Il festival da glisch ed art ha giu premiera

In punct culminont dil festival ei ina projecziun da glisch silla fatschada dalla Banca Raiffeisen Surselva. Las graficas duvradas persuenter derivan da scolaras e scolars da Breil. Lur ovras vegnan projectadas duront il festival sil baghetg el center dil vitg. Aschia duein affons e giuvenils vegnir integrai activamein ella concepziun dil festival e survegnir la pusseivladad da presentar lur lavurs ad in vast publicum. Sper la Banca Raiffeisen vegnan era ulteriurs loghens el vitg mess en scena. Aschia procuran projecziuns ed objects d’art tier la baselgia, silla plazza da scola ed en ulteriurs loghens per in’atmosfera da glisch speciala.

L’emprema sera ei reussida

Gia l’emprema sera ha il niev festival attratg numerusas visitadras e biars visitaders. Specialmein avon la casa communala e sil plaz da scola ein biaras persunas s’entupadas per mirar las ovras d’art ord la glisch. In auter magnet dil publicum ei stau la presentaziun dil duo franzos Claire et Antho. Cun sault umbrivaun, musica e cant raquentan els ina historia. Quella ha incantau il publicum sil plaz da scola. Part dil festival fan plinavon ina sculptura da lenn da Michel Pfister sco era la sculptura glischonta Pialeto. Il festival cumpeglia plinavon concerts, uras da praulas sco era in luvratori da teater per affons e concerts da differents interprets.