«In engaschament da gronda valeta»

Dapi biars onns s’engascha il Project uaul da muntogna egl uaul a Mustér. Leu prestan voluntarias e voluntaris in engaschament en favur dalla persistenza digl uaul. Uonn ei quei stau il cass dils 4 entochen ils 17 d’october 2026. Sco il selvicultur da project dalla vischnaunca da Mustér, Damian Deplazes di, ein denter 15 e 20 persunas stadas engaschadas en quellas duas jamnas.

Sisum la Val Clavaniev

Las lavurs dil Project uaul da muntogna ein era succedidas uonn sut l’egida digl Uffeci forestal communal Mustér. El center digl engaschament ein lavurs da plantar plontas giuvnas staus. Per puder contonscher bein ils loghens da plantar ein terrassas vegnidas construidas ordavon. Sper las lavurs da plantar ein plontas giuvnas vegnidas tgiradas. Leutier ei vegniu construiu seivs da protecziun encunter donns dalla selvaschina. Sco il Project uaul da muntogna scriva en ina communicaziun als mieds da massa, ein tuttas lavurs succedidas cun instrucziun da menaders da project e da gruppas cun experientscha.

Procurar in uaul stabil

«La segirtad dalla populaziun e dall’infrastructura a Mustér dependa fetg digl uaul da protecziun. Malgrad turissem e sustegn public tonschan ils mieds buca per ina tgira cumplessiva», scrivan ils responsabels dil Project uaul da muntogna. La finamira dil project a Mustér ei stada da plantar plontas al cunfin digl uaul el contuorn dallas lavineras existentas. Cheutras duei vegnir procurau per in uaul stabil che surpren la funcziun da protecziun e che garantescha la segirtad dalla populaziun a moda persistenta. Biaras uras da lavur ein era vegnidas impundidas uonn per mantener vias e trutgs per aschia facilitar la lavur el liug al survetsch forestal. «Aschia contonschan ils voluntaris dil Project uaul da muntogna in effect direct pigl uaul da muntogna, il survetsch forestal e la societad», constateschan ils responsabels.

Val Badugna e Val dall’Aua

Igl engaschament dil Project uaul da muntogna dallas duas davosas jamnas ei vegnius prestaus sisum la Val Clavaniev, concretamein ella Val Badugna e la Val dall’Aua – detg sempel el territori dil Tir. «Igl engaschament dil Project uaul da muntogna ha ina gronda valeta per nus. Las lavurs levgeschan l’incarica dil menaschi communal, damai che las incaricas vegnan adina pli vastas ed era buca dameins», di il selvicultur da project Damian Deplazes. Sche quei engaschament succedess buc, stuess il menaschi tecnic dalla vischnaunca da Mustér exequir quellas lavurs. «Quei che munta che nus savessen buc ademplir tuttas incaricas che nus exequin ussa. Nus stuessen priorisar ni schizun surdar incumbensas», constatescha Damian Deplazes.

Indemnisaziun per la lavur

Il project uaul da muntogna vegn pagaus dalla vischnaunca da Mustér per la lavur. «Igl ei in’indemnisaziun tenor prestaziun. Quei ei per tuts il pli gest. Nus vein definiu pauschalas per plontina ni era per cavar in meter trutg», declara Damian Deplazes. Il Project uaul da muntogna ei ina fundaziun communizeivla. Sia sedia ei a Trin. Dapi 1987 han rodund 70 000 voluntarias e voluntaris prestau lavur entras il Project uaul da muntogna el territori alpin en favur dil manteniment digl uaul da protecziun. Separticipar a quels engaschaments san dunnas ed umens da 18 tochen 88 onns. In’jamna da project egl uaul ei gratuita pils participonts. La lavur ch’il Project uaul da muntogna porscha, vegn sustenida da donaziuns, contribuziuns da commembers, legats, contribuziuns d’organisaziuns partenarias e possessurs d’uaul.

Ulteriuras informaziuns: www.bergwaldprojekt.ch