Clau ha menau tras Glion

La societad Anna Catrina porscha quater gadas ad onn guidas inscenadas. «Ch’ils indigens separticipeschan ei plitost l’excepziun», manegia Marlis Caduff. Ella meina il secretariat dalla societad Anna Catrina ed organisescha las visetas dil marcau vegl da Glion. Ina squadra da quater acturas ed acturs meinan gruppas e presentan edifecis, persunalitads e historias digl emprem marcau spel Rein.

Ina surpresa all’entschatta

Sonda ei David Flepp staus en acziun. Il versau actur e pedagog da teater sa co tschaffar ina gruppa. Tenor concept e reschia da Roman Weishaupt ha el beneventau biebein 15 persunas avon il Museum Regiunal Surselva. La guida ha entschiet cun ina surpresa. In um seglia, cul telefonin enta maun, ord l’entrada dil museum. «Na na, cala, Meinrad, quei sas buca far…», «La gruppa ei semtgada cheu avon il museum….» «Na, quei fetsch jeu buc…. » «Va ei propi buc?… ». Gl’um cul telefonin ed il libroc oransch che discurreva ualti dad ault ei s’avischinaus alla gruppa. La glieud dalla Bassa spitgava ch’enzatgi beneventi ella e che la guida entscheivi finalmein. El seigi il luvrer communal Clau Cajochen, ha gl’um getg. Siu collega Meinrad hagi telefonau, el sappi nunpusseivel vegnir per menar la guida. El, Clau, dueigi surprender, il manuscret survegni el alla recepziun dil museum. Gl’emprem mument han singulas persunas priu serius la situaziun.

Suenter che «Clau» ei turnaus ord il museum cul manuscret, ha el attratg diltut l’attenziun. Aschia ha gl’actur giugau la rolla e menau tras las streglias da Glion vegl. El ha raquintau e presentau quei e tschei, adina cun setener ferm vid il manuscret dil collega fictiv Meinrad. Avon la casa Lutta ha la gruppa empriu d’enconuscher il «Klosterhof», la residenza da stad digl avat Johann, confundatur dall’emprema Ligia Grischa da 1395. Il luvrer communal Clau ha raquintau da sesez, ha era dau in schatg da sias qualitads da cantadur dalla Ligia Grischa, e tradiu da sia veta privata. El ha raquintau da sia passiun, il dar troccas, e dils niebels de Grüneck, la famiglia dominonta dil 17. e 18avel tschentaner a Glion e da lur casas.

En fiug e fugatscha

Avon la Porta Sura ha il telefonin da Clau puspei scalinau. Cuort avon haveva ina persuna dalla gruppa vuliu saver, tgei muntada ch’ils uoppens da Berna e Turitg hagien silla fatschada externa dalla Porta Sura. El stoppi spert ir a salvar in gat che seigi secavistraus sin in baghetg, ha il luvrer communal Clau getg alla gruppa. Currend eis el s’absentaus, dend la directiva da gie buca sestiarner ed ir a piarder, el tuorni schi spert sco pusseivel. Returnond el marcauet, seseva sut la Porta Cotschna in um en vestgiu da puranchel. David Flepp ei sefultschius ella rolla ed ha raquintau co el ha viu gl’onn 1483 a barschar il marcau. El e siu bab erien si Glion Sura ed hagien stuiu mirar il drama co las casas lenn ardevien en fiug e fugatscha.

Cuort suenter ei il pur dil tard medieval ius, ed il luvrer communal returnaus da sia intervenziun cul gat. Clau ha menau vinavon la gruppa ella baselgia da s. Margreta. Quei seigi in liug da gronda muntada historica, en quella baselgia hagien las Treis Ligias fixau 1526 ils Artechels da Glion e scret historia mundiala. Anetgamein puspei in intermezzo. Johannes Comander cumpara en vestgiu ner e capi da predicant reformau. David Flepp ha giugau quella figura historica d’avon 500 onns ed ei ha pariu ch’el seigi veramein presents en baselgia.

Entupau il giuncher

Duront l’entira ura dalla guida inscenada ha el pudiu tener la tensiun. Tier la Porta dil Rein e la Porta Nera ha el informau da quei e da tschei, puspei cun midar rollas. Il punct culminont ei staus sil retuorn dalla guida. Sut la Porta Sura ha la gruppa entupau il giuncher Johann Gaudenz Schmid de Grüneck. Quel haveva contrahau e mirau ch’ils marcaus reformai confederai Berna e Turitg gidien a pagar 1711 la reconstrucziun dils mirs dil marcau. Aschia ha il niebel da Grüneck saviu rispunder sez la damonda che era restada aviarta duront la guida.