150 acrobatas ed acrobats al Campiunadi grischun
Per la secunda ga organisescha l’Uniun da gimnastica Cadi in Campiunadi grischun d’acrobatica. Quel ha liug ils 21 e 22 da november 2026 a Mustér. 150 acrobatas ed acrobats dall’entira Svizra separticipeschan a quella concurrenza che quenta era sco qualificaziun pil Campiunadi d’acrobatica d’Europa.
Mustér ei sesviluppau ad in center dil sport d’acrobatica (mira era box). Quei semuossa buca mo el diember d’affons, giuvenils ni era carschi dalla regiun ch’exequeschan quei sport, mobein era els arranschaments. Quels vegnan organisai dall’Uniun da gimnastica Cadi. Tut quei savess survegnir ina dimensiun aunc pli gronda entras la halla da giugs ed acrobatica ch’ei previda sigl areal dil Center Fontauna. La halla vegn realisada dallas Pendicularas Mustér SA e duei daventar in liug pil passatemps duront schliat’aura e sco basa da trenament pil sport d’acrobatica. Quei slontsch nezegia l’Uniun da gimnastica Cadi per seposiziunar era naziunalmein. En quella direcziun va era l’organisaziun dil Campiunadi svizzer d’acrobatica ils 20 e 21 da matg 2028 el Center Fontauna a Mustér.
Secund Campiunadi grischun
Avon dus onns ha l’Uniun da gimnastica Cadi organisau per l’emprema ga il Campiunadi grischun d’acrobatica a Mustér. Sonda e dumengia, ils 21 e 22 da november 2026 suonda il secund campiunadi. A quels semesiran denton buca mo acrobatas ed acrobats dil cantun Grischun, mobein dall’entira Svizra. Tut en tut vegnan rodund 150 a concurrenzar ils dus dis. Quei contest vala numnadamein era sco concurrenza da qualificaziun pil Campiunadi d’acrobatica d’Europa. «Per sequalificar per concurrenzas internaziunalas han las atletas ed atlets la caschun da separticipar a campiunadis regiunals en Svizra. Las rangaziuns en plirs da quels ein lu decisivas per la selecziun per in Campiunadi d’Europa ni in Campiunadi mundial», di Sara Gadola-Cajacob ch’ei responsabla per la communicaziun ed il marketing dil campiunadi dalla fin d’jamna.
«Ault nivel»
«Ils teams participonts ein d’ault nivel e nus spitgein in spitachel», di Sara Gadola-Cajacob en vesta al Campiunadi grischun. Las prestaziuns da biaras e biars sebasien sin lavur endinada e trenaments nunstunclenteivels: «Dils duos e trios astgein nus spitgar presentaziuns impressiunontas exequidas cun eleganza e precisiun.» Entgins dad els ein separticipai dacuort al Campiunadi mundial d’acrobatica a Pesaro. «Leu ha il trio da senioras Emma Fischler, Fabia Schloss ed Alyssia Solidoro contonschiu igl otgavel rang el final dalla categoria ballance ed il siatavel rang el final dalla cumbinaziun. Quei trio concurrenzescha medemamein a Mustér», relata ella
Era Sursilvanas e Sursilvans
Pil publicum dat ei denton buca mo d’applaudir la proxima fin d’jamna per acrobatas ed acrobats cun success internaziunal, mobein era per indigenas ed indigens. Dall’Uniun da gimnastica Cadi separticipeschan 19 affons e giuvenils al campiunadi, dalla Scola da circus Surselva aunc ina ga siat dels. La gruppa d’acrobatica dalla scola da circus vegn trenada da Mikhail Semenov ed Iryna Semenova. Ensemen cun Anja Klittich Berther treneschan els era la gruppa dalla Cadi. Quella gruppa ei partida en dus teams. «In ei quel che separticipescha a concurrenzas. El dumbra 23 affons e giuvenils e trenescha treis ga per jamna. L’auter team ei quel da divertiment. Lez dumbra dudisch affons ella vegliadetgna da tschun entochen siat onns sco era 23 dels sur otg onns ch’exequeschan quei sport per divertiment. Els treneschan ina ga per jamna», declara Sara Gadola-Cajacob. Ins astga pia esser spanegiaus sillas prestaziuns da Sursilvanas e Sursilvans sonda e dumengia.
Dumengia, ils 22 da november 2026 denter las 11.00 e las 12.30 ein las Sursilvanas ed ils Sursilvans da veser al Campiunadi grischun. L’Uniun da gimnastica Cadi porscha era in livestream (link: ugc-disentis.ch) dil campiunadi.
Tgei ei gimnastica d’acrobatica?
Sche figuras d’alzar spectacularas s’uneschan cun elements da fierer che prendan il flad e musica che tschaffa, lu ei quei gimnastica d’acrobatica. Il sport vegneva gia praticaus ella veglia Egipta, sco quei ch’igl ei da veser en frescos. Il num vegn dil grec «acrobateo» e munta «quel che va sils pézs». La gimnastica d’acrobatica ei in sport da squadra e vegn absolvida en teams da duas tochen quater persunas. Las acrobatas ed ils acrobats lavuran senza apparats en harmonia e confidonza. Mintgina e mintgin ei responsabels per sia partenaria ni siu partenari. Las acrobatas ed ils acrobats drovan forza, stabilitad e mobilitad, coordinaziun dils moviments, ina buna percepziun sco era ina gronda concentraziun. Igl enconuschent Cirque du Soleil ha purtau la gimnastica d’acrobatica silla tribuna mundiala ed ei oz partenari dalla Fédération Internationale de Gymnastique (FIG). En Svizra ei quei sport organisaus sut il tetg dalla Federaziun svizra dalla gimnastica d’acrobatica. (cdm/fmr)
Gust da leger dapli?