Il «Trenin Desertin» sco nov’attracziun?

En concordanza culla vischnaunca da Mustér ha la Lozza transport da persunas GmbH da Mustér elavurau in concept per ina purschida turistica en fuorma d’in niev mied da transport. Quel senumna «Trenin Desertin». Igl ei aschidadir ina locomotiva cun dus carrs. Il tren cun rodas duess circular sin treis rundas duront 120 dis la stad: Naven dalla staziun tiel Disentiserhof e lu ad Acletta; directamein naven dalla stagiun ad Acletta e naven dalla staziun a Fontanivas ed anavos. Tut en tut ein otg viadis per di previ, quater en direcziun Acletta e quater a Fontanivas. Semeglionts trenins dat ei gia en differents loghens, denter auter a Locarno e Ligiaun ni era a Filisur.

«Dotto Big Boy 4×4»

Sco ins sa leger el messadi che la suprastonza communala ha tarmess quels dis al cussegl da vischnaunca per sia seduta da mesjamna, ils 28 d’october 2026, setracta ei tiel tren d’in vehichel dil tip «Dotto Big Boy 4×4». «Nus essan stai a mirar differents tips da vehichels per quella purschida, denter auter ell’Italia», di Pirmin Lozza. Il vehichel ha tracziun da tuttas quater rodas e carrescha cun ina spertadad d’entochen 30 km per ura. El porscha plaz a 38 persunas. In carr ei concepius aschia che persunas en sutga da rodas han medemamein access a quel. «Aunc buca decidiu eis ei schebein il vehichel ha tracziun cun electricitad ni diesel. Ei drova in’examinaziun dallas pendenzas, pertgei in vehichel cun tracziun d’electricitad che nus preferin da principi, ha dameins forza ch’in cun motor da diesel», declara Pirmin Lozza. Pil diever dil «Trenin Desertin» ei previda ina taxa per di per carschi ed affons. Per affons sut sis onns duei la purschida esser gratuita. Il medem duei valer per possessuras e possessurs dalla carta da hosps e la Golden Card.

Investiziun da 450 000 francs

Ils cuosts d’investiziun pil «Trenin Desertin» ein calculai cun 450 000 francs. Tenor il messadi dalla suprastonza communala al cussegl da vischnaunca ei l’interpresa Lozza promta da sbursar 250 000 francs da quella summa. «La vischnaunca surprendess 200 000 francs. Culla contribuziun dalla vischnaunca vid l’investiziun san ils cuosts d’amortisaziun che tuccan als cuosts da menaschi vegnir teni en ina rama supportabla», scriva l’executiva communala. Sper la contribuziun all’investiziun ha il cussegl da vischnaunca da decider davart ina contribuziun annuala da 50 000 francs vid ils cuosts da menaschi. Quella contribuziun vegness reglada en ina cunvegnientscha da prestaziun pils proxims tschun onns. In’ulteriura part dils cuosts da menaschi duei vegnir cuvretga cun sustegn da sponsurs. «Nus essan en contact denter auter culla Reka, TCS a Fontanivas, Catrina Resort e Pendicularas Mustér SA. Ils resuns sin nossa purschida ein buns ed ils aspects da survegnir sustegn finanzial medemamein», di Pirmin Lozza.

Ina purschida per la stad

«En ina emprema fasa eis ei previu da porscher il tren pil temps da stad duront 120 dis. Damai ch’igl ei in vehichel cun tracziun da tuttas quater rodas savessen viadis era pil temps d’unviern vegnir en damonda», di Pirmin Lozza e manegia plinavon: «Spel urari ufficial dess ei secapescha era la pusseivladad da far viadis supplementars sco per exempel tier La Pendenta.» Il problem che regia amiez il vitg da Mustér cun fetg bia traffic surtut la stad duessi buca engrevegiar il menaschi. «Quei survetsch vegn segiramein era a gidar da reducir il traffic individual el vitg. Glieud che vegn giu d’Acletta ni si da Fontanivas sa aschia schar leu igl auto. La finamira da quei survetsch ei da vegnir culla glieud el vitg e silsuenter da transportar anavos ella», declara Pirmin Lozza. Aschilunsch ch’il cussegl da vischnaunca s’accorda culla proposta dalla suprastonza communala, vegn Pirmin Lozza a cuntinuar cul project. Duess la finanziaziun reussir cumpleinamein savess il «Trenin Desertin» circular gia primavera proxima a Mustér.