Tiastas giganticas sin stadera

Sonda sera ei igl areal avon l’ustria Miraval a Sogn Benedetg s’empleniu – buca mo cun persunas, mobein era cun tiastas da péz (Spitzkabis). Ei ha giu liug la 7avla ediziun dalla concurrenza per la pli gronda tiasta da péz. 32 exemplars ein vegni presentai e valetai d’ina giuria.

Tuts han la medema sort

La concurrenza ha denton gia entschiet la primavera. Per che tuts hagien la medema schanza, survegn mintga hortulan e hortulana plontinas da ­Vitus Bass. Igl hortulan pensiunau ha avon entgins onns scuvretg quella veglia sort da tiasta: «Mintga plontina ei individuala, ha differents gens. Ina ei semplamein la primaballerina. Tgi che ha lezza ha gia in avantatg.»

Bein han ils gens in’influenza, sefidar mo sin lezs tonscha denton buc. Mintgin e mintgina ha sias atgnas ideas e ses agens trics per cultivar la tiasta. Gieri Orlik da Trun, in dils favorits dalla concurrenza, bogna da temps en temps las tiastas cun aua d’urticlas. Quei hagien ellas bugen, ha detg igl um che ha gia gudignau ina gada ed ei staus treis gadas sil podest.

La garda veglia va culla plema

Duront ch’igl ei vegniu festivau en sala, ha la giuria controllau e pesau las tiastas. Las reglas ein strictas e valan per tuts, ha detg Andriu Hosang, in dils giurors. Il best astga esser maximalmein siat centimeters liungs e mo dus fegls che vegnan buca magliai san restar vid la plonta. Tractar tuts tuttina seigi impurtont per evitar carplinas denter ils hortulans e las hortulanas. «Nus empruein da far aschi exact sco pusseivel – e la giuria ei bein stada cumpetenta», ha Andriu Hosang manegiau. Cu tut las tiastas ein stadas pesadas, eis ei vegniu tier il punct culminont dalla sera. La rangaziun dad uonn muossa l’experientscha dalla garda veglia. La pli gronda tiasta ha Gieri Orlik – cun in exemplar da 15 kilograms e 380 grams.