Benderer fa lö a Hatecke
Ils 17 october es stat l’ultim di cha la Pastizaria Café Benderer a Scuol ha gnü avert sias portas – na be butia da pan e café, dimpersè ün lö d’inscunter vital per giasts ed indigens. Ed uossa davo ün pa daplü co ün mais ha lö la reavertüra da las localitats, e quai cun nouv nom e nouv possessur.
Ill’età da bainbod 72 ons, pudess Ludwig Hatecke vairamaing insè fingià lönch giodair sia pensiun meritada. Cha quai saja hozindi però ün pensar sbaglià, es il bacher in terza generaziun ed affarist da Scuol persvas. «Quist es mia vita e mia paschiun. Schi s’ha chattà la professiun, pella quala i s’ha gronda paschiun, lura vala quai daplü co avair ün hobi.»
Set affars in differents lös maina Ludwig Hatecke fingià – a Scuol, Sent, Zernez, San Murezzan e Turich – ed uossa vain pro l’ottavel. Our da l’anteriura Pastizaria Café Benderer a Scuol, dvainta a partir da quist venderdi il «Pan Divin» e la «Vivanda Engiadinaisa».
Augmantar la valur dal Stradun
«Tuot quai cha nus vain cumanzà es stat in prüma lingia üna decisiun dal cour ed üna decisiun dal vainter e mai üna decisiun commerciala», güdichescha Ludwig Hatecke cuort e bön seis bsögn d’esser activ i’l passà. Dal 1982 ha el surtut l’affar da famiglia ed uossa passa 40 ons plü tard, nu pensa Ludwig Hatecke amo lönch na vi dal glivrar.
Id es pacs dis avant la reavertüra da l’anteriura Pastizaria Cafè Benderer chi’s rechatta güsta dasper il local da vendita da la bacharia Hatecke i’l Center Augustin a Scuol. Intant chi’s doda travasch da lavuraints e maschinas dad üna vart da las localitats, bivgnainta da l’otra vart Ludwig Hatecke in tuotta calma sia cliantella cun ün amiaivel «Allegra». Cha’l plaschair per sia lavur til detta pustüt il sentimaint da gnir dovrà. Quai e sia persvasiun constanta d’esser scha mâ pussibel opür «meglder o tuot oter co il rest». Cha quai saja statta fingià adüna sia filosofia da lavur, agiundscha il bacher ed affarist. Eir quai chi pertocca la decisiun da drivir affar nomer ot. «I dà differents motivs. Ma vairamaing esa ün zich simil sco avant duos ons a Sent: Provar da far alch valurus e da far gnir plü attractiv il Stradun pels indigens e pels giast. Nos sortimaint dess restar plütöst simpel e stret. Cun tuortas fattas in chasa e vendita da pan da la furnaria Giacometti a Lavin e l’ustaria cun üna schelta simila sco a Zernez, San Murezzan e Turich.»
Cha’ls ultims ons han plüs affars lung al Stradun stuvü serrar lur portas, da quist svilup s’ha fat surasen s’inclegia eir Ludwig Hatecke. Però al listess mumaint renda el eir attent ch’intanta sajan üna pruna nouvs affars darcheu gnüts nanpro obain drivan prosmamaing lur portas. Tenor el viva il Stradun da Scuol, eir cun concurrenza directa – ün fat ch’el bivgnainta però. «Nus güdain e cumplettain ün a tschel», uschea seis facit.
Ün punct d’inscunter vital eir per l’avegnir
Ch’el saja però bain ün zich nervus, admetta Ludwig Hatecke in vista a la reavertüra. E quai malgrà d’avair constatà cha sia cliantella predscha fingià da preschaint cha la sporta da pan e cafè vain mantgnüda. Dürant las lavurs da renovaziun ha Ludwig Hatecke nempe drizzà aint üna vendita provisorica illas localitats da la vendita da charn. Ed il concept para da funcziunar. Adüna darcheu dürant il discuors aintra la cliantella in butia chi, sper lur cumprita da charn, fa lur cumpras da pan, dà üna o l’otra baderlada e baiva da cumpagnia ün cafè.
Uschea cha l’anteriura Pastizaria Café Benderer i’l Center Augustin resta eir in avegnir dimena ün punct d’inscunter vital per giasts ed indigens al Stradun a Scuol. Simplamaing cun oter nom, vesti e cun ün affarist chi nu para simplamaing na da vulair gnir stanguel. E cha sch’ün bel di vess quai listess dad esser il cas, schi cha lura saja fingià pisserà. «Eu n’ha meis duos figls – e forsa ünsacura eir mia figlia – chi vegnan davo e fan quai fich bain. Ün plaschair plü grond nu’s poja avair», conclüda Ludwig Hatecke plain recugnuschentscha il discuors avant ch’el as metta darcheu in tuotta quietezza a la lavur.
Gust da leger dapli?