Emprova cun ina cuvrida sintetica

Las temperaturas carschentas era duront il temps d’unviern engrevieschan pli e pli l’infrastructura pil temps liber e da sport. Quei ei buca mo il cass sil cuolm, mobein era ella val. Da quella midada dil clima ein era plazzas da glatsch pertuccadas, surtut las naturalas. Quei ei era il cass en loghens che schaian empau pli ad ault sco Tujetsch.

24 dis en funcziun

Sco l’administraziun communala da Tujetsch ha communicau sin damonda, ha la stagiun vargada dalla plazza da glatsch saviu vegnir aviarta pér ils 29 da december. «Senza transportar neutier neiv entras il menaschi tecnic fuss l’avertura dil glatsch buca stada pusseivla sin quei datum», constatescha ella. Duront las vacanzas da Nadal, il temps culs pli biars hosps, ha il glatsch denton stuiu vegnir serraus pliras ga igl unviern vargau. Era duront las vacanzas da sport dil fevrer ei il menaschi staus difficils, damai che la radiaziun dil sulegl ei gia da gliez temps fetg intensiva. Cheutras influenzescha ella fermamein il glatsch. «Leutier ein era las temperaturas stadas fetg migeivlas, aschia ch’igl ei bunamein buca stau pusseivel da mantener il glatsch», constatescha la vischnaunca. La consequenza: Il glatsch ei staus serraus relativamein savens. Tenor statistica ei la patinera naturala stada en funcziun a Sedrun ils davos tschun unviarns mintgamai denter 24 dis (2025/26) e 38 dis (2022/23). Ella media dils davos tschun onns ei quei stau il cass 31 dis.

Tschercau alternativas

Sin fundament da quella situaziun ei la suprastonza communala sedecidida d’analisar detagliadamein la situaziun e da decider davart il futur dalla purschida cun in glatsch natural. L’administraziun communala ha sondau soluziuns alternativas a basa d’offertas ch’ein vegnidas sin damonda. «La suprastonza communala ha decidiu d’empruar ora la stagiun vegnenta ina plazza da glatsch sintetica ch’ei vegnida examinada dalla suprastonza communala a Tavau», scriva l’administraziun communala sin damonda. Ina cuvrida sintetica porscha in tschuppel avantatgs. Ella ei accessibla senza interrupziun naven dall’entschatta december entochen la fin da fevrer. La cuvrida sintetica basegna negin’aua ed electricitad ed ei era adattada per curling e trer rudialas. «Igl ei in’innovaziun ch’ei dat aunc buca cheu ella regiun ed ella porscha era la caschun d’arranschar events duron la stad», constatescha la suprastonza communala. Auter ch’en cass da bia neiv resta la patinera aviarta. La primavera duei la cuvrida vegnir demontada e deponida. La cuvrida ha ina garanzia da 12 onns, ins quenta ch’ella sappi vegnir duvrada 20 onns. La maschina actuala da schubergiar il glatsch sa vegnir nezegida vinavon, semplamein senza il cunti.

Rimnar experientschas 

Culla cuvrida sintetica duei vegnir rimnau experientschas quest unviern a Sedrun. Per quei motiv ei la suprastonza communala da Tujetsch sedecidida sapientivamein da buca cumprar il «glatsch sintetic». La populaziun ed ils hosps da vacanzas duein far lur agen maletg ed examinar quei glatsch la stagiun d’unviern 2026/2027. Il fevrer 2027 ei previda ina radunonza da vischnaunca. Lu duei vegnir decidiu davart la cumpra definitiva ed il credit d’investiziun persuenter. «La cuvrida per quest unviern cuosta 70 000 francs. En cass che nus sedecidin da cumprar ella, eis ella calculada cun cuosts da 320 000 francs. Lu fussen ils cuosts per quest unviern secapescha gest cumpri el prezi da cumpra», di la menadra dall’administraziun communala da Tujetsch, Simona Giossi. Per semtgar e preparar il glatsch natural impundeva la vischnaunca ella media 25 000 francs per unviern. Consequentamein fuss la viarianta cun cuvrida sintetica in bien ton pli favoreivla, sch’ins quenta ch’ella tegn 20 onns.