Absoluziun transitorica – fin che UBI decida

L’UBI – l’Autoritad independenta da recurs davart radio e televisiun – è però in auter gremi. Lez n’ha betg mo dad intermediar, mabain da derschar. En quest gremi sesan nov persunas – giuristas ed experts per dretg da medias – che n’èn betg creschidas si en il Grischun.

Questas persunas n’èn betg vegnidas socialisads en in conturn nua che la chatscha è insatge normal. Ellas n’èn probabel betg disadas da vesair mintg’atun maletgs da selvaschinas sajettadas. I vegn perquai ad esser ordvart interessant co che questas persunas giuditgeschan las emissiuns dad RTR crititgadas dad «IG Wild beim Wild».

Problematic n’èn gea betg singulas fotografias da predas ubain singulas contribuziuns. Il crap da stgarpitsch è la dimensiun: entiras fotogallarias sin il portal online, emissiuns di per di nua ch’i vegn gratulà a chatschadurs e chatschaduras, concurrenzas per annunziar tschiervs, chavriels u chamutschs sajettads.

La chatscha è uschia bunamain instituziunalisada tar RTR. Ed era sche la chasa da medias ha emess quest onn intginas paucas contribuziuns che cuntegnan ina nota critica visavi la chatscha, na basta quai betg per gulivar il dischequiliber.

Amaturs ed amias da la chatscha han tschaffen dad emissiuns davart predas. Ma per glieud cun in sguard critic u che ha sgarschurs dad animals mazzads, èsi tut auter ch’in plaschair da guardar e tadlar ils chanals da l’emettur rumantsch durant il temp da chatscha.