Seglias

Matsch a tgea sen sglatsch sategl

Suainter 25 ons â gl’EHC Seglias puspe savieu giujear hockey sen sglatsch dumeasti. Segl sglatsch a Seglias ân els antupo igls 15 da november lur adversari da la Glarùna, igl Glarner EC II.

parter

Blears ons â igl Club da Hockey Seglias (EHC Seglias) stuieu giujear hockey davent da lur agen sglatsch. Las normas digl sglatsch a Seglias en betga ple stadas adatadas par absolver matschs a tgea. Parve da quegl â la squadra da hockey da Seglias fegn ad ussa giujieu lur matschs a tgea a Flem near a Cuira. Cunquegl ca Seglias â survagnieu igl sglatsch artifizial gl’on passo e’gl sto pussevel d’adatar las normas par puspe porscher igls matsch a tgea. Igl e sto egna sera fetg speziala, parquegl c’igl e vagnieu antizipo egna massa publicum. Ear pigls giugaders da la squadra digl EHC Seglias e quegl sto egna sera impurtànta.

Malsireztga avànt l’antscheata

Igl sglatsch a stuieu vagnir preparo avànt c’igls giugaders da tutas duas squadras ân savieu curer aint. Mo là e’gl schon gartagieu. Egn’ura a measa avànt igl start digl matsch. La maschina da sglatsch â fatg egna rusna damiez aint igl plaz da gioi. Cun egna rusna agl sglatsch e’gl nunpussevel da giujear hockey. Durànt egn’ura â igl raspunsavel pigl sglatsch ampruvo tut par salvar igl discletg. A curt avànt las 17.00 â el savieu svarnagear la squadra ad igl publicum. La rusna e stada sarada. Suainter quella malsireztga avànt l’antscheata e lua amprem curida aint la squadra da Seglias a suainter lur adversaris da la Glarùna. Tut an tut en vagnieus dumbros 207 fans c’en vagnieus a vurdar gl’amprem matsch a tgea suainter 25 ons.

«Jou ve aschi plascher da puspe giujear»

Par egn da la squadra e quella sera betga me stada speziala, parquegl c’igl e sto a tgea. Sco’gl Andreas Gujan (31) â managieu avànt igl start: «Suainter egn’operaziùn da stad, e quegl ussa mieus amprem matsch questa stagiùn. Jou ve aschi plascher da puspe giujear.» Ear par igls sieus dus cumpogns da gioi igl Marco Simeon (26) ad igl Sebastian Rousette (28) e quegl sto egna sera speziala. «Giujear cun igl team da Seglias an quarta ligia ve jou antschiet avànt quater ons. Da quel tains earan lientsch davent da dar matschs a Seglias», â raquinto igl Marco Simeon.

Igl Sebastian Rousette e carschieu sei a Seglias ad â, sco blears da sieus cumpogns, schon antschiet da giujear hockey d’unfànt. Suainter duas stagiùns tier igls juniors e quegl ussa l’amprema stagiùn c’el e vagnieu agl cader da l’amprema squadra. 

Egn scalinem suainter l’oter

Egna part digl publicum â purto lur zens par animar la squadra locala. Mintg’eada cura ca gl’EHC Seglias â fatg egn gol ân igls fans scalino cun lur zens. Qua san ign gea prender oravànt – igl â do egn scalinem suainter l’oter. La squadra locala â giujieu cun plagn gust a schlàntsch ad â domino l’antiera partida. Cler c’els ân ear rimno l’egn near l’oter strof. Par la squadra da Seglias e’gl gest sto igl Andreas Gujan c’â stuieu sear giou gl’amprem strof da duas minutas par sia squadra. El c’e gea schon sto ancunaschaint tier igls fans sco giujeader ardaint, â sainz’anguscha puspe do tschient partschient. Igl sieus check ancùnter egn giujeader da la Glarùna e lua vagnieu stimo megna fearm digls arbiters.

Gl’amprem tearz en igls giujeaders da Seglias ieus davent digl sglatsch cun 2:0. Ascheia ân els gieu egna bùna basa par ir anavànt agl savund tearz. Suainter prest tschentg minutas aint agl savund tearz â igl Sebastian Rousette fatg igl 3:0 par la sia squadra. Strofs ân igls giujeaders da hockey digl EHC Seglias rimno nigns par quella part digl gioi. Dantànt en quels digl Glarner EC II davantos ampo frustros.

Quater geadas e egn da la Glarùna sasieu sen igl bànc da strof. Suainter igl 7:0 digl Luca Epifani da Seglias, â igl Glarner EC II mido lur goli. Mo gliez â betga nizagieu blear, igl Marc Riedi digl EHC Seglias â savieu finir igl savund tearz cun egn otgavel gol avànt la possa.

Igl davos tearz fulminànt

Schabagn ca la squadra da Seglias â gieu egn’avantatg grànd par igl davos tearz ân ella giujieu anavànt cun plagn gust. Sco’gl Marco Simeon â gieu getg avànt la partida: «Ca nus stgagn ussa dar matsch ufizials qua e par l’antiera squadra egn mumaint grandius a nus salegragn fetg sen quegl mumaint.» A quell’energeia â ear santieu igl publicum. Tut igls giujeaders da la squadra digl EHC Seglias en stos segl sglatsch cun passiùn. Igls adversaris da la Glarùna en stos là sainza schànza da turnar quegl gioi.

Ascheia ân els ànc fatg quater gols daple. Mo lua e’gl gartagieu. Seat minutas avànt c’igl gioi fuss sto fito en igls rivals sto ampo megna fetg frustros. Suainter egna direzia stravagada d’egn giujeader da la Glarùna e igl giujeader local betga ple sto sei. Suainter c’igl gioi e vagnieu interrut egn curt tains â igl Jann Menn d’Andeer ànc sagito igl davos gol par sia squadra. Cun egna victorgia da 13:0 a la squadra da Seglias savieu incantar igl publicum questa sera.