Ina simbiosa per dasdar sentiments
Janic Maskos e Bigna Guler han preschentà durant ils Dis da litteratura a Cuira lur nova performance [tanter], ina maschaida da raquint e tuns d’accordeon. L’inscenaziun ha tschiffà ils aspectaturs cun in gieu fascinant ed ina perspectiva frestga sin la vita quotidiana.
Direct suenter il discurs d’avertura dals Dis da litteratura sonda passada han Janic Maskos e Bigna Guler surpiglià ed immediat laschà il public sa sfundrar en lur univers da pleds e melodias. Els han manà il public tras detagls zuppads dal mintgadi.
In viadi tras ils senns
Il pèr artistic ha inscenà sia nova performance litterar-musicala [tanter]. Ils aspectaturs ed aspectaturas èn vegnids manads tras metamorfosas e tuttas sorts atmosferas tras las stagiuns, tut cun in ritmus che sa mida tenor la scena. Ils texts da Janic Maskos van a pèr – minuta suenter minuta – cun la musica da l’accordeon da Bigna Guler. La cumbinaziun gartegiada tranter musica e text ha tratg il public en sia fascinaziun da l’entschatta ennà.
En il center da l’ovra stat ina ruptura radicala cun la perspectiva dal mintgadi. Tras ils egls da la «bes-cha sainza pail e sainza corna» cumparan ils schabetgs da mintgadi absurds, grotescs, comics. Il toc po esser comic, ma procura era per ponderaziuns: El envida da sortir da temp en temp ord la perspectiva dal trot quotidian e da guardar scenas repetidas dis en dis or cun ina perspectiva pli frestga, ina perspectiva per sa deliberar da quella paisa dal mintgadi.
In gieu da suns – ord la bucca e l’instrument
L’aspect ludic stat adina el center. Ins senta trasora il divertiment da giugar cun la lingua, nizzegiar maximalmain las pussaivladads da pleds, furmas e suns: «La bes-cha sainza cornas as struozcha scuzza our dal cuz e’l müs-chel tilla para da gnir encunter.»
«Pac toc davo. Pac toc davo. Pac toc davo», repeta l’artist tut tagliond las silbas. E vegn respundì cun in bel staccato da l’accordeon. Lura cuntinuescha la construcziun: «Pac toc davo la chantunada vana vi’ed aint a far il pisch – il chan cun seis patrun.»
Simbiosa ideala per evocar sentiments
La prelecziun dal text na vegn betg mo accumpagnada da las cumposiziuns da Bigna Guler, mabain transfurmada en sentiments. Cun ses accordeon rumpa ella si structuras tradiziunalas e dat al raquint in tempo pulsant, fermezza e profunditad emoziunala. Lur tuns battan e resunan sco undas en in spazi che unescha narraziun e public.
La musica sa mova latiers sin il fil stretg che dominescha tut la performance: en il tranteren permanent. E gist là chattan Janic Maskos e Bigna Guler la glisch tranter il di e la notg, la midada ciclica da las stagiuns, sensaziuns da chalira e fradaglia. Il public è senza dubi stà tschiffà dal gieu tranter text e tact, sco che la runda d’applaus ha palesà.
Gust da leger dapli?