Nico Caprez – bainbaud a la testa dals chips?

In tip d’investiziun per tips curaschus: Il schef dad in dals pli potents concerns dal mund è in pau en las turbulenzas. Ma ina testa rumantscha fiss pronta da surpigliar! Tgi che cumpra ussa las aczias da Nvidia, quel metta sin «Nico Caprez». Ma tgi è el atgnamain – e daco avessan tuts gia stuì sminar bler pli baud che l’Engiadinais daventia in bel di in grond CEO?

Ti sas, jau sai, l’entir mund sa – il schef da la pli gronda firma da chips da computers ha durmì cun ina spiuna chinaisa. Grazia a quest malheur has ti ussa la schanza da tia vita! Cumpra ussa aczias da Nvidia – il curs è uschè bass sco anc mai pervia da l’affera dal schef – e ti vegns bainprest a far sigls da legria extraterresters. Sco pussaivel successur dal CEO Jensen Huang vegn numnadamain en dumonda in um che discurra betg mo englais, tudestg e talian – mabain era puter.

«Nico Caprez» è il num dal nov messias. Entaifer paucas uras ha ses num fatg la runda quest’emna enturn il mund tar gronds portals da medias sco la BBC, Business Insider e perfin il Tages-Anzeiger ha rapportà: «Wird ein Schweizer bald Nvidia-Schef?» Tar la firma da chips è el gia dapi in temp «vicepresident of global AI infrastructure growth». Hailanzac, quai è uss ì svelt!

Ma tgi che enconuscha in pau las relaziuns, avess gia pudì sminar pli baud che Caprez daventia in bel di in «grond». E quai malgrà che la carriera ha cumenzà cun difficultads. Il skiunz passiunà vuleva numnadamain daventar profi da skis, surtut da cursa aval e super-G. L’um da 35 onns fiss daventà collega da Janka, Albrecht, Feuz e cumpagnia. E quai è gia l’emprim indizi che pleda a favur da Caprez: El avess il talent ed il curaschi dad ir da pistas taissas engiu. Però lura ha ina blessura dal schanugl deplorablamain franà la carriera da skis – u per fortuna?

Pli bler success ha Nico Caprez gì cun edir in cudesch cun tut ils «Föglins da Silvaplauna», in circular da vischnanca che vegniva edì da sia tatta Anita Gordon. Quel pensum è stà cundì cun diversas sfidas, sco ch’el ha il 2021 tradì envers la Posta Ladina: «Perche cha quists föglins sun gnieus miss insembel a maun e zieva gnieus fotocopchos d’eira da piglier ourdglioter mincha pagina A5 da mincha ediziun e drizzer our cha la pagina nu saja torta.»

Tgi che sa co ch’igl è da guardar che las paginas na sajan betg tortas, quel ha mussà senn da responsabladad, chat jau. E tgi che fa fotocopias, quel chapescha insatge da digitalisaziun, il coc da las fatschentas da Nvidia. E tgi che sa rumantsch, quel sa sobiso dapli. 

Ma Nico Caprez ha mussà ch’el sa anc bler bler dapli. El ha mussà perseveranza. E quai malgrà ch’el era gia arrivà ina giada en l’olimp da Wendy. Sco partenari da la skiunza da success Wendy Holdener avessan blers laschà dar l’aura per ils lareschs, bavì Emmi Caffe latte la vita duranta e giudì in bel temp sin in’insla sco Capri (da l’insla taliana deriva segir e franc il num «Caprez»).

Ma nagut cun Capri per Caprez. Il circus da skis n’ha per ina secunda giada betg interessà il mat. Suenter ch’il chapitel Wendy Holdener è stà terminà, è in’autra dunna cun in H daventada il numer 1: Madison Huang. E lezza n’è betg spezialista da slalom, mabain spezialista da marketing e la figlia dad in dals pli renumads schefs dal mund, da Jensen Huang. Gea exact, quai è l’um taiwanais-american cun la giacca da tgirom nair, ed apunta quel da la spiuna chinaisa.

Sco che las medias internaziunalas han rapportà quests dis, ha il pèrin Nico Caprez e Madison Huang maridà quest settember a Hawai. Al past da nozzas hai dà – sper tratgas exquisitas taiwanaisas – pli probabel era in buffet da plain in pigna. E segiramain «chips» en tut las furmas e colurs.

Basta, l’econom diplomà e schender Nico Caprez vegn gia ussa numnà «Consigliere» dal capo Jensen Huang. E jau rest tar mes tip da speculaziun: Sche l’um engiadinais – che ha tut las qualitads necessarias – daventa il nov «Huang», lura va il curs d’aczias puspè ensi. E ti poss ta legrar e giudair bellas vacanzas cun ina pluna daners – forsa perfin a Capri!