«Cooperar sur ils cunfins parochials»

Igl appel digl uestg Joseph Maria Bonnemain allas pleivs sa buc esser pli clars: sortir digl agen curtgin, construir allianzas, cooperar sur cunfins communals e parochials ora e sviluppar novas fuormas da pastoraziun e cuminonza. Igl uestg scriva en sia brev sin la pagina d’internet digl uestgiu che l’organisaziun classica e pleivs autonomas hagien negin avegnir. Era Mariano Tschuor, igl autur dalla brev da lecturs ella Quotidiana dils 12 d’october 2026 scriva clip e clar: «La pastoraziun sa buca pli vegnir organisada sco sche las premissas d’antruras existessen vinavon.» El constatescha: «L’organisaziun tradiziunala dalla pastoraziun en pleivs per gronda part autonomas ed en structuras isoladas ina dall’autra ha negin avegnir. Igl ei neras uras da surmuntar il patratg che finescha als cunfins dall’atgna pleiv»

Seligiar ei impurtont

La FMR ha tematisau ils dus appels publics cun Flurina Cavegn-Tomaschett, collaboratura pastorala ellas pleivs da Glion, Schluein, Sagogn e Sevgein e commembra dil cussegl episcopal digl uestgiu da Cuera. Ella di ch’ins stoppi interpretar endretg  igl appel digl uestg Joseph Maria Bonnemain. «Igl uestg animescha da seligiar cun autras pleivs e cun autras cuminonzas, enstagl d’ir ina via suletta sco pleiv.» La basa pils patratgs digl uestg seigi il process sinodal che ditgi  ch’ils parochians deien buca semetter sin via persuls mobein proceder en cuminonza cun auters. La baselgia vegni formada d’ina gronda cuminonza e buca d’in singul, di Flurina Cavegn-Tomaschett. 

Bandunar la pleiv territoriala

En sia brev da lectur sereferescha Mariano Tschuor al clom digl uestg diocesan. El scriva: La damonda decisiva ei uss buca pli, sche quei seigi necessari. La damonda ei, sche las persunas responsablas ein promtas da far quei. Han ellas la curascha da bandunar structuras ch’ein isadas, mo buca pli purtontas? Han ellas la forza da patertgar en territoris pli gronds, en novas cumpetenzas ed en novas dimensiuns pastoralas? E dat ei insumma aunc persunas che san e vulan far dapli che administrar il regress?

La ponderaziun ei buca nova

«Igl appel ella brev da lecturs da bandunar ils cunfins territorials e da sesarver per ina cuminonza pli gronda ei buns e vala la peina da reflectar», di la collaboratura pastorala Flurina Cavegn-Tomaschett. «La ponderaziun da far quei ei denton buca nova.» La baselgia sestenti dapi liung temps da seligiar cun autras cuminonzas. «Quei ei zatgei fundamental che fuorma era la basa per in bien futur da nossa baselgia e da nossas pleivs.»

Claustra sco center da cumpetenza

Igl anteriur schurnalist da televisiun e publicist Mariano Tschuor ch’ei dapi dus onns era commember dil cussegl da fundaziun dalla claustra dalla soras dominicanas da Glion deplorescha ch’ins ha munchentau da mussar interess per las localitads dalla claustra en favur d’ina cuminonza ecclesiastica senza cunfins territorials.

Per Flurina Cavegn-Tomaschett che lavura ella pastoraziun dallas pleivs da Glion e contuorn savessen las localitads dalla claustra da Glion vegnir duvradas per exempel sco center da cumpetenza per certas disciplinas ecclesiasticas, denton buca sco center da pastoraziun. «Per la pastoraziun drova ei tenor mei las pleivs era egl avegnir. La collaboraziun culla claustra vesel jeu absolutamein sco ina fetg buna pusseivladad per collaborar en pliras fuormas.» Flurina Cavegn-Tomaschett numna ils gronds avantatgs ch’ina collaboraziun pli intensiva havessi per las pleivs sezzas. «Ins sa trer a nez meglier las resursas persunalas e las finanzialas. La munconza da daners fatschenta era biaras pleivs, era el futur.»

Da sut ensi e buca da surengiu

«Jeu sun absolutamein buc encunter in ferm center ecclesiastic regiunal per las pleivs», di Flurina Cavegn-Tomaschett. «Ed jeu vesel ch’ils discuors vegnan ad ir en quella direcziun ils proxims onns.» La collaboratura pastorala e commembra dil cussegl episcopal fa allusiun alla veglia digl uestg da Cuera che detti gronda peisa che las discussiuns davart las collaboraziuns futuras creschien da sut ensi e buca sco en certs uestgius ch’ei seigi vegniu decretau da surengiu tgei pleivs e regiuns che hagien da collaborar cun tgi el futur