Lectura Rumantscha

In bel pachet d’energia ta porscha oz la lectura dal di cun vent, sulegl ed in capo reelegì.

Il cumbat per rodas da vent

Gust è gust, quai vala da princip per tut, era per rodas da vent. Tenor mai èn quellas ni bellas ni tridas, sin il pli in pau lungurusas. Auter vesa quai Cédric Aubert, sco ch’el ha ditg a mia collega Claudia Cadruvi: «Jau las chat bellas.» Il schef per energias da vent tar l’Axpo na promova dentant betg pervia da motivs estetics rodas da vent. El, ubain l’Axpo, vul nizzegiar dapli il potenzial: A fitg lunga vista duai dar fin 1000 rodas da vent en Svizra. Actualmain èsi radund 50.

Energia dal e per il vischin

Tim Bürkli da Laax/Glion viva da l’energia dal sulegl, almain per part. El fadia ses paun da mintgadi numnadamain cun il commerzi d’energia tranter vischins e vischinas. Geabain, dapi quest onn pon ins vender e cumprar energia solara direct al u dal vischin. E quai senza intermediaziun directa dal gestiunari da la rait, per exempel ina Repower. E quai vul dir che omadus profiteschan. Quest commerzi n’è però anc betg derasà. In emprim project ha Tim Bürkli realisà a Ladir.

Zanetti resta capo

Blera energia han candidatas e candidats per il presidi da Scuol investì las ultimas emnas. Igl è stà in cumbat electoral intensiv cun inserats, intervistas, chartas da lecturs, ina discussiun da podium – ed in «happy end» per Aita Zanetti. Ella è reelegida en il segund scrutini e po pia cuntinuar sia lavur sco capo. Quai saja in levgiament ed ella sa legria da pudair cuntinuar. Era sch’i va vinavant per tematicas «ingio chi nu’s fa be amis.»

E sche ti has temp e quaidas d’ina ulteriura istorgia davart energias verdas e damain verdas, ta cussegl jau da leger la columna da Pieder Caminada.

A revair e bun divertiment cun la Lectura Rumantscha!