Las rodas han murdiu a Calzereun

KTM, Honda, Yamaha, Kawasaki, Suzuki… Quels nums ein cumbinai culla passiun dallas duas rodas, il sport da motocross. Igl ei buc il töff convenziunal dad ir sin vias asfaltadas, mobein quel culs pneus cun profil. Igl ei plitost ina moto pintga e leva. Il principal ei il motor ferm, e ch’ins hagi a disposiziun ina ruta adattada da far motocross.

Las rodas cul profil ein denton era decisivas per saver guder la spertadad tras in territori selvadi e maluliv.  Sonda vargada han ins viu a Degen ina concentraziun da tals vehichels en acziun. «El Grischun dat ei fetg paucas occurrenzas da motocross. Per saver exercitar sin ina pista viagian biars regularmein giu l’Italia ni en autras tiaras ni cantuns vischinonts», ha Sandro Casaulta getg en discuors culla FMR. El e sia dunna Veronique meinan a Rampa la garascha S.C..

En stretga collaboraziun cull’Uniun da giuventetgna da Degen han els vuliu porscher igl onn vargau ina alternativa. Els han organisau avon exact in onn l’emprema gada il «Calzereun Cross».

Motivai da cuntinuar

Calzereun ei il num local digl areal denter Rumein e las Plauncas Davos da Vella. Quei funs han Sandro e Veronique Casaulta vuliu nezegiar per zacontas uras pil sport da motocross. Romano Storz da Cazas, in specialist per vehichels cun rodas da profil, haveva contactau ils Lumnezians e dumandau tgei pusseivladads ch’ei dess per organisar ina tal’occurrenza da motocross. Cullas cundiziuns e garanzias fixadas ein vischnaunca, possessurs e cultivaders dil funs stai d’accord da far in’emprova. «Ils resuns digl onn vargau han motivau nus da cuntinuar. Uonn havein nus denton astgau nezegiar in’autra parcella per la pista», ha Sandro Casaulta explicau el discuors.

Motocross ei in sport che fascinescha biars. Las rodas cul profil, e naturalmein il motor, ein gl’essenzial. Tgi che vul far quei sport, drova – sco ils skiunz – ina pista. Romano Storz ha experientscha cun metter ora talas pistas temporaras per cuorsas e trenaments. Silla surfatscha sur la plazza da ballapei da Degen, in èr da terc vit, han cultivaders, possessurs e la vischnaunca lubiu ina secunda ediziun dil «Calzereun Cross».

Spertadad, inschign e – segirtad

Sco quei che Chiara Weishaupt, la presidenta dall’Uniun da giuventetgna da Degen, ha confirmau, ein 64 carschi s’enscrets ella gliesta da partenza. Ella e sia squadra han purschiu als participonts spisa e bubronda sil plaz, Sandro e Veronique Casaulta e lur team han organisau il percuors cun seivs, mesiras da segirtad, parcadis ed infrastructura. Gl’implont ambulont ei staus adattaus era per affons, aschia che sis d’els ein separticipai culs töfs pigns.

Spertadad ed inschign sin terren maluliv s’audan tiel regl dil sport da motocross. La tematica dominonta ei denton adina la segirtad. Equipadi correct ei obligatori, leutier s’audan capellina, egliers, vons, stivlas, caultschas fermas e schurmetg dil dies. Tut quei ha denton buca saviu gidar a Degen che las rodas cun profil anflien tegn el tratsch digl èr vit. Quel era schi schetgs ch’ei ha pariu ch’ils crossists seigien sin ina pista amiez il desiert.