Sils fastitgs da Schertenleib e Reuteler

Il ballapei da dunnas en Svizra ei sesviluppaus plascheivlamein ils davos onns. In mussament persuenter ein biaras bunas giugaduras ch’ein engaschadas tier enconuschents clubs en ualti bein tuttas grondas ligias da ballapei dall’Europa. Aschia Sydney Schertenleib ch’ei cun gnanc aunc 20 onns gia el cader dil Club da ballapei Barcelona ni Géraldine Reuteler ch’ei engaschada tier Arsenal. Cun Livia Peng ei denton era ina Grischuna da cattar en ina dallas meglieras equipas europeas: Chelsea. Quels exempels animeschan secapescha era giuvnas giugaduras da s’engaschar sil plaz da ballapei e da forsa far la medema carriera in di. La promoziun da giugaduras giuvnas ha priu ina fetg buna direcziun ils davos onns, era el Grischun. Da quei svilup profiteschan giugaduras sco las soras Anna Lea (17) e Ladina Cabernard (15) da Glion.

Stedi sin viadi

Anna Lea e Ladina Cabernard dattan omisduas ella pli aulta ligia svizra da lur vegliadetgnas: U18 respectivamein U16. Anna Lea ei engaschada questa stagiun ell’equipa dil Club da ballapei Sogn Gagl, Ladina el team dalla Svizra sid-orientala. Ina ga ni l’autra survegn era ella la caschun da dar in giug cun Sogn Gagl, damai ch’ils responsabels per quellas equipas coopereschan stretgamein.

Quella pissiun pil ballapei ha siu prezi. Ella ei cumbinada cun liungs viadis cul tren. Ferton che Ladina Cabernard serenda treis ga ad jamna al trenament a Cuera, fa Anna Lea dus viadis per jamna als trenaments a Sogn Gagl, leutier in a Cuera. La fin d’jamna ein giugs da campiunadi sil program che meinan las giuvnas per l’entira Svizra entuorn. «Igl ei bi da veser auters loghens en Svizra e da saver dar ballapei sil pli ault nivel», dian las duas feglias d’Annalisa Cathomas e Vendelin Cabernard. «Quels viadis, surtut il retuorn la sera tard, caschunan schon panzieris. Quei ei il cass per exempel, sche Anna Lea sto spitgar a Cuera da bunamein mesanotg ina mesura sil tren entochen Glion», di Annalisa Cathomas.

Capientscha dil gimnasi

Anna Lea e Ladina Cabernard absolvan il gimnasi dalla claustra a Mustér. Leu gaudan ellas la capientscha dils responsabels per lur engaschament sportiv: «Nus savein ir suentermiezdi sil tren. Aschia munchentein nus mo entginas paucas lecziuns e persuenter ha il gimnasi capientscha.» Per lur mumma eis ei clar: «Las prestaziuns en scola astgan buca pitir. Aschiditg che quei ei buc il cass, astgan ellas dar ballapei sin quei nivel. Nus havein mai fatg pressiun sin ellas pertuccont igl engaschament sportiv.» Spel ballapei e la scola sunan omisduas aunc in instrument. Negin’idea han las duas junioras pertuccont igl avegnir da studi suenter il gimnasi. Ladina Cabernard frequenta il mument la tiarza classa, Anna Lea la tschunavla.

Plascher dil ballapei

Schegie che omisduas dattan ballapei sil pli ault nivel da lur vegliadetgna, restan las finamiras – silmeins il mument – aunc en rama. «Jeu hai plascher d’esser en quell’equipa. Jeu emprendel d’enconuscher bia glieud. Ils viadis als trenaments e giugs disturban insumma buca mei. Jeu sai emprender el tren ed ensemen cun conscolaras eis ei savens era legher», di Ladina Cabernard ch’ei attaccadra e che marca ina ga ni l’auter per si’equipa. Sia sora Anna Lea che dat el miez, vesa quei semegliontamein: «Nies team ei sco ina famiglia. Nus selegrein ina cun l’autra.»

«In suenter l’auter»

Silla damonda, nua che quella via el ballapei savessi aunc menar, restan las duas soras plitost mudestas: «Nus fagein in pass suenter l’auter. La situaziun sa semidar spert, seigi cun ina blessura ni ina midada da trenadra ni trenader. Mo ei fuss bi da saver dar ballapei sil pli ault nivel era igl avegnir.» E Ladina Cabernard ha tonaton aunc in’autra idea pigl avegnir: «In siemi fuss da saver ir a dar ballapei ell’America, forsa cumbinau cun ir leu a scola.» Omisduas han entschiet a dar ballapei tier l’Uniun sportiva Schluein Glion, igl emprem culs buobs. Leu – ella 2. ligia regiunala – dat ussa era lur frar David Flurin (18) ballapei cull’emprema equipa. Era el ha rimnau experientschas el cader dil team dalla Svizra sid-orientala. Tgisa nua che la via dil ballapei meina aunc Anna Lea e Ladina Cabernard. Sils fastitgs da Sydney Schertenleib, Géraldine Reuteler e Livia Peng ein ellas gia.