Igl esch

En tgei truchet s’audas ti? Mettas adina tuargia d’apricosas sil paun ni emprovas era mintgaton autras sorts? Prefereschas Nutella ni Le Parfait? Beibas pli bugen pier ni vin? Eis spargnus ni sfarlattas? Vul adina il pli niev ni plitost per in bien prezi enzatgei duvrau? Legias la gasetta online ni sin pupi? Mirar televisiun ni leger in cudisch? Umens ni dunnas? Stad ni unviern? Stas politicamein dretg ni seniester?

Sche ti sas rispunder tut quellas damondas claramein e senza studegiar gitg, lu cumpliment. Jeu sai buca far ei. Tier ina ni l’autra ei la tendenza clara. Tier las biaras schessel denton il pli bugen: Ton quei sco tschei. Vul quei gir ch’jeu sappi buca sedecider? Insumma buc. Jeu decidel tenor situaziun. Per exempel ei in pier frestg suenter in strapaz corporal enzatgei grondius. Tier ina buna tschavera gusta vin denton per ordinari meglier. E daco sto ei adina esser enzatgei cun alcohol? Sch’jeu stuess sedecider da beiber egl avegnir ina suletta bubronda, lu fuss quei aua da tgiern. Mo jeu stoi buc. En nossa tiara beinstonta astgel per cletg era sedecider mintgaton per latg, tè, cafè, auas dultschas ed auter pli – tut tenor gust.

Jeu haiel fetg bugen igl unviern. Mo in unviern perpeten less jeu buc. Quei unfisass. Jeu gaudel la midada dallas stagiuns. Cu tut flurescha. Cu ins sa ir entuorn en caultschas cuortas. Cu la feglia croda. E cu ins sa ir cun skis e turnar en stiva caulda.

Sto tut adina esser ner ni alv? Tuns grischs san tuttavia era esser attractivs. Ed insumma ei mia colur preferida blau.

Sch’jeu haiel breigias da sedecider, tgei votar, lu magari ch’jeu consulteschel las recumandaziuns d’ina partida ch’ei a mi malsimpatica e voteschel exact il cuntari. Mo igl ei era schon capitau ch’jeu haiel vuschau tenor sias recumandaziuns.

Damondas «U che ni che» ein magari sco da dumandar: Has pli bugen in esch ch’ei adina aviarts ni in ch’ei adina serraus? Omisduas variantas fussen ina tuppadad. In esch ch’ei adina serraus drova ei buc. Lu san ins semplamein far in mir. In esch ch’ei adina aviarts drova ei era buc. Lu san ins semplamein schar ina ruosna el mir. In esch ei cheu per arver e serrar.