitg innovativ. El è ena persunga cun fitg bungs contacts tigls giuvenils e scu suprastant digl cumegn da Surses magna el igl departamaint d’educaziun e da scola. Cun blera passiun segna Adrian Ballat er adegna per projects per la giuventetna e realisescha chels an collaboraziun cun mats e mattas e cun scolars e scolaras. Tranter oter ò el gia gronds marets tgi igl schinumno «pumptrack» a Savognin è nia realiso. S’angaschea è Adrian Ballat er per dar agl plaz da scola dalla nova scola a Savognin igl conturn adatto per scolars e scolaras. Cun els ed ellas ò el realiso hettas da salesch tgi dattan agl plaz da scola en maletg aparti ed èn accessiblas. Igl sies pi nov project è la construcziun digl nov bietg da giuventetna per Surses. Construia vign chel a Cunter, gist sot l’anterioura scola, detg pi concret sur igl implant da protecziun civila. Ainten chel sa catta igl local da giuventetna actual, igl local tg’è damai sutterran. Ultra da chegl vign er vetiers tgi igl implant da protecziun civila a Cunter è adegna puspe occupo, seia chegl digl militer u da camps da scola.

Blera lavour voluntaria

An blers discurs ed antops cun giuvenils e cun scolars e scolaras è igl project digl nov local da giuventetna adegna nia pi concret. Anvers la FMR ò Adrian Ballat detg tgi cun en program spezial per architectura vegian igls scolars e las scolaras fatg en plan scu tgi igl bietg da chel local da giuventetna savess veir or. Gio cun far chel plan seian igls giuvenils stos fitg angascheas e cunzont incantos da pudeir collaborar. Eneda tgi igl plan seia sto realiso ins vegia inoltro la dumonda da biagier agl cumegn da Surses ed er retschet ena rasposta positiva. Igl cumegn da Surses sustigna la realisaziun digl nov local da giuvenils cun ena somma da 25 000 francs, ò menziuno Adrian Ballat. En immens plascheir vegia el tgi igls giuvenils vegian anfignen ossa fatg fitg blera lavour voluntaria per chel project. En exaimpel seia igl fundamaint noua tgi igls elemaints digl object vignan montos.

Fitg bunga collaboraziun

Evident seia sto tgi per la construcziun digls elemaints da lenn digl nov bietg da giuventetna dovrigl er igl mang professiunal. Chel ins vegia catto cun la firma Uffer SA a Savognin. «Igl è singular tgi Enrico Uffer cun sies collaboratours è dalunga sto pront da fabritgier an sies luvratori igls elemaints per la construcziun digl nov local da giuventetna», ò punctuo Adrian Ballat.

Bel seia er tgi ples scolars e scolaras seian dalla parteida e sustignan tenor lour forzas la construcziun digls elemaints da lenn aint igl luvratori da producziun dalla Uffer SA. Da luvrar cun persungas digl rom scu Claudio Casparin ed Albert Netzer seia sa tgapescha fitg ampernevel e cunzont nizevel, dei Adrian Ballat. Razgeda è la lenna per la fabricaziun digls elemaints neida a Tinizong tar la Resurses. Igls scolars e las scolaras seian schizont loschs da contribueir lour part alla realisaziun da «lour» local da giuvenils.

Adrian Ballat dei tgi igl local actual seia adegna bagn occupo la mesemda sivamezde ed igl venderde dallas 18.00 anfignen allas 22.00. El seia er adegna preschaint, l’atmosfera seia semper ampernevla ed igls giuvenils gioldan da star an cumpagneia. Magari ins cuschigna an cuminanza, gis mantgan er betg tigl program ed er bungs discurs totgan vetiers.

Bler lod pigl grond sustign

Fitg angraztgevel ed er fitg incanto è Adrian Ballat dalla zont gronda bagnvuglientscha da blers affars e da bleras firmas da Surses anvers igl nov project albiert da giuventetna. Numerous affars vegian sustignia igl project finanzialmaintg cun ena donaziun pi gronda u pi pitschna, chegl tgi seia er igl cass da varsaquantas persungas privatas. Singulas firmas mettan a disposiziun gratuit material ed otras mettan betg a chint tot la lavour, ò accentuo Adrian Ballat. Er chegl tgi pertotga igl transport digls elemaints da Savognin a Cunter e la crana per montar chels seian dus interpresas indigena prontas da far chegl gratuit. Tot an tot chinta el cun costs da radond 60 000 francs, dei igl iniziant e promotour digl nov local da giuventetna per Surses.

Passa 30 elemaints da lenn

Chels deis vignan igls elemaints digl nov bietg da giuventetna construias tar la firma Uffer SA, isolos e fatg pronts pigl transport a Cunter. Claudio Casparin, igl manader da producziun dall’interpresa, ò detg tgi construia vigna igl bietg cun passa 30 elemaints da lenn. Igl bietg ò ena lunghezza da 12 meters, ena largezza da 6,5 meters ed igl punct igl pi ot digl tetg è 4,1 meters. Schinavant tgi l’ora lubescha vignan igls elemaints da lenn montos glindesde proxim. Er chel tgi pertotga l’infrastructura interna digl local on plessas firmas indigenas risguardo Adrian Ballat. El an mintga cass è fitg losch tgi per chel project è la simpateia schi gronda davart digls patrungs dalla interpresas, ma er digls scolars, las scolaras ed igls giuvenils.