Credit per sanar las pendicularas ei sut tetg
Cun 618 encunter 267 vuschs han las votantas ed ils votants dalla vischnaunca da Breil detg GIE al credit da siat milliuns francs per sanar las pendicularas. Quella decisiun dat glisch verda al cussegl d’administraziun dallas pendicularas per realisar las mesiras definidas el plan da fatschenta.
Alla fin finala han 69,8% dallas votantas e votants dalla vischnaunca da Breil detg GIE al credit da siat milliuns francs per sanar las pendicularas (618 GIE encunter 267 NA). Il credit lubiu consista d’ina contribuziun da sanaziun e da liquiditad da 4,5 milliuns francs sco era d’ina contribuziun annuala da menaschi e d’investiziun da 500’000 francs duront tschun onns. Quella vegn duvrada per sanar il menaschi da pendicularas e per garantir il menaschi.
Clar votum dil suveran
Il president communal da Breil, Roman Flepp, ei satisfatgs ch’il resultat dalla votaziun ei aschi clars: «Jeu sun levgiaus. Ussa sa il cussegl d’administraziun dallas Pendicularas da Breil SA entscheiver a luvrar.» Il proxim pass seigi ussa da realisar las mesiras da menaschi stipuladas el plan da fatschenta. Quei seigi l’emprema incumbensa dil cussegl d’administraziun dallas pendicularas cul niev president Klaus Nussbaumer che ha in mandat da disposiziun naven digl 1. da november. Tenor il president communal Roman Flepp, che fa sez era part dil cussegl d’administraziun dallas pendicularas, dat ei mesiras da spargn e mesiras per generar dapli entradas. «Il niev cussegl d’administraziun vegn eligius ils 27 da november 2026 e suenter quella radunonza vai ei liber.»
La vischnaunca acziunaria maioritara
Sco quei che Roman Flepp di enviers la FMR hagi il suveran dallas sis fracziuns da Breil dau ina clara incumbensa alla vischnaunca cun conceder il credit da siat milliuns. «La vischnaunca ha d’exequir ussa quei ch’ei vegniu decidiu e surprender la responsabladad.» Cun l’approbaziun dil credit daventa la vischnaunca acziunaria maioritara dallas Pendicularas da Breil SA.
A pli liunga vesta
Il president communal ei suenter il consentiment al credit da siat milliuns francs perschuadius ch’il cussegl d’administraziun e la gestiun dallas pendicularas vegnien a realisar las mesiras dil plan da fatschenta. «Quei sto reussir bein ils proxims treis entochen quater onns per che nus vesien che las cefras seigien sesviluppadas el senn positiv. Lu savein nus sco suprastonza trer ina bilanza e tut tenor communicar quei alla populaziun, tut tenor era cun ina nova proposta. Impurtont ei ch’il suveran da Breil hagi era in plaid el capetel egl avegnir.»
Gust da leger dapli?