Casatec igl avegnir sut il tetg dalla Hälg

Naven digl 1. da schaner 2027 ei la Casatec SA a Mustér sut il tetg dalla Hälg Group. Quei communicheschan las duas interpresas. «La famiglia Sac ei sedecidida da reglar la successiun dalla Casatec SA ed aschia segirar la cuntinuitad dall’interpresa sco era las plazzas da lavur ella regiun. Culla surdada alla Hälg Group ha ella cattau ina soluziun adattada persuenter», scrivan Casatec SA e Hälg Group en ina communicaziun als mieds da massa. La Hälg Group surpren igl entir pachet d’aczias dalla Casatec SA ch’ei en possess dalla famiglia Sac. La Casatec SA porscha prestaziuns cumplessivas sils secturs sanitar, scaldament, ventilaziun, clima e construcziun da lingias d’ovra. Ella accumpogna projects naven dalla cussegliaziun entochen la realisaziun.

Impurtont pass

«Per mei eis ei stau impurtont da reglar la successiun ad uras e d’anflar ina soluziun che va aprau culla Casatec SA, cun nos collaboraturs e culla Surselva», di Damian Sac, il possessur e meinafatschenta dall’interpresa d’entochen ussa. Culla Hälg Group hagi la famiglia Sac cattau ina partenaria ch’ei medemamein en possesss d’ina famiglia e cun ina strategia a liunga vesta. «Quei dat a mi la segirtad che la Casatec SA sappi mantener siu caracter e sia posiziun regiunala. Mo lu era profitar dallas pusseivladads d’ina gruppa d’interpresas pli gronda», puntuescha Damian Sac. La Casatec Group SA cun sias immobilias e la participaziun alla Recal SA resta en possess dalla famiglia Sac. Sergio Sac – il fegl da Damian e Karin Sac – entra ella direcziun da quella e vegn aschia a menar vinavon il menaschi ella proxima generaziun. Era la collaboraziun secumprovada denter la Casatec SA e la Recal SA cuntinuescha.

In process da dus onns

Sco Damian Sac di, ei il process dalla vendita dalla Casatec SA alla Hälg Group sesviluppaus el decuors dils davos dus onns: «El center da quellas contractivas ein differentas cundiziuns da nossa vart stadas. Nus havein vuliu che la Casatec SA sappi cuntinuar ella fuorma actuala e che conluvreras, conluvrers e lur famiglias hagien vinavon in’existenza cheu. Quei ei reussiu e per quei motiv savein nus vender l’interpresa cun buna cunscienzia.» Damian Sac numna in ulteriur motiv: «La Hälg Group ha ina structura da famiglia che corrispunda alla nossa. Quei ein bunas premissas.»

Va bein aprau cun Hälg

«Casatec SA va fetg bein aprau culla Hälg Group, seigi pertuccont sia purschida sco ea pertuccont la cultura dall’interpresa. Casatec SA ei engaschada en ina fiera attractiva e leu eran nus aunc buca presents directamein. Cun nos loghens da fatschenta a Cuera, Tinizong, Arosa, Lantsch e Samedan essan nus gia bein presents el Grischun», di Tamara Bosshard, menadra dalla communicaziun tier la Hälg Group. Responsabladad, luschezia, professiunalitad ed ina tenuta aviarta seigien valurs tier la Hälg Group e quella posiziun hagien ins era sentiu tier Casatec SA. «Nus cumbinein las fermezias d’interpresas francadas localmein culs avantatgs d’ina ferma gruppa d’interpresas. Nossas filialas e societads affiliadas disponan da grondas libertads d’interpresa e vegnan menadas aschi local sco pusseivel. Il medem mument profiteschan ellas dalla segirtad, dallas resursas e dil know-how d’ina ferma societad-mumma», puntuescha Tamara Bosshard.

Menaschi cumprovau

Per las collaboraturs, la clientella ed ils partenaris da fatschenta semida nuot. La Casatec SA resta sco interpresa cun siu num d’entochen dacheu. La responsabladad operativa schai gia oz tiels collaboraturs Rico Lutz e Pirmin Monn. Damian Sac vegn a s’engaschar vinavon sco commember dil cussegl d’administraziun sin plaun strategic. Cun esser ina part dalla Hälg Group survegn la Casatec SA access allas resursas e cumpetenzas d’ina gruppa d’interpresas pli gronda. «Gest cun vesta sin projects da baghegiar pli gronds planisai ella regiun rinforza quei pass la capacitad da prestaziun e la stabilitad dall’interpresa a liunga vesta. Il medem mument augmenta la Hälg Group sia preschientscha el Grischun», constatescha la Hälg Group.

Duas interpresas da famiglia

La Casatec SA ei vegnida fundada 1966 d’Aurelio Sac ed Alfred Jacomet. Dapi 1996 vegn ella menada da Damian Sac. Sur quels decennis eis ella sesviluppada ad ina interpresa da muntada regiunala. La Hälg Group ei engaschada sil sectur dalla tecnica d’edifecis e dil management da facilitads. Ella realisescha projects da scaldament, ventilaziun, clima, sanitar ed automatisaziun da baghetgs. Ella ei vegnida fundada 1922 sco firma singula per l’installaziun d’indrezs da scaldament a Sogn Gagl ed ei aunc adina ina fatschenta da famiglia. La Hälg Group occupa 1295 collaboraturas e collaboraturs en 30 loghens en Svizra. Igl onn 2025 ha ella fatg ina sviulta da 350 milliuns francs.