Renunztgier alla Scuntrada è nign tema

Introdueida è la Fiera da Savognin neida igl 1985 a caschung dall’occurrenza 2000 onns Retoromania. Da lez taimp òn l’Uniun da commers e mastirants Surses, igl cumegn da Savognin e l’Uniun da cura Savognin gia l’ideia da cumbinar la festa 2000 onns Retoromania cun ena fiera: per en de sarar la veia principala e far or da chella en tratg cun stands noua tgi dat da cumprar roba, tgossas ed artisanat dalla regiun scu er products dall’antiera regiun. Chegl ò alloura er funcziuno bung 25 onns. L’occurrenza ò damai durant ples onns attratg en grond public, magari anfignen 4000 persungas.

Manc visitaders e stands

Igl 2010 ins ò mido nom dall’occurrenza, tg’ò adegna li igl amprem venderde digl meis d’avost. La Fiera da Savognin è davantada la Scuntrada. Igl event è adegna daple s’avanzo ad en antop noua tgi dat betg ple tants stands, mabagn adegna daple lis per bever e per magler.

Igls davos diesch onns è igl domber digls visitaders dalla Scuntrada sa redutgia an en cuntign e vetiers er igls expositours tgi vandevan da tottas sorts robas. Las uniuns localas on scumanzo a far travagls d’ustareia e concurrenzar las pacas ustareias per lung digl Stradung a Savognin. Chel è siva digl 2020 veia naziunala (N29) ed er chegl simplifitgescha betg l’organisaziun dalla Scuntrada cun esser per chel de en sviamaint noua tgi igl grond traffic vign reglo. Quant dei tgi chegl è anc uscheia, è fixo nagliour. An chella tgossa decida l’Uffezi federal per veias ASTRA.

Da gronda impurtanza

Anvidos alla seira da discussiun pertutgont igl avigneir dalla Scuntrada èn betg angal stos igls commembers e las commembras dall’Uniun da commers e mastirants Surses, mabagn er ples presidents d’uniuns localas. Per l’occurrenza seian chellas da gronda impurtanza, ò detg ­Patrick Thurner, commember digl comite d’organisaziun dalla Scuntrada.

Or digls votums è sa resulto tgi aint igl futur ins savess integrar anc pi fitg las uniuns e cun musica dar daple veta all’occurrenza. Igls presidents preschaints dallas uniuns on confirmo tgi la Scuntrada seia en’occurrenza noua tgi finanzialmaintg varda or ensatge per las uniuns. Realitad seia tuttegna tgi igl stgamgiamaint ed er igl gudogn vigna adegna pi pitschen. Chegl on er menziuno igls expositours tg’eran preschaints e tg’on en stand tar la Scuntrada. Igls presidents dallas uniuns on er menziuno tgi fissan pronts da sa participar alla Scuntrada, schi chella vess betg ple d’aveir li agl Stradung a Savognin, mabagn a Grava, noua tgi la Tundeida ò li siva da passa dus decennis.

Igl HGV Surses duess surpiglier igl lead

Igl avost 2027 duess la Scuntrada aveir li agl Stradung a Savognin scu gio siva digl 1985. La gronda part digls preschaints e dallas preschaintas fiss pitost per midar dalla Veia principala a Savognin a Grava. Igl li seia pi famigliar, pi ampernevel, pi survasevel e cunzont er pi attractiv tgi igl Stradung. Nia detg adegna puspe è tgi l’uniun da commers e mastirants HGV Surses duess surpiglier igl lead dall’organisaziun dalla Scuntrada. La collaboraziun cugls purtaders digl turissem duess dantant tuttegna restar. Per organisar ena occurrenza tgi sveglia interess, duess chella er custar ensatge agl HGV. Ultra da chegl duessan igls commembers e las commembras dall’uniun er davantar pi activs gist chegl tgi pertotga igl sustign digl comite d’organisaziun, cunzont chegl tgi pertotga la montascha dall’infrastructura.

Nign tema è da renunztgier alla  Scuntrada, è nia detg repeteidamaintg. Ossa seia da far ena clera survista dalla situaziun per vurdar noua tgi seia da far las correcturas e las midadas per dar alla Scuntrada nov tgatsch e daple veta. Igl caracter da fiera vegia ella gio pi dadei betg, en li d’antop per indigens e giasts duess ella venavant esser – chegl betg par tout agl Stradung, ma tgunsch pussebel a Grava.