L’aua persa vegn a l’urna

La serenera da Bravuogn è veglia e sto vegnir sanada. Empè da realisar in nov indriz, prevesa la vischnanca Bravuogn Filisur dentant da colliar las lingias d’aua persa da Bravuogn e conturn cun la serenera d’Alvagni. Il credit e la finanziaziun per in tal project ha era gia la radunanza communala approvà la fin d’avust. Quai cun 64 cunter 35 vuschs e 21 abstenziuns.

Ma sco che la vischnanca ha communitgà l’emna passada, saja entant reussì il referendum cunter la fatschenta. La votaziun è fixada per ils 29 da november 2026. Trais mais suenter il GEA da la radunanza communala decida pia il pievel a l’urna sur da la schliaziun per l’aua persa.

La finanziaziun dat da discutar

La dumonda dispitaivla n’è dentant betg il project sco tal. Als iniziants ed iniziantas dal referendum vai en emprima lingia per la finanziaziun, sco che RTR aveva rapportà ils 9 da settember 2026. Da discutar dat en quest connex la taxa da colliaziun speziala. Ina tala stuessan pajar possessuras e possessurs da funs ch’èn colliads cun la serenera Bravuogn. Fixà è ina taxa che munta a 0,9 % da la valur nova da l’edifizi indexà. Ina taxa reducida da 0,45 % vala per edifizis che vegnan colliads da nov e per possessuras e possessurs che han gia pajà dapi il 1. da schaner 2017 ina tala taxa per lur immobiglias.

Sche la votaziun a l’urna conferma il GEA da la radunanza communala, chaschunass in edifizi cun ina valur nova dad 1 milliun pia ina taxa da 9000 francs. Ma la summa po er esser considerablamain pli auta. «In dals hotels da Bravuogn sto pajar circa 250 000 francs», aveva il cun-iniziant dal referendum, Yves Broggi, ditg envers RTR. Tenor el saja la taxa en general memia auta ed ils custs sajan da purtar da tuts abitants ed abitantas da la vischnanca.

4 da 12 milliuns francs

Da pajar fiss la taxa speziala entant gia il 2027 u en trais ratas sur maximalmain trais onns tar in tschains dad 1 % sin la summa restanta. Sco ch’il president communal Luzi C. Schutz ha confermà envers la FMR, quintia la vischnanca cun entradas da radund 4 milliuns francs. Per finanziar l’entir project na tanschia quai però betg: «A la fin sto la vischnanca pajar circa 12 milliuns dals totalmain 16 milliuns francs per la fatschenta. Cun la taxa speziala cuvrin nus pia in terz da noss custs.» La gronda part vegnia pia purtada da l’entira vischnanca cun meds finanzials generals e sur la taxa per auas persas.

Sco che Luzi C. Schutz ha accentuà, na saja la suprastanza betg sa decidida da levsenn per questa varianta: «Finanzialmain è quest project in’enorma sfida per la vischnanca. Da prender ina decisiun n’è damai betg stà simpel.» Cler saja però ch’ins na po betg extender la taxa speziala sin tut la vischnanca. «La lescha communala davart las auas persas prescriva che la vischnanca po metter a quint ina tala taxa be a persunas ch’èn pertutgadas e profiteschan dal nov indriz.»

Eventualmain dovri in provisori

La votaziun da fin november na pudess però betg mo avair consequenzas per la finanziaziun ed il project sco tal. In NA a l’urna muntass er ina perdita da temp ed ina ristga, uschia Luzi C. Schutz: «Cunquai che la serenera a Bravuogn è veglia ed atgnamain betg avunda effizienta, pudess ella crudar ora. Pli ditg che nus spetgain, pli probabel è quai.» Ed en quest cas stuess la vischnanca procurar per in provisori che custass in mez fin in milliun francs.